នាវាទេសចរណ៍ធំៗ អាចនឹងត្រូវគេប្រើក្លាយ ទៅជាមន្ទីរពេទ្យអណ្តែត ដើម្បីព្យាបាលអ្នកជំងឺកូរ៉ូណា ដោយសារតែវាមានបន្ទប់ច្រើន។ នេះបើតាមការបញ្ជាក់ របស់ប្រធានាធិបតីអាមេរិច ដូណាល៉ ត្រាំ កាលពីថ្ងៃព្រហស្បតិ៍។
លោកត្រាំថ្លែងក្នុងសន្និសីទសារព័ត៌មានថា លោក Micky Arison ប្រធានក្រុមហ៊ុន Carnival ដែលគ្រប់គ្រងបណ្តាញនាវាទេសចរណ៍ បានផ្តល់នាវាសម្រាប់ធ្វើមន្ទីរពេទ្យ ហើយវាគឺជាការផ្តល់ដ៏សម្បុរស។
លោក ត្រាំបញ្ជាក់ថា “គាត់និយាយថា គាត់មាននាវាមួយចំនួន ដែលអាចស័ក្តិសមសម្រាប់អ្វីដែលយើងកំពុងធ្វើ” ដោយសារសារតែនាវាមានទំហំធំ និងមានបន្ទប់ច្រើន។
លោកនិយាយទៀតថា “ប្រសិនជាពួកយើងត្រូវការកប៉ាល់ និងបន្ទប់ច្រើន ពួកវានឹងចូលចតនៅទីក្រុង New York, Los Angeles និង San Francisco និងកន្លែងផ្សេងៗទៀត”។
Carnival គឺជាក្រុមហ៊ុននាវាទេសចរណ៍ ឈានមុខគេក្នុងពិភពលោក។
សូមបញ្ជាក់ថា រហូតមកដល់ថ្ងៃសុក្រនេះ អាមេរិចមានអ្នកឆ្លងវីរុសកូរ៉ូណាចំនួនជាង ១៤.០០០ករណី និងស្លាប់ជាង ១០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia