ខេត្តស្វាយរៀងៈ អភិបាលខេត្តស្វាយរៀង បានស្នើដល់កងកម្លាំង មន្ត្រីគយ និងរដ្ឋាករ មន្ត្រីចត្តាឡីស័ក និងមន្ត្រីមានសមត្ថកិច្ច ដែលឈរជើងនៅច្រកទ្វារព្រំដែនអន្តរជាតិព្រៃវល្លិ៍ទាំងអស់ ត្រូវយកចិត្តទុកដាក់ អនុវត្តឲ្យបានម៉ឺងម៉ាត់ ស្របតាមការណែនាំរបស់រាជរដ្ឋាភិបាល ក្រសួងមហាផ្ទៃ ក៏ដូចជារដ្ឋបាលខេត្តពាក់ព័ន្ធ ការដឹកជញ្ជូនទំនិញនិងការធ្វើដំណើរចេញចូល ឆ្លងកាត់ព្រំដែន អន្តរជាតិព្រៃវល្លិ៍-ប៊ិនហៀប ។
លោក ម៉ែន វិបុល អភិបាល ខេត្តស្វាយរៀង និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ ខេត្តស្វាយរៀងនាព្រឹកថ្ងៃទី២១ ខែមីនា ឆ្នាំ២០២០នេះ បានដឹកនាំក្រុមការងារខេត្ត ដែលមានការចូលរួមពីលោកអភិបាលរងខេត្ត លោកស្នងការនគរបាលខេត្ត លោកមេបញ្ជាការកងរាជអាវុធហត្ថខេត្ត និងលោកប្រធានមន្ទីរជំនាញពាក់ព័ន្ធ ចុះពិនិត្យពីស្ថានភាព នៃការគ្រប់គ្រងនិងការពង្រឹង កិច្ចអនុវត្តវិធានការបង្ការទប់ស្កាត់ ការរីករាលដាល នៃជំងឺកូវីដ-១៩ នៅច្រកទ្វារព្រំដែនអន្តរជាតិព្រៃវល្លិ៍-ប៊ិនហៀប ស្ថិតនៅឃុំថ្មី ស្រុកកំពង់រោទិ៍ ខេត្តស្វាយរៀង ។
ក្នុងឱកាសនោះ លោកអភិបាលខេត្ត បានមានប្រសាសន៍ ថ្លែងនូវការកោតសរសើរចំពោះសមត្ថកិច្ច និងមន្ត្រីជំនាញពាក់ព័ន្ធទាំងអស់ ដែលឈរជើងនៅច្រកទ្វារព្រំដែនអន្តរជាតិព្រៃវល្លិ៍ កន្លងមក បានខិតខំអនុវត្តតួនាទី ក្នុងការការពារសន្តិសុខ សុវត្ថិភាព សណ្ដាប់ធ្នាប់ព្រំដែន និងការពង្រឹងកិច្ចសហប្រតិបត្តិការល្អប្រសើរ ជាមួយនឹងភាគីវៀតណាម ។
លោកអភិបាលខេត្ត ក៏បានជម្រាបជូនអំពីវិធានការ របស់រាជរដ្ឋាភិបាល ក្រសួងមហាផ្ទៃ ក៏ដូចជារដ្ឋបាលខេត្ត បានដាក់ចេញនាពេលថ្មីៗនេះ ដោយតម្រូវឲ្យផ្អាកជាបណ្ដោះអាសន្ន នូវការធ្វើដំណើរចូលប្រទេសកម្ពុជា ដោយប្រជាពលរដ្ឋវៀតណាម និងការធ្វើដំណើរចូលប្រទេសវៀតណាម ដោយពលរដ្ឋកម្ពុជា តាមគ្រប់រូបភាព ដែលបានចូលជាធរមានរួចហើយ កាលពីវេលាម៉ោង ២៣និង៥៩នាទី យប់ថ្ងៃទី២០ ខែមីនា ឆ្នាំ២០២០ ហើយដែលវិធានការនេះ ធ្វើឡើងគ្មានអ្វីក្រៅពីគោលបំណង បញ្ចៀសនូវការរីករាលដាល នៃជំងឺកូវីដ-១៩ ដែលបច្ចុប្បន្នបានក្លាយជារបៀបវារៈរួម របស់ពិភពលោក តំបន់ ក៏ដូចជាប្រទេសទាំងពីរកម្ពុជា-វៀតណាម ដែលត្រូវរួមគ្នាដោះស្រាយ និងប្រយុទ្ធប្រឆាំងនឹងជំងឺឆ្លងប្រភេទថ្មីនេះ ។
ទន្ទឹមនេះក្នុងនាមជាអភិបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ ខេត្ត លោកអភិបាលខេត្ត បានស្នើដល់កងកម្លាំង មន្ត្រីគយ និងរដ្ឋាករ មន្ត្រីចត្តាឡីស័ក និងមន្ត្រីមានសមត្ថកិច្ច ដែលឈរជើងនៅច្រកទ្វារព្រំដែនអន្តរជាតិព្រៃវល្លិ៍ទាំងអស់ ត្រូវយកចិត្តទុកដាក់ អនុវត្តឲ្យបានម៉ឺងម៉ាត់ ស្របតាមការណែនាំរបស់រាជរដ្ឋាភិបាល ក្រសួងមហាផ្ទៃ ក៏ដូចជារដ្ឋបាលខេត្តពាក់ព័ន្ធ នឹងការធ្វើដំណើរចេញចូល ឆ្លងកាត់ព្រំដែន រវាងប្រជាពលរដ្ឋប្រទេសទាំងពីរ ដោយឡែកចំពោះការដឹកជញ្ជូនទំនិញឆ្លងកាត់ព្រំដែនរួម ត្រូវសម្របសម្រួលជាមួយភាគីវៀតណាម ដើម្បីសម្រួល និងរក្សាឲ្យបាននូវស្ថិរភាពលំហូរចរាចរទំនិញនាំចេញ-នាំចូល ឆ្លងកាត់ព្រំដែន រវាងប្រទេសទាំងពីរ ឲ្យប្រព្រឹត្តទៅដោយរលូន ល្អប្រសើរ និងក្រោមការយកចិត្តទុកដាក់ខ្ពស់ ក្នុងការសហការរួមគ្នាពង្រឹងកិច្ចអនុវត្តវិធានការ បង្ការទប់ស្កាត់ការរីករាលដាល នៃជំងឺកូវីដ-១៩ ស្របតាមវិធានការការពារ ដែលណែនាំដោយចត្តាឡីស័ក ដូចជាការបាញ់ថ្នាំកម្ចាត់មេរោគ លើរថយន្តដឹកទំនិញជាដើម ហើយលោកអភិបាលខេត្ត នឹងចាត់មន្ត្រីចត្តាឡីស័ក និងមន្ត្រីបសុពេទ្យ មកប្រចាំការរហូតដល់ស្ថានភាព នៃជំងឺកូវីដ-១៩ មានភាពធូរស្រាល ដើម្បីចូលរួមពង្រឹងអនុវត្តនូវវិធានការនេះ ៕ដោយ៖ វ៉ៃកូ
