ទីប្រឹក្សាសន្តិសុខរបស់ប្រធានាធិបតី Trump ឧត្តមសេនីយ៍ H.R McMaster បានទៅកាន់ San Francisco យ៉ាងសម្ងាត់ដើម្បីចូលរួមជំនួបបិទទ្វារជុំវិញរឿងកម្មវិធីអាវុធនុយក្លេអ៊ែរកូរ៉េខាងជើង។
Fox News បានដកស្រង់ប្រភពមួយចំនួនឲ្យដឹងថា អង្គប្រជុំនេះបានប្រព្រឹត្តទៅកាលពីចុងសប្តាហ៍មុន។ លោក Mc Master បានជួបជាមួយបណ្តាមន្ត្រីមកពីកូរ៉េខាងត្បូង និងជប៉ុន ក្នុងនោះមាននាយកក្រុមប្រឹក្សាសន្តិសុខជាតិជប៉ុន Shotaro Yachi។
របៀបវារៈទាក់ទងដល់ការដែលកូរ៉េទាំង២ តភ្ជាប់ទំនាក់ទំនង។ ពួកគេឯកភាពគ្នាថា ការព្រមព្រៀងទាំងឡាយពីរឿងប្រតិភូកូរ៉េខាងជើងមកចូលរួមក្នុងព្រឹត្តិការណ៍ Olympic Pyoegchang ប្រព្រឹត្តទៅនៅខែកុម្ភៈ ២០១៨នេះ គឺដើម្បីបង្វែចំណាប់អារម្មណ៍ប៉ុណ្ណោះ ពុំមានប្រសិទ្ធភាពអ្វីចំពោះកម្មវិធីនុយក្លេអ៊ែរ របស់ប្រទេសនេះទេ។
ភាគីទាំង៣ ឯកភាពបន្តបង្កើនសម្ពាធដើម្បីរដ្ឋការលោក Kim Jong-Un បោះបង់មហិច្ឆិតានុយក្លេអ៊ែររបស់ក្រុងព្យុងយ៉ាង។
កាលពីខែមុននៅវេទិការមួយនៅកាលីហ្វ័នីញ៉ា លោក Mc Master លើកឡើងថា ៖ លទ្ធភាពផ្ទុះសង្គ្រាមជាមួយកូរ៉េខាងជើងកំពុងមានកំណើនពី១ថ្ងៃ ទៅ១ថ្ងៃ ប្រសិនបើកម្មវិធីនុយក្លេអ៊ែររបស់ប្រទេសនេះពុំត្រូវបានដោះស្រាយ។
លោក Mc Master ប្រាប់អ្នកកាសែត Bret Baier របស់ Fox News នៅវេទិការសន្តិសុខការពារជាតិ Reagan នាកាលីហ្វ័រនីញ៉ាថា ៖ “ខ្ញុំគិតថា វាកំពុងលេចឡើងពីមួយថ្ងៃទៅមួយថ្ងៃ។ មានន័យថា យើងកំពុងស្ថិតក្នុងការប្រណាំងប្រជែងមួយ។ យើងខ្ញុំកំពុងស្ថិតក្នុងការប្រកួតប្រជែងមួយ ដើម្បីដោះស្រាយបញ្ហានេះ៕ សូយន
