ភ្នំពេញ៖លោកអភិបាលរាជធានីភ្នំពេញបានធ្វើការអំពាវនាវឱ្យ ម្ចាស់អាជីវកម្មចុងភៅម្ចាស់អគារ ភោជនីយដ្ឋាន ម្ចាស់មជ្ឈមណ្ឌលសម្រាប់ជួលរៀបចំកម្មវិធីទាំងអស់ក្នុងរាជធានីភ្នំពេញ សូមកុំកាត់លុយពីម្ចាស់កម្មវិធីដែលបានកក់ប្រាក់ ខណៈដែលពួកគាត់សម្រេចចិត្ត រំសាយកម្មវិធីវិញ ដើម្បីចូលរួមបង្ការនិងទប់ស្កាត់ការរីករាលដាលនៃជំងឺ វីរុសកូវីដ ១៩ (COVID-19) ទៅតាមការណែនាំរបស់រាជរដ្ឋាភិបាលកម្ពុជា ។
តាមរយៈសេចក្តី អំពាវនាវ របស់រដ្ឋបាលរាជធានីភ្នំពេញថ្ងៃទី 19 ខែមីនាឆ្នាំ 2020 លោក អភិបាលរាជធានីភ្នំពេញបានថ្លែងថាក្នុងរយៈពេលកន្លងមកមានបងប្អូនប្រជាពលរដ្ឋមួយចំនួនដែលគ្រោងរៀបចំពិធីជប់លៀងមង្គលការពិធីបុណ្យនិងកម្មវិធីជួបជុំផ្សេងៗបានសម្រេចលើកពេលឬរំសាយកម្មវិធីវិញដើម្បីចូលរួមបង្ការនិងទប់ស្កាត់ការរីករាលដាលនៃជំងឺកូវីដ 19 ស្របតាមសារាចរណែនាំរបស់រាជរដ្ឋាភិបាលកម្ពុជា។
ដើម្បីជាការលើកទឹកចិត្តដល់បងប្អូនប្រជាពលរដ្ឋម្ចាស់កម្មវិធីរដ្ឋបាលរាជធានីភ្នំពេញអំពាវនាវដល់ឯកឧត្តមលោកជំទាវលោកលោកស្រីជាម្ចាស់អាជីវកម្មចុងភៅម្ចាស់អគារភោជនីយដ្ឋានម្ចាស់មជ្ឈមណ្ឌលសម្រាប់ជួលរៀបចំកម្មវិធីទាំងអស់ក្នុងរាជធានីភ្នំពេញសូមមេត្តាកុំកាត់លុយឬយកលេសទាមទារសំណងនៃការខាតបង់ពីម្ចាស់កម្មវិធីដែលបានកក់ប្រាក់និងចៀសវាងការយកឱកាសនេះដើម្បីកេងចំណេញពីប្រជាពលរដ្ឋដែលបានស្ម័គ្រចិត្តចូលរួមក្នុងការបង្ការនិងទប់ស្កាត់ការរីករាលដាលនៃជម្ងឺកូវីដ 19 នៅក្នុងរាជធានីភ្នំពេញក៏ដូចជាទូទាំងប្រទេសកម្ពុជា៕ ដោយ៖កូឡាប
