ព្រំដែនកម្ពុជាថៃ៖ ទីបំផុតអាជ្ញាធរថៃ បានបិទច្រកព្រំដែនមួយចំនួន ជាមួយកម្ពុជា ចាប់ពីថ្ងៃទី១៩ ខែមីនា ឆ្នាំ២០២០ តទៅហើយ ដើម្បីជាវិធានការទប់ស្កាត់ការឆ្លងមេរោគកូរ៉ូណា ឬកូវីដ១៩ ។
លោកថាក់ឆាក់កន ហាត់ថាយ៉ាគូន អភិបាលខេត្តបូរីរម្យ ប្រទេសថៃ ក្នុងសេចក្តីប្រកាស ចុះថ្ងៃទី១៩ ខែមីនា ឆ្នាំ២០២០ បានឲ្យដឹងថា ៖ ទាំងនាំទំនិញ និងពលរដ្ឋចេញចូលនៅព្រំំដែន ច្រកតំបន់សាយតាគូរ ក្នុងស្រុកបានក្រួត ខេត្តបុរីរាំ ប្រទេសថៃ ទល់មុខនឹងច្រកតំបន់ជប់គគីរ ស្រុកបន្ទាយអំំពិល ក្នុងខេត្តឧត្តរមានជ័យ ប្រទេសកម្ពុជា ត្រូវបិទជាបណ្តោះអាសន្ន ដើម្បីការពារនៃការឆ្លងរោគរាតត្បាតកូវីដ១៩ ក្នុងតំបន់់ខ្លួន។
អាជ្ញាធរថៃ ធ្វើការបិទច្រកចេញចូលនៅព្រំដែននេះ ដោយសារស្ថានភាពបច្ចុប្បន្ន នៃការឆ្លងរោគរាតត្បាតកូវីដ១៩ ទូទាំងពិភពលោក ។
អាជ្ញាធរខេត្តបុរីរាំ ប្រទេសថៃ ចាំបាច់ត្រូវមានវិធានការតឹងរ៉ឹង ដើម្បីការពារនៃការរាតត្បាតនេះ ។ ហេតុនេះ សុំការអនុគ្រោះ ពីអាជ្ញាធរកម្ពុជាក្នុងការផ្អាក ការចេញចូលច្រកព្រំដែនខាងលើនេះ ជាបណ្តោអាសន្ន ចាប់ពីថ្ងៃទី១៩ ខែមីនា ឆ្នាំ២០២០នេះតទៅ រហូតដល់ការរាតត្បាតរបស់មេរោគនេះ មានសភាពការធូរស្រាល។
ការបិទនេះ ជាវិធានការបន្ទាប់ប៉ុណ្ណោះ ព្រោះនៅផ្ទៃភូមិសាស្ត្រប្រទេសថៃ អាជ្ញាធរមានសមត្ថកិច្ច បានបិទរួចហើយផងដែរ ។
សូមបញ្ជាក់ថា ច្រកព្រំដែនសាយតាគូ -ជប់គគីរនេះ មានមនុស្សចេញ ចូលតែត្រឹមផ្សារព្រំដែនទាំងពីរ ។ មានភ្ញៀវថៃមកលេងកាស៊ីណូនៅព្រំដែនកម្ពុជាតិចតួច និងក៏មានទំនិញតិចតួច នាំទៅមកតាមការយួរនឹងដៃ និងតាមការដឹករទេះអូស ។
ទោះជាយ៉ាងនេះក្តី នៅច្រកព្រំដែនអន្តរជាតិឆងចម ខេត្តសុរិន្ទ ទល់មុខច្រកព្រំដែនអន្តរជាតិអូរស្មាច់ និងច្រកព្រំដែនអន្តរជាតិឆងសាង៉ាំ ខេត្តស៊ីសាកេត ទល់មុខច្រកព្រំដែនជាំ នៃខេត្តឧត្តរមានជ័យ នៅមិនទាន់បិទទេ គ្រាន់តែភ្ញៀវទេសចរជាតិ អន្តរជាតិ និងអ្នកដំណើរ ពិសេសអ្នកជំងឺជាពលរដ្ឋខ្មែរ រាប់រយនាក់ក្នុង១ថ្ងៃៗ ចូលទៅទទួលការពិនិត្យ ព្យាបាលនៅថៃនោះ មានចំនួនថយចុះ ។
ឯទំនិញចេញ ចូលក៏មាននិន្នាការថយចុះដែរ ៕ ដោយ ៖ បន្ទាយ
