បាត់ដំបង៖ ស្នងការនគរបាលខេត្ត បានណែនាំដល់កងកម្លាំងនគរបាល ត្រូវធ្វើការផ្សព្វផ្សាយបន្ត ស្តីពីវិធានការបង្ការ ការឆ្លងរាលដាលវីរ៉ុស COVID-19 ដល់មន្ត្រីក្រោមឱវាទឲ្យបានជ្រួតជ្រាប ពិសេសការធ្វើអនាម័យបានត្រឹមត្រូវ ជៀសវាងការឆ្លងរីករាលដាល។
នៅព្រឹកថ្ងៃព្រហស្បតិ៍ ទី១៩ ខែមីនា ឆ្នាំ២០២០ នៅសាលប្រជុំក្នុងបរិវេណស្នងការដ្ឋាននគរបាលខេត្តបាត់ដំបងបានរៀបចំធ្វើការផ្សព្វផ្សាយសេចក្តីណែនាំលេខ ០០២សណន ចុះថ្ងៃទី១៨ ខែមីនា ឆ្នាំ២០២០ របស់អគ្គស្នងការដ្ឋាននគរបាលជាតិស្តីពីវិធានការបង្ការ ការឆ្លងរាលដាលវីរ៉ុស COVID-19 ។
ពិធីនេះស្ថិតក្រោមអធិបតីភាព លោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្ត បាត់ដំបងព្រមទាំងមានការចូលរួមពីលោកលោកស្រីជាមន្ត្រីនៃមន្ទីរសុខាភិបាលខេត្តបាត់ដំបង ក្រៅពីនោះមានលោក លោកស្រី ស្នងការរង លោកនាយ នាយរងការិយាល័យជំនាញ លោកមេបញ្ជការ មេបញ្ជាការរងវរសេនាតូចនគរបាលការពារព្រំដែនគោកទាំង៤ លោកអធិការ អធិការរងនគរបាលក្រុងស្រុក នាយប៉ុស្តិនគរបាលរដ្ឋបាលនិងមន្ត្រីនគរបាលចំណុះស្នងការដ្ឋានជាច្រើនរូប។
បន្ទាប់ពីបានស្តាប់នូវយោបល់ណែនាំពីវិធានការបង្ការទប់ស្កាត់ករណីវីរ៉ូសCOVID-19 ពីលោកដួង ចន្ថា មន្ត្រីនៃមន្ទីរសុខាភិបាលខេត្តបាត់ដំបង និងក្រោយពីបានផ្សព្វផ្សាយ សេចក្តីណែនាំរបស់អគ្គស្នងការដ្ឋាននគរបាលជាតិស្តីពីវិធានការបង្ការ ការឆ្លងរាលដាលវីរ៉ុស COV ID -19រួចមក លោកឧត្តមសេនីយ៍ទោ អ៊ុច សុខុន បានផ្តាំផ្ញើបន្ថែមដល់កងកម្លាំងក្នុងអង្គប្រជុំត្រូវធ្វើការផ្សព្វផ្សាយបន្តស្តីពីវិធានការបង្ការ ការឆ្លងរាលដាលវីរ៉ុស COVID-19 ដល់មន្ត្រីក្រោមឱវាទឲ្យបានជ្រួតជ្រាប ពិសេសការធ្វើអនាម័យបានត្រឹមត្រូវចៀស វាងការឆ្លងរីករាលដាល។
លោកបន្តថា នៅចុះពោះមុខនេះកងកម្លាំងនគរបាលត្រូវសហការណ៍ក្នុងការទប់ស្កាត់និងគ្រប់គ្រងរាល់សភាពការណ៍ញុះញ៉ង់រើងអើងទៅលើក្រុមគ្រួសារអ្នកជំងឺដែលបានឆ្លងមេរោគនេះ ក៏ដូចជាការពង្រឹងស្មារតីនិងឆន្ទៈក្នុងការប្រយុទ្ធប្រឆាំងនឹងជនអគតិទាំងឡាយ ដែលបំភ្លៃនូវព័ត៌មានមិនពិតក្នុងចេតនាបង្កចលាចលនិងបំផ្លាញសន្តិសុខជាតិ។
លោកស្នងការ បានបន្ថែមថា ទោះបែបណាក៏ដោយក្នុងនាមយើងជាសមត្ថកិច្ចត្រូវផ្តោតទៅលើភារកិច្ចចំពោះមុខគឺ(បង្ក្រាបបទល្មើសផ្សេងៗ) ការអនុវត្តនូវគោលនយោបាយស្តីពីភូមិ ឃុំមានសុវត្ថិភាពនិងអន្តរាគមន៍រាល់ករណីដែលអាចកើតមានឡើងជាយថាហេតុ ហើយត្រូវកាត់បន្ថយការជួបជុំគ្នាដោយមិនចាំបាច់តែត្រូវបង្កើនការទំនាក់ទំនងតាមគ្រប់មធ្យោបាយផ្សេងៗដូចជាទូរស័ព្ទ ឬវិទ្យុទាក់ទងអោយបានទូលំទូលាយនិងជាប់ជាប្រចាំ៕ដោយ៖កូឡាប