កំពង់ស្ពឺ ៖ ម្ចាស់គណនីហ្វេសប៊ុក KUN SROS ក្លែងព័ត៌មាន ថាមានអ្នកឆ្លងជំងឺ វីរុស Covid19 នៅក្រុមហ៊ុនមួយក្នុងឃុំក្រាំងដឺវ៉ាយ ស្រុកភ្នំស្រួច ត្រូវសមត្ថកិច្ចនគរបាលខេត្តកំពង់ស្ពឺ បានធ្វើការស្រាវជ្រាវ និងចាត់ការតាមនីតិវិធី កាលពីថ្ងៃទី១៩ខែមីនាឆ្នាំ២០២០។
សមត្ថកិច្ចនគរបាលខេត្តកំពង់ស្ពឺ បានបញ្ជាក់ក្នុងរបាយការណ៍ថា កាលពីថ្ងៃទី ១៤ ខែមីនា ឆ្នាំ២០២០ មានការយល់ច្រឡំធ្វើឱ្យជ្រួលច្របល់ពីរសំណាក់ប្រជាពលរដ្ឋ រស់នៅក្នុងភូមិដក់ពរ ឃុំក្រាំងដឺវ៉ាយ ស្រុកភ្នំស្រួច ខេត្តកំពង់ស្ពឺ បណ្ដាលមកពីរដំណឹងចែកចាយគ្មានការពិត របស់បុរសម្នាក់ដែលជាម្ចាស់គណនីហ្វេសប៊ុក KHU SROS ឈ្មោះ សាត ស្រស់ ភេទប្រុស មុខរបរ ជាគ្រូបង្រៀន នៅសាលាបឋមសិក្សាក្រសាំងខ្ពស់ ដោយការបង្ហោះសារសម្លេង ” សូមលោកគ្រូអ្នកគ្រូ ទាំងអស់ដែលនៅក្នុងគ្រុប messenger សាលាបឋមសិក្សាក្រសាំងខ្ពស់ ថ្មីៗនេះជំងឺ CONORA បានមកដល់កោះកោង ក្រាំងដីវ៉ាយនិងបានឆ្លងមកមនុស្សធ្វើការនៅក្នុងក្រុមហ៊ុន… ត្រូវជាកូនយាយខុមនៅសាលាឃុំក្រាំងដីវ៉ាយ ភ្នំស្រួច កំពង់ស្ពឺ យើងហ្នឹង ឥឡូវគេបានចុះមកយកទៅព្យាបាល ហើយ តែនៅសល់ច្រើននាក់ទៀត ក្នុងក្រុមហ៊ុនដូច្នេះសូមបងប្អូន លោកគ្រូ អ្នកគ្រូ ជួយផ្សព្វផ្សាយឱ្យបានដឹងនឹងនាំគ្នាប្រុងប្រយ័ត្ន “។
ក្រោយទទួលបានព័ត៌មានពីរប្រជាពលរដ្ឋ ពាក់ព័ន្ធការជ្រួលច្របល់ ដោយនាំគ្នាឈប់មកធ្វើការ និងធ្វើឱ្យប៉ះពាល់ដល់កិត្ដិយស ការនិយាយបន្ដគ្នាដោយនាំឱ្យមានការរើងអើង ចំពោះព័ត៌មានថា “មនុស្សម្នាក់ឆ្លងជំងឺ” នៅក្នុងក្រមហ៊ុនខាងលើលោកឧត្តមសេនីយ៍ទោ សម សាមួន ស្នងការ នគរបាលខេត្ត បានឱ្យសមត្ថកិច្ចស្រាវជ្រាវរហូតកំណត់មុខសញ្ញាបាន អញ្ជើញមកសាកសួរនៅស្នងការដ្ឋាននគរបាលខេត្ដកំពង់ស្ពឺ ជាលទ្ធផល ជនសង្ស័យបានសារភាព ទទួលស្គាល់ថាខ្លួនពិតជាម្ចាស់គណនីហ្វេសប៊ុក ឈ្មោះ KHU SROSនិងបាននិយាយសារបង្ហោះចែកចាយក្នុងគ្រុប messenger ឈ្មោះ សាលាបឋមសិក្សាក្រសាំងខ្ពស់ ពិតប្រាកដមែន ដោយសារតែខ្លួនឮតៗពីរក្មេងៗ នៅក្បែរក្រុមហ៊ុន បច្ចុប្បន្នជនសង្ស័យត្រូវបាន ជំនាញសន្ដិសុខផ្ទៃក្នុង កសាងសំណុំរឿងបញ្ជូនទៅតុលាការ ចាត់ការតាមនីតិវិធីច្បាប់។
ស្នងការនគរបាលខេត្ត បានសំណូមពរស្នើសុំដល់អ្នកលេងបណ្ដាញសង្គមហ្វេសប៊ុកទាំងអស់ មេត្តាកុំធ្វើការផ្សព្វផ្សាយនូវព័ត៌មានមិនពិត ដែលធ្វើឲ្យមានការភាន់ច្រឡំ ពីបងប្អូនប្រជាពលរដ្ឋ និងប៉ះពាល់ដល់ស្ថានភាពវឹកវរក្នុងសង្គម ៕ដោយ៖កូឡាប