ខេត្តព្រះវិហារ ៖ បណ្ឌិតសភាចារ្យ សុខ ទូច បានអះអាងថា មានជនល្មើសឆ្លៀតឱកាស លួចកាប់ឈើ នៅឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប ហើយលោកបានស្នើលោកនាយឧត្តមសេនីយ៍ សៅ សុខា បានបញ្ជូនកម្លាំងចម្រុះ ចុះបង្ក្រាបការកាប់ឈើខុសច្បាប់នេះ ។
លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានសរសេរសារលើហ្វេសប៊ុកផ្លូវការថា “នៅថ្ងៃទី១៩ មីនា ឆ្នាំ២០២០ ដោយមានការស្នើសុំពីខាងឧទ្យានរាជបណ្ឌិត្យសភាកម្ពុជា នាយឧត្តមសេនីយ៍ សៅ សុខា បានបញ្ជូនកម្លាំងចម្រុះរួមមាន៖ មេបញ្ជាការកងរាជអាវុធហត្ថខេត្ត រដ្ឋបាលព្រៃឈើ និងអាជ្ញាធរស្រុកឆែប ចុះបង្ក្រាបការកាប់ឈើខុសច្បាប់ ជាច្រើនកន្លែង នៅក្នុងឧទ្យានរាជបណ្ឌិត្យសភាកម្ពុជា តេជោសែនឫស្សីត្រឹប”។
សូមជម្រាបថា ឧទ្យានរាជបណ្ឌិតសភាកម្ពុជា តេជោសែន ឫស្សីត្រឹប មានផ្ទៃដីសរុប ១១៤,៣៥ គីឡូម៉ែត្រការ៉េ ស្ថិតនៅឃុំឆែបពីរ ស្រុកឆែប ខេត្តព្រះវិហារ និងបានបង្កើតឡើង ដោយព្រះរាជក្រិត្យលេខ នស/រកត/០៤១៤/៤៣៦ ចុះថ្ងៃទី១៧ ខែមេសា ឆ្នាំ២០១៤ ។ ឧទ្យាននេះមានតំបន់ជីវៈចម្រុះ និងមានសក្តានុពលច្រើន រួមមាន ៖ ធនធានព្រៃឈើ ពូជឈើគ្រប់ប្រភេទដោយប្រើរយៈពេល៦ឆ្នាំ ដាំឲ្យបាន ១លានដើម, សត្វព្រៃកេរដំណែលប្រវត្តិសាស្ត្របុរាណវត្ថុ និងជាតិពន្ធុ ដែលអាចបំរើឲ្យមុខងារក្នុងបរិស្ថាន ព្រៃឈើវប្បធម៍ ប្រវត្តិសាស្ត្រនិងទេសចរណ៍យ៉ាងប្រសើរ ៕ដោយ៖កូឡាប