កណ្តាល ៖ដើម្បីពង្រឹងការអនុវត្តវិធានការប្រយុទ្ធ នឹងជំងឺកូវីដ-១៩ ឲ្យមានប្រសិទ្ធភាពខ្ពស់ អាជ្ញាធរខេត្តកណ្តាល ត្រូវផ្អាកជាបណ្ដោះអាសន្ននូវការធ្វើដំណើរឆ្លងកាត់ព្រំដែនចាប់ពី ២៣:៥៩ យប់ ថ្ងៃទី 20 ខែមីនាឆ្នាំ ២០២០នេះ តទៅ។
នៅរសៀលថ្ងៃទី២០ ខែមីនា ឆ្នាំ២០២០នេះ លោក គង់ សោភ័ណ្ឌ អភិបាលនៃគណៈអភិបាលខេត្តកណ្តាល បានដឹកនាំគណៈកម្មការ ចុះត្រួតពិនិត្យដើម្បីប្រយុទ្ធប្រឆាំងនឹងជំងឺ កូវីដ-១៩(covid-19) និងចាត់វិធានការត្រួតពិនិត្យតាមដានជាប្រចាំនៅតាមច្រកទ្វារព្រំដែន ដែលកិច្ចប្រជុំនេះធ្វើនៅទីស្នាក់ការគយ និងរដ្ឋាករជ្រៃធំ ស្រុកកោះធំ។
លោកអភិបាលខេត្តបានបញ្ជាក់ថា ដើម្បីពង្រឹងការអនុវត្តវិធានការប្រយុទ្ធ នឹងជំងឺកូវីដ-១៩ ឲ្យមានប្រសិទ្ធភាពខ្ពស់ អជ្ញាធរត្រូវផ្អាកជាបណ្ដោះអាសន្ននូវការធ្វើដំណើរឆ្លងកាត់ព្រំដែនចាប់ពី ២៣:៥៩ យប់ ថ្ងៃទី 20 ខែមីនាឆ្នាំ ២០២០នេះ តទៅ។ ត្រូវរឹតបន្តឹងការត្រួតពិនិត្យចរាចរណ៍មនុស្ស និងទំនិញដែលឆ្លងកាត់ច្រកទ្វារព្រំដែន ហើយការដឹកជញ្ជូនទំនិញឆ្លងកាត់ព្រំដែននៅតែអនុវត្តធម្មតាដោយគ្មានការរាំងស្ទះ។
លោកអភិបាលក៏បានធ្វើការអំពាវនាវដល់ប្រជាពលរដ្ឋទាំងអស់សូមកុំមានការភ័យខ្លាចចំពោះជំងឺ កូវីដ-១៩នេះ ពីព្រោះជំងឺនេះគឺអាចព្យាបាលបាន ហើយខេត្តក៍បានត្រៀមនូវវិធានការការពារ ទប់ស្កាត់ និងព្យាបាលរួចហើយ នៅតាមមន្ទីរពេទ្យបង្អែកទាំង១១ ក្រុង-ស្រុកក្នុងខេត្ត ។ ឯកឧត្តមបានបន្ថែមថាទោះជាយ៉ាងណាក៏ដោយ សូមប្រជាពលរដ្ឋទាំងអស់ត្រូវមានការប្រុងប្រយ័ត្នខ្ពស់ និងត្រូវចេះធ្វើអនាម័យឲ្យបានជាប្រចាំ។
ក្នុងឱកាសនោះលោកអភិបាល ក៏បានចុះត្រួតពិនិត្យជាក់ស្ដែងផ្ទាល់នៅតាមច្រកទ្វារព្រំដែនជ្រៃធំ-ឡុងប៉ិន រវាងខេត្តកណ្ដាលនៃព្រះរាជាណចក្រកម្ពុជា និងខេត្តអានយ៉ាង នៃសាធារណរដ្ឋសង្គមនិយមវៀតណាមផងដែរ៕ដោយ៖កូឡាប
