ភ្នំពេញ ៖ អាជ្ញាធរ តែងតែបានអប់រំនិងណែនាំអោយប្រជាជនអោយយកចិត្តទុកដាក់ក្នុងការទុកដាក់និងវេចខ្ចប់សំរាមអោយបានត្រឹមត្រូវ ដោយត្រូវគិតគូពីបញ្ហាបរិស្ថាននិងអនាម័យផងដែរ ក្នុងការរស់នៅ តែនៅមានប្រជាជនមួយចំនួនតូចមិនសូវ មានការយល់ដឹងតែងតែចោលសំរាមផ្តេសផ្តាស នៅតាមប្រឡាយលូបឹងត្របែកនេះ ដែលជាហេតុមិនអាចអោយទឹកលូរហូទៅកាន់ស្ថានីយ៍បូមទឹកបាន ។
ទោះយ៉ាងណានៅថ្ងៃទី ១៩ខែមីនាឆ្នាំ ២០២០ នេះ មន្ទីរសាធារណការដឹកជញ្ជូនរាជធានីភ្នំពេញ បានចេញរបាយការណ៍ ពីសកម្មភាពកាយប្រមូលសំរាមនៅប្រឡាយបឹងត្របែក បានបញ្ចប់ ១០០% ដោយការងារបានចាប់ផ្តេីមប្រមូលថ្ងៃទី៧ ខែមីនាឆ្នាំ២០២០ និងបញ្ចប់ប្រមូលថ្ងៃទី១៩ ខែមីនា ឆ្នាំ២០២០។
ជាលទ្ឋផលបានប្រមូល និងដឹកសំរាមចេញបានចំនួន ៣៥០ឡាន ស្មើនឹង ១៧៥០ម៉ែត្រគូប។
ករណីសំរាមដែលអណ្ដែតពេញប្រឡាយបឹងត្របែកនេះផងដែរ អាជ្ញាធរមូលដ្ឋាន បានធ្វើការអំពាវនាវអោយប្រជាជនចូលរួមក្នុងវេចខ្ចប់ទុកដាក់ កាកសំណល់សំរាមអោយបានត្រឹមត្រូវ ជៀសវាងបោះចោលផ្តេសផ្តាស ជាហេតុនាំអោយហូរ ចូលទឹកប្រឡាយបឹងត្របែកឬប្រព័ន្ធលូ នាំអោយមានការកកស្ទះសំរាមទឹកមិនអាចហូរបានជាពិសេសរដូវវស្សាខាងមុខនេះ។
ប្រឡាយលូបឹងត្របែក ស្ថិតនៅតាមបណ្តោយផ្លូវលេខ១០៥ក្នុងសង្កាត់បឹងត្របែក និងសង្កាត់ផ្សារដើមថ្កូវខណ្ឌចំការមន រាជធានីភ្នំពេញ។
អាជ្ញាធរ ក៏បានអំពាវនាវអោយប្រជាជនដែល រស់នៅអមសងខាងតាមប្រឡាយបឹងត្របែកនេះត្រូវគិតគូរពីបញ្ហាអនាម័យបរិស្ថានក្នុងការរស់នៅ ដោយធ្វើការទុកដាក់សំរាមអោយបានត្រឹមត្រូវកុំបោះចោលក្នុងប្រឡាយលូជាហេតុនាំអោយមានការកកស្ទះ សំរាម ជាពិសេសអាចធ្វើអោយប៉ះពាល់ដល់សុខភាពក្រុមគ្រួសារខ្លូនឯង កុមារនិងក្មេងតូចៗដែលងាយនិងប៉ះពាល់ដល់សុខភាព។
អាជ្ញាធរ ធ្វើការដឹកជញ្ជូនសំរាម ចេញពីប្រឡាយបឹងត្របែកយកទៅចាក់នៅទីលានចាក់សំរាម រហូតដល់អស់សំរាមពីក្នុងប្រឡាយលូ៕ ដោយ៖កូឡាប
