កំពង់ចាម ៖ អាជ្ញាធរក្នុងមូលដ្ឋាន ត្រូវសហការជាមួយថ្នាក់ដឹកនាំសាសនា ក្នុងខេត្តកំពង់ចាម ដើម្បី អប់រំណែនាំដល់ប្រជាពលរដ្ឋ ដែលជាមុខសញ្ញាបានប៉ះពាល់ជនជាតិម៉ាឡេស៊ី ទាំង ៦នាក់នោះ ឲ្យស្នាក់នៅតាមផ្ទះរៀងៗខ្លួន ក្នុងរយៈពេល ១៤ថ្ងៃ ដើម្បីថែទាំសុខភាពខ្លួនឯង ក៏ដូចជា សុវត្ថិភាពក្រុមគ្រួសារ និងសហគមន៍ទាំងមូលផងដែរ។
លោក អ៊ុន ចាន់ដា អភិបាល ខេត្តកំពង់ចាម ស្នើដល់មន្ទីរសុខាភិបាល និងអាជ្ញាធរមូលដ្ឋាន សហការជាមួយមេដឹកនាំសាសនា យកចិត្តទុកដាក់ខ្ពស់ ចំពោះសុវត្ថិភាពប្រជាពលរដ្ឋ នៅមូលដ្ឋានមានជំងឺ កូវីដ១៩ ខណៈដែលករណីនេះ កំពុងកើតមាននៅលើទឹកដីខេត្តកំពង់ចាមនោះ ។
ការថ្លែងយ៉ាងដូច្នេះ នៅក្នុងឱកាសដែល លោក អញ្ជើញជាអធិបតី ក្នុងកិច្ចប្រជុំបន្ទាន់ ដើម្បីផ្សព្វផ្សាយសេចក្ដីណែនាំរបស់ក្រសួងមហាផ្ទៃលេខ ០០៣ស.ណ.ន ស្ដីពីការផ្សព្វផ្សាយអំពីវិធានការបង្ការ ទប់ស្កាតការរាតត្បាត នៃជំងឺកូវីដ ១៩ នៅរដ្ឋបាលថ្នាក់ក្រោមជាតិ និងពិភាក្សា ទៅលើពង្រាងដីកា ស្ដីពីការបង្កើតគណៈកម្មការខេត្តប្រយុទ្ធប្រឆាំងនឹងជំងឺនេះ ក្នុងក្របខ័ណ្ឌខេត្តកំពង់ចាម នាព្រឹកថ្ងៃទី២០ ខែមីនា ឆ្នាំ២០២០នេះ ។
លោក អ៊ុន ចាន់ដា មានប្រសាសន៍ថា តាមសេចក្ដីជូនដំណឹងរបស់ក្រសួងសុខាភិបាល កាលពីថ្ងៃទី១៩ ខែមីនានេះ គឺបានរកឃើញ៤ករណីថ្មីទៀត ជាបុរសជនជាតិខ្មែរ ដែលវិលត្រឡប់មកពីចូលរួមពិធីសាសនា នៅប្រទេសម៉ាឡេស៊ី និង ៦ករណីថ្មី ជាបុរសជនជាតិម៉ាឡេស៊ី ដែលវិជ្ជមានវីរុសកូវីដ ១៩។ បុរសជាជនជាតិម៉ាឡេស៊ី ទាំង៦នាក់នោះ បានស្នាក់នៅបណ្ដោះអាសន្ន ក្នុងស្រុកកងមាស ខេត្តកំពង់ចាម ដែលបានមកធ្វើការងារសាសនា នៅតាមភូមិ នៃភូមិសាស្ត្រ ស្រុកកងមាស ខេត្តកំពង់ចាម ។
លោក បញ្ជាក់ថា ជាការឆ្លើយតបទៅនឹងសេចក្ដីណែនាំ របស់ក្រសួងមហាផ្ទៃ យើងត្រូវបង្កើតនូវគណៈកម្មការប្រចាំការ១ក្រុម ដើម្បីដឹកនាំទទួលខុសត្រូវរដ្ឋបាលខេត្ត ដោយមាន នាយករងរដ្ឋបាល១រូប ដើម្បីដឹកនាំមន្ត្រីក្នុងការទទួលព័ត៌មាន រាយការណ៍ជូនគណៈកម្មការ ក៏ដូចជា ក្រសួងមហាផ្ទៃ ផងដែរ ។
ដូច្នេះដើម្បីចូលរួមអនុវត្តនូវសេចក្ដីណែនាំ ក៏ដូចជា ការអនុវត្តនូវវិធានការបង្ការ ទប់ស្កាត់ការឆ្លងរាលដាល នៃជំងឺកូវីដ ១៩ ជាពិសេស កិច្ចការពារដល់សុខសុវត្ថិភាព របស់ប្រជាពលរដ្ឋយើង ស្នើឲ្យមន្ទីរសុខាភិបាលត្រូវចុះទៅពិនិត្យ និងចុះបាញ់ថ្នាំសម្លាប់មេរោគ ទៅលើទីតាំង ដែលជនជាតិម៉ាឡេស៊ីស្នាក់នៅនោះជាបន្ទាន់ ។ត្រូវរៀបចំមន្ត្រីប្រចាំការ នៅតាមមណ្ឌលសុខភាព ដើម្បីក្ដាប់បានព័ត៌មានផ្សេងៗ ពីប្រជាពលរដ្ឋ ដើម្បីរាយការណ៍ជូនខេត្ត ។ ដោយឡែក ឲ្យអាជ្ញាធរក្នុងមូលដ្ឋានត្រូវសហការជាមួយថ្នាក់ដឹកនាំសាសនា ក្នុងខេត្តដើម្បី អប់រំណែនាំដល់ប្រជាពលរដ្ឋដែលជាមុខសញ្ញាបានប៉ះពាល់ជនជាតិម៉ាឡេស៊ី ទាំង ៦នាក់នោះ ឲ្យស្នាក់នៅតាមផ្ទះរៀងៗខ្លួនក្នុងរយៈពេល ១៤ថ្ងៃ ដើម្បីថែទាំសុខភាពខ្លួនឯង ក៏ដូចជា សុវត្ថិភាពក្រុមគ្រួសារ និងសហគមន៍ទាំងមូលផងដែរ។
គួរកត់សម្គាល់ផងដែរថា គិតត្រឹមថ្ងៃទី១៩ ខែមីនា នេះកម្ពុជា មានករណីវិជ្ជមានវីរុសកូវីដ ១៩ សរុបទាំងអស់ចំនួន ៤៧នាក់ ក្នុងនោះ ៖ មានជនជាតិចិន ១នាក់ (បានជាសះស្បើយ) ជនជាតិអង់គ្លេស ០៣នាក់ កាណាដា ១នាក់ ប៊ែលហ្សិក ១នាក់ បារាំង ០២នាក់ ម៉ាឡេស៊ី ១១នាក់ និងខ្មែរ ២៨នាក់ ដែលក្នុងនោះ អ្នកវិលត្រឡប់មកពីការចូលរួមពិធីសាសនា នៅប្រទេសម៉ាឡេស៊ី ចំនួន ២៣នាក់ ៕ដោយ៖កូឡាប