ព្រំដែន៖ អគ្គនាយកដ្ឋានអន្តោប្រវេសន៍ បានប្រកាសព័ត៌មានថា ចាប់ពីថ្ងៃទី២១ ខែមីនា ឆ្នាំ២០២០ ប៉ុស្តិ៍នគរបាលច្រកទ្វារព្រំដែន មួយចំនួនឈមនឹងប្រទេសថៃ និងវៀតណាម ត្រូវបានបិទជាបណ្តោះអាសន្ន ដើម្បីអនុវត្តតាមសេចក្តីជូនដំណឹងលេខ ៩០៦ សជណ របស់ក្រសួងមហាផ្ទៃ។
ប៉ុស្តិ៍នគរបាលច្រកទ្វារព្រំដែនអន្តរជាតិព្រំ ចាប់ពីវេលាម៉ោង ៦និង០០នាទី ថ្ងៃទី២១ ខែមីនា ឆ្នាំ២០២០ទៅ សមត្ថកិច្ចថៃ បានធ្វើការបិទច្រកជាស្ថាពរ ទាំងមនុស្ស មធ្យោបាយ ទំនិញចេញ-ចូលគ្រប់ប្រភេទ យោងតាមការជូនដំណឹង របស់អន្តោប្រវេសន៍ថៃ កាលពីថ្ងៃទី២០ ខែមីនា ឆ្នាំ២០២០ វេលាម៉ោង ១៦និង៥០នាទី និងតាមការពិភាក្សាភាគីថៃ និងភាគីកម្ពុជា រវាងអភិបាលខេត្តប៉ៃលិន និងអភិបាលខេត្តច័ន្ទបុរី ប្រទេសថៃ មិនឲ្យដំណើរការទេ គឺត្រូវបិទតាមឯកសារ ដែលសមត្ថកិច្ចអន្តោប្រវេសន៍ថៃ ជូនដំណឹងមកប៉ុស្តិ៍។
ប៉ុស្តិ៍នគរបាលច្រកទ្វារព្រំដែនអន្តរជាតិត្រពាំងស្រែ ចាប់ពីវេលាម៉ោង ២៣និង៥៩នាទី ថ្ងៃទី២០ ខែមីនា ឆ្នាំ២០២០ បានអនុវត្តតាមសេចក្តីជូនដំណឹងលេខ ៩០៦ សជណ របស់ក្រសួងមហាផ្ទៃ ស្តីអំពីការផ្អាកបណ្តោះអាសន្ន នូវការធ្វើដំណើររបស់ពលរដ្ឋកម្ពុជា ទៅកាន់សាធារណរដ្ឋសង្គមនិយមវៀតណាម និងការធ្វើដំណើរចូល ព្រះរាជាណាចក្រកម្ពុជា របស់ប្រជាពលរដ្ឋវៀតណាម។
ដោយឡែកនាវេលាម៉ោង ១០និង០០នាទី ថ្ងៃទី២១ ខែមីនា ឆ្នាំ២០២០ ដោយមានការដឹកនាំពី លោកឧត្តមសេនីយ៍ទោ សំ ដារ៉ា អនុប្រធាននាយដ្ឋានច្រកទ្វារទី២ និងលោកនាយប៉ុស្តិ៍ បានសហការ ជាមួយសាខាគយ និងរដ្ឋាករ ខេត្តក្រចេះ នាយការិយាល័យគយច្រកទ្វារត្រពាំងស្រែ បានត្រួតពិនិត្យគោលដៅផ្លាស់ប្តូរ ក្បាលរថយន្ត ដែលដឹកទំនិញចេញពីវៀតណាម នៅចំណុចបង្គោលព្រំដែនលេខ ៦៩ ការងារពង្រឹង និងត្រួតពិនិត្យបន្ថែម ការអនុវន្តសេចក្តីជូនដំណឹង លេខ ៩០៦ សជណ របស់ក្រសួងមហាផ្ទៃ ស្តីអំពីការផ្អាកបណ្តោះអាសន្ន នូវការធ្វើដំណើររបស់ពលរដ្ឋកម្ពុជា ទៅកាន់សាធារណរដ្ឋសង្គមនិយមវៀតណាម និងការធ្វើដំណើរចូល ព្រះរាជាណាចក្រកម្ពុជា របស់ប្រជាពលរដ្ឋវៀតណាម ។
ស្របពេលជាមួយគ្នានេះដែរ ប៉ុស្តិ៍បានចាត់តាំងមន្ត្រី ឲ្យបិទប្រព័ន្ធគ្រប់គ្រងព្រំដែនកម្ពុជា មួយរយៈខ្លី និងធ្វើអនាម័យទាំងស្រុង ដោយជូតសម្អាត ជាមួយអាល់កុល លើឧបករណ៍ តុ កៅអី សម្ភារ បម្រើឲ្យការងារជំនាញ និងស្នើមន្ត្រីចត្តាឡីស័ក បាញ់ថ្នាំសម្លាប់មេរោគ ក្នុងនិងជុំវិញ បញ្ជរបែបបទ។
ប៉ុស្តិ៍នគរបាលច្រកទ្វារព្រំដែនអន្តរជាតិអូរស្មាច់ នាវេលាម៉ោង ៨និង០០នាទី ថ្ងៃទី២១ ខែមីនា ឆ្នាំ២០២០ លោក ប៉ែន កុសល្យ អភិបាល នៃគណៈអភិបាលខេត្តឧត្តរមានជ័យ បានអញ្ជើញមកត្រួតពិនិត្យ នៅមាត់ច្រកព្រំដែន ព្រមទាំងធ្វើការជួបពិភាក្សា ជាមួយលោក អភិបាលខេត្តសុរិន្ទ ប្រទេសថៃ បន្ទាប់ពីភាគីថៃ បានអនុវត្តតាមការជូនដំណឹង កាលពីថ្ងៃទី២០ ខែមីនា ឆ្នាំ២០២០ គឺតម្រូវឲ្យបិទច្រកព្រំដែន។ ក្នុងកិច្ចពិភាក្សានេះ ភាគីទាំងពីរបានឯកភាពគ្នា គឺសម្រួលជូនដល់ប្រជាពលរដ្ឋ ដែលត្រូវទៅមន្ទីរពេទ្យ ដើម្បីសង្គ្រោះបន្ទាន់។
ប៉ុស្តិ៍នគរបាលច្រកទ្វារព្រំដែនអន្តរជាតិព្រៃវល្លិ៍ នាវេលាម៉ោង ៨និង៣០នាទី ថ្ងៃទី២១ ខែមីនា ឆ្នាំ២០២០ បានទទួលស្វាគមន៍ គណៈប្រតិភូខេត្តស្វាយរៀង ១ក្រុម ដែលមានសមាជិកចំនួន ៣០នាក់ ដឹកនាំដោយ លោក ម៉ែន វិបុល អភិបាល នៃគណៈអភិបាលខេត្តស្វាយរៀង អញ្ជើញមកពិនិត្យ មើលស្ថានភាពជាក់ស្តែង របស់ប៉ុស្តិ៍ច្រកទ្វារព្រំដែនអន្តរជាតិព្រៃវល្លិ៍ និងចូលពិនិត្យមើលអគារទីស្នាក់ការច្រកទ្វារព្រំដែនអន្តរជាតិព្រៃវល្លិ៍ថ្មី។
ការអញ្ជើញចុះមកពិនិត្យនេះ ក៏មានអមដំណើរដោយ លោកស្នងការនគរបាលខេត្ត, លោកមេបញ្ជាការកងរាជអាវុធហត្ថ និងស្ថាប័នពាក់ព័ន្ធមួយចំនួនទៀត ក្នុងខេត្ត៕ដោយ៖កូឡាប