ភ្នំពេញ ៖ ក្រសួងមហាផ្ទៃ បង្កើតគណៈកម្មការ បង្ការនិងទប់ស្កាត់ ការឆ្លងជំងឺកូវីដ -១៩ ( Covid-19 )ដែល មានសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ជាប្រធាន និងមានសមាសភាព អនុប្រធាន ចំនួន ១៨ រូប សមាជិក ចំនួន ១៦ រូប ។
បើតាមប្រកាសរបស់ក្រសួងមហាផ្ទៃ កាលពីថ្ងៃសុក្រ ទី២០ ខែមីនា ឆ្នាំ២០២០ បានឲ្យដឹងថា លោកនាយឧត្តមសេនីយ៍ មៀច សុផាន់ណា រដ្ឋលេខាធិការ ក្រសួងមហាផ្ទៃ និងជាប្រធានគណៈកម្មាធិការប្រយុទ្ធប្រឆាំង ផលិតផលក្លែងក្លាយ (គ.ប.ផ.ក .) ជាអនុប្រធាន និងលោកសេនីយ៍ឯក លីវ សុផាណារិទ្ធ ប្រធានលេខាធិការដ្ឋាន នៃ គ.ប.ផ.ក . ជាសមាជិក នៃគណៈកម្មការ បង្ការ និងទប់ស្គាត់ ការឆ្លងជំងឺកូវីដ-១៩ ( Covid -19 ) នៃក្រសួងមហាផ្ទៃផងដែរ ។
តាមសេចក្ដីសម្រេចរបស់ ក្រសួងមហាផ្ទៃ ស្ដីពី ការបង្កើតគណៈកម្មការបង្ការ និងទប់ស្កាត់ការឆ្លងជំងឺ កូវីដ-១៩ នៃក្រសួងមហាផ្ទៃ ចេញផ្សាយកាលពីថ្ងៃទី២០ ខែមីនា ឆ្នាំ២០២០ ថា គណៈកម្មការនេះមានតួនាទី ភារកិច្ចដូចខាងក្រោម ៖
ទី១-រៀបចំផែនការសកម្មភាពរបស់ក្រសួងមហាផ្ទៃ តាមគោលការណ៍ណែនាំរបស់រាជរដ្ឋាភិបាល និងក្រសួងសុខាភិបាល ដើម្បីចូលរួមការបង្ការ និងទប់ស្កាត់ការឆ្លងជំងឺ កូវីដ-១៩។
ទី២-ផ្សព្វផ្សាយគោលការណ៍ណែនាំរបស់រាជរដ្ឋាភិបាលកម្ពុជា និងក្រសួងសុខាភិបាល ដល់ថ្នាក់ដឹកនាំ មន្ដ្រីរាជការស៊ីវិល និងនគរបាលជាតិ ក្រសួងមហាផ្ទៃទាំងអស់ ដើម្បីចូលរួមបង្ការ និងទប់ស្កាត់ការឆ្លងនៃជំងឺ កូវីដ-១៩។
ទី៣-តាមដាន ត្រួតពិនិត្យ និងវាយតម្លៃ ការអនុវត្តផែនការសកម្មភាពរបស់ក្រសួងមហាផ្ទៃ ក្នុងការចូលរួមបង្ការ និងទប់ស្កាត់ការឆ្លងនៃជំងឺ កូវីដ-១៩។
ទី៤-បំពេញតួនាទីភារកិច្ចតាមជំនាញរបស់ក្រសួងមហាផ្ទៃ ដើម្បីចូលរួមគាំទ្រដល់វិធានការនានារបស់រាជរដ្ឋាភិបាលកម្ពុជា ក្នុងការប្រយុទ្ធនឹងជំងឺ កូវីដ-១៩។
និងទី៥-បំពេញការងារចាំបាច់ផ្សេងៗទៀតទៅតាមស្ថានភាពវិវត្តន៍ នៃការរីករាលដាលជំងឺ កូវីដ-១៩ នៅក្នុងព្រះរាជាណាចក្រកម្ពុជា៕ដោយ៖កូឡាប
ខាងក្រោមនេះ ជាខ្លឹមសារសេចក្ដីសម្រេចរបស់ ក្រសួងមហាផ្ទៃ ៖