ឧបនាយករដ្ឋមន្ត្រី និងជារដ្ឋមន្ត្រីការពាជាតិថៃ Prawit Wongsuwon អះអាងថា នាឡិការដ៏មានតម្លៃប៉ុន្មានគ្រឿងដែលលោកពាក់ ហើយបានធ្វើឲ្យសាធារណៈមតិ “វាយប្រហារ” ក្នុងអំឡុងពេលកន្លងទៅថ្មីៗនេះ តាមពិតទៅជារបស់ខ្ចីពីមិត្តភក្តិ។
នាឡិកាតម្លៃថ្លៃនឹងចិញ្ចៀនពេជ្រ ត្រូវបានគេឃើញនៅលើដៃរបស់ឧបនាយករដ្ឋមន្ត្រី Prawit Wongsuwon។
តាមបាងកកកប៉ុស្តិ៍ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិថៃ Prawit Wongsuwon កាលពីថ្ងៃទី១០ ខែមករា ឲ្យដឹងថា នាឡិកាទាំងអស់ “២៤គ្រឿង” ដែលលោកបាន ពាក់ក្នុងអឡុងពេលកន្លងមកសុទ្ធសឹងជាទ្រព្យសម្បត្តិមិត្តរបស់លោក ប៉ុន្តែបានបដិសេធពុំទម្លាយប្រាប់ពីចំនួននាឡិកាដែលលោកជាម្ចាស់។ លោកប្រាវីតក៏បានប្រកាសថា នឹង សុខចិត្តលាលែងពីមុខតំណែង ប្រសិនបើស្ថាប័នប្រឆាំងអំពើពុករលួយ នៃប្រទេសនេះមានភស្តុតាងជាក់លាក់ដើម្បីចោទប្រកាន់ប្តឹងរូបលោក។
ឥស្សរជននោយោបាយលំដាប់ទី២នៅប្រទេសថៃ បានរងនូវពាក្យចរចាមអារាមចោទប្រកាន់អស់ពេលច្រើនសប្តាហ៍មកហើយ ជុំវិញការមន្ទិលសង្ស័យចំពោះនាឡិកាមានតម្លៃថ្លៃៗ ច្រើនគ្រឿង ក៏ដូចជាគ្រឿងអលង្ការច្រើនប្រភេទផ្សេងទៀត ត្រូវបានឃើញលើរាងកាយលោក ខណៈពេលដែលលោកទទួលបានប្រាក់បៀវត្សរ៍ក្នុងឋានៈជាឧត្តមសេនីយ៍មួយរូបប៉ុណ្ណោះ។ ពិសេសជាងនេះទៅទៀត ទ្រព្យសម្បត្តិទាំងនោះពុំត្រូវបានរាយការណ៍ក្នុងតារាងទ្រព្យសម្បត្តិរបស់បុគ្គលលោកឡើយ។
សេចក្តីប្រកាសថ្មីនេះរបស់លោក Prawit គឺជាចម្លើយដំបូងបំផុតឆ្លើយតបនឹងពាក្យចោទប្រកាន់ទាំងឡាយក្នុងអំឡុងពេលកន្លងមក ហើយលោកក៏បានអះអាងថា នាឡិកាទាំងអស់នេះលោកខ្ចីមកពាក់ ហើយក៏បានសងត្រឡប់ទៅមិត្តភក្តិវិញ។ ម្យ៉ាងវិញទៀតលោកប្រាប់ថា ខ្លួនលោកពុំមែនជាអ្នកនិយមសន្សំនាឡិកាផងដែរ។
រូបភាពដែលឧបនាយករដ្ឋមន្ត្រី Prawit យកដៃថ្ងៃ “ធ្លាយ” ចេញនាឡិកាដ៏មានតម្លៃថ្លៃ និងចិញ្ចៀនពេជ្រធំមួយ។
គួរកត់សម្គាល់ថា គណៈកម្មាធិការប្រឆាំងអំពើពុករលួយថៃ (NACC) បានបើកការស៊ើបអង្កេតករណីនេះចំពោះឧបនាយករដ្ឋមន្ត្រី Prawit។ តាមអគ្គលេខាធិការ NACC Worawit Sukboon ឲ្យដឹងថា ករណីនេះពុំស្មុគស្មាញពេកទេ ហើយការស៊ើបអង្កេត និងអាចបញ្ចប់នៅអំឡុងចុងខែនេះ៕ សូយន
