ភ្នំពេញ ៖ ជនសង្ស័យម្នាក់ ដែលជាឃាតក បន្ទាប់ពីបានចាក់សម្លាប់សន្តិសុខយាមធនាគារ ម្នាក់បណ្តាលឲ្យស្លាប់ បានរត់គេចខ្លួនទៅដល់ភូមិព្រៃពន្លិច សង្កាត់អាចរ្យលាក់ ក្រុងស្ទឹងសែន ហើយសមត្ថកិច្ចស្រាវជ្រាវឃាត់ខ្លួន បាននៅវេលាម៉ោង១៧និង៤០នាទី។ ហេតុការណ៍ចាក់សម្លាប់នេះ បានកើតឡើង កាលពីថ្ងៃទី១៩ ខែមីនា ឆ្នាំ២០២០ វេលាម៉ោង៦និង៣៨នាទីព្រឹក នៅមុខធនាគា ភ្នំពេញ ពាណិជ្ជ ផ្ទះលេខ៧៨ ក្រុម៣៩ភូមិ៩ផ្លូវមុន្នីរេត សង្កាត់ទួលស្វាយព្រៃ២ ។
លោកវរសេនីយ៍ទោ ស៊ឹម ពិសិដ្ឋ អធិការនគរបាលខណ្ឌបឹងកេងកង ដែលដឹកនាំកម្លាំងដោយផ្ទាល់តាមចាប់ជនល្មើស បានឲ្យដឹងថា ជនល្មើសដែលចាក់សម្លាប់សន្តិសុខឯកជន ត្រូវបានចាប់ខ្លួនហើយ ។
ជនសង្ស័យដែលជាឃាតករឈ្មោះ ឈី ប៊ុនណៃ ហៅ ស្កាយ អាយុ២១ឆ្នាំ ជនជាតិខ្មែរ ទីលំនៅបច្ចុប្បន្ន ផ្ទះជួលគ្មានលេខ ផ្លូវលំ សង្កាត់ទឹកថ្លា ខណ្ឌសែនសុខ រាជធានីភ្នំពេញ មុខរបរ សន្ដិសុខCSC (ប្រើប្រាស់គ្រឿងញៀន) ។ វត្ថុតាងរូមមាន ៖ កាំបិតចិតបន្លែមុខស្រួចចំនួន១ (បាក់ដង), កង់ពណ៌ផ្កាឈូក កន្ដ្រកពណ៌ខ្មៅចំនួន០១គ្រឿង, ខោអាវសន្ដិសុខចំនួន១កំផ្លេ, អាវសាច់ក្រណាត់ដៃវែងក្រឡាពណ៌ក្រហម និងមួកសន្ដិសុខចំនួន១។
ជនរងគ្រោះឈ្មោះ ប៊ុន សុខចំរើន ភេទប្រុស អាយុ៣៧ឆ្នាំ ជនជាតិខ្មែរ ទីលំនៅបច្ចុប្បន្ន ផ្ទះជួល ផ្លូវលំ ក្រុមទី៦ ភូមិដំណាក់ធំ២ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ មុខរបរ សន្ដិសុខCSC (ស្លាប់)។
នគរបាលខណ្ឌបឹងកេងកង បានរៀបរាប់ពីតាមដំណើររឿងថា តាមការបំភ្លឺរបស់ឈ្មោះ ស៊ិន ធា ភេទប្រុស អាយុ៤៨ឆ្នាំ ជាអ៊ុំប្រុសរបស់ជនរងគ្រោះឈ្មោះ ប៊ុន សុខចំរើន ភេទប្រុស អាយុ៣៧ឆ្នាំ ដែលធ្វើការជាមួយ ជនរងគ្រោះបានបំភ្លឺថា ៖ ថ្ងៃកើតហេតុ ទី១៩ ខែមីនា ឆ្នាំ២០២០ វេលាម៉ោង៥និង៤០នាទីព្រឹក ជនរងគ្រោះបានជិះម៉ូតូ១គ្រឿង ម៉ាកស្មាស់ ពណ៌ខ្មៅ មិនចាំផ្លាកលេខ ជាមួយខ្លួនចេញពីផ្ទះរបស់ជនរងគ្រោះមកធ្វើការជាសន្ដិសុខយាមនៅធនាគារភ្នំពេញពាណិជ្ជ ក្នុងសង្កាត់ទួលស្វាយព្រៃទី២ ពេលមកដល់ជនរងគ្រោះ និងអ៊ុំប្រុសរបស់ ខ្លួនបានរៀបចំបោសសំអាតនៅមុខធនាគារ បន្ទាប់មកជនរងគ្រោះក៏បានចូលទៅក្នុងធនាគារ ដើម្បីងូតទឹក ហើយក៏បានចេញមកវិញ បន្ទាប់មកអ៊ុំប្រុសរបស់ជនរងគ្រោះ ក៏បានចូលទៅងូតម្ដង បានប្រហែលមួយសន្ទុះអ៊ុំប្រុសរបស់ជនរងគ្រោះក៏បានចេញមកវិញ ស្រាប់តែឃើញជនរងគ្រោះដេកផ្កាប់មុខ និងមានឈាមហូរជាច្រើន រួចក៏បាន ចាប់ទាញជនរងគ្រោះមកផ្ងារមកវិញឃើញមានស្នាមរបួស និងកាំបិតហើយបានដាច់ខ្យល់ស្លាប់បាត់ទៅហើយ។
បន្ទាប់មកបានប្រហែលបន្ដិចសមត្ថកិច្ចចម្រុះចុះមកដល់កន្លែងកើតហេតុត្រួតពិនិត្យ និងបានបញ្ជូនជនរងគ្រោះ(សព)ទៅតម្កល់នៅវត្តស្ទឹងមានជ័យ ដើម្បីធ្វើកោសល្យវិច្ច័យ ក្រោយពីធ្វើកោសល្យវិច្ច័យរួច សមត្ថកិច្ចនគរបាលបច្ចេសរាជធានីភ្នំពេញ ពិនិត្យលើសាកសពមានឃើញស្នាមរបួសត្រូវកាំបិតចាក់ចំនួន៥កន្លែង ហើយសពជនរងគ្រោះត្រូវ បានប្រគល់ទៅអោយក្រុមគ្រួសារយកទៅធ្វើបុណ្យតាមប្រពៃណីនៅឯស្រុកកំណើត បន្ទាប់មកសមត្ថកិច្ចបានធ្វើការពិនិត្យមើលកាមេរ៉ាសុវត្ថិភាព ឃើញជនសង្ស័យឈ្មោះ ឈី ប៊ុនណៃ ភេទប្រុស អាយុ២១ឆ្នាំ ជនជាតិខ្មែរ បានជិះកង់មួយគ្រឿង ពណ៌ក្រហម មករកជនរងគ្រោះរួចបានធ្វើសកម្មភាពដកកាំបិតចិតបន្លែ ចាក់ទៅលើជនរងគ្រោះ បណ្ដាលអោយស្លាប់តែម្ដង។ បន្ទាប់មកសមត្ថកិច្ចក៏បានធ្វើការស្រាវជ្រាវ ឃាត់បានជនសង្ស័យនៅភូមិព្រៃពន្លិច សង្កាត់អាចរ្យលាក់ ក្រុងស្ទឹងសែន ខេត្តកំពង់ធំ។
បច្ចុប្បន្នជនសង្ស័យ ត្រូវបានឃាត់ខ្លួនបណ្ដោះអាសន្ន នៅអធិការដ្ឋាននគរបាលខណ្ឌបឹងកេងកង ដើម្បីកសាងសំណុំរឿងបញ្ជូនទៅតុលាការចាត់ការតាមច្បាប់ ៕ដោយ៖កូឡាប