ភ្នំពេញ ៖ លោកទេសរដ្ឋមន្ត្រី អូស្មាន ហាស្សាន់ បានថ្លែងប្រាប់អ្នកសារព័ត៌មានថា បងប្អូនជនជាតិខ្មែរឥស្លាម ដែលបានត្រឡប់មកពីចូលរួមក្នុងពិធីសាសនា នៅក្នុងប្រទេសម៉ាឡេស៊ី ចំនួន៧៩នាក់ ធ្វើតេស្តរកវីរុសកូវីដ-១៩ អស់ហើយ ហើយចេញលទ្ធផលផ្លូវការវិជ្ជមានចំនួន២៣នាក់ ។ ចំណែកឯសាច់ញាតិបងប្អូនខ្មែរឥស្លាម ចំនួន៣០០នាក់ផ្សេងទៀត ដែលមានការប្រាស្រ័យទាក់ទងគ្នាជាមួយបងប្អូនខ្មែរឥស្លាមទាំង៧៩នាក់ ក៏បានទៅពិនិត្យសុខភាពស្វែងរកវីរុសកូវីដ១៩ ក្នុងនោះមាន៥នាក់ មានលទ្ធផលវិជ្ជមាន។
ថ្លែងក្នុងសន្និសីទសារព័ត៌មាន ស្ដីពីការរីករាលដាលនៃជំងឺឆ្លងដែលបង្កឡើងដោយវីរុស Covid-19 និងផលប៉ះពាល់មកលើសហគមន៍ឥស្លាមកម្ពុជា នារសៀលថ្ងៃទី២១ ខែមីនា ឆ្នាំ២០២០ លោក ទេសរដ្ឋមន្ត្រី អូស្មាន ហាស្សាន់ ទទួលបន្ទុកបេសកកម្មពិសេស បានមានប្រសាសន៍ថា បងប្អូនខ្មែរឥស្លាម ៧៩ នាក់ដែលបានត្រឡប់ មកពីចូលរួមក្នុងពិធីសាសនា នៅប្រទេសម៉ាឡេស៊ី ត្រូវបានរក្សាទុកឱ្យមួយកន្លែង ដើម្បីធ្វើការពិនិត្យ និងចៀសវាងការឆ្លងទៅអ្នកដទៃ ហើយរកឃើញលទ្ធផលវិជ្ជមានលើបងប្អូនខ្មែរឥស្លាមចំនួន២៣នាក់។ លោកបានបញ្ជាក់ថា “៧៩នាក់ ដែលចេញមកពី៩ រាជធានី ខេត្ត គឺបានទៅធ្វើតេស្ដទាំងអស់ហើយ ហើយពួកគាត់ត្រូវបានថែទាំដោយមន្ទីរសុខាភិបាលនានា ក៏ដូចជាបណ្តាញពេទ្យដែលនៅប្រចាំការទាំងអស់ បានថែរក្សាយពួកគាត់ ឲ្យនៅនឹងមួយកន្លែង ហើយក្នុងអ្នកជាប់ទាំង២៣នាក់ គឺបាននៅសម្រាលព្យាបាលនៅមន្ទីរពេទ្យហើយ ដោយមានការយកចិត្តទុកដាក់ខ្ពស់បំផុត របស់ក្រសួងសុខាភិបាលផងដែរ”។
លោកទេសរដ្ឋមន្ដ្រី បានស្នើសុំកុំឱ្យមានការរើសអើងលើបងប្អូនខ្មែរឥស្លាម ព្រោះមិនថាជនជាតិណានោះទេ ត្រូវរស់នៅមានសុខសន្តិភាពដូចគ្នា ទាំងអស់ ហើយបងប្អូនខ្មែរឥស្លាម ក៏ដូចជាជនជាតិខ្មែរផងដែរ ព្រោះថាបានចូលរួម ជាមួយប្រជាជនខ្មែរ ជាយូរណាស់មកហើយ ។ លោកបានបន្ដថា ថ្នាក់ដឹកនាំខ្មែរឥស្លាម ក៏បានហាមឃាត់ចំពោះជនជាតិខ្មែរឥស្លាមទាំងអស់ថា បើកន្លែងនោះមានគ្រោះថ្នាក់ និងជំងឺណានោះ មិនអនុញ្ញាតទៅចូលរួមនោះទេ។ បងប្អូនខ្មែរឥស្លាម ដែលបានទៅចូលរួមក្នុងពិធីសាសនា នៅប្រទេសម៉ាឡេស៊ី ចំនួន៧៩នាក់នោះ មិនបានដឹងភ្លាមៗនោះទេថា មានជំងឺកូវីដ-១៩ ប៉ុន្តែនៅពេលដែលម៉ាឡេស៊ី ផ្ទុះ ក៏មានការស្រាវជ្រាវ ពីបងប្អូនខ្មែរឥស្លាមដែលត្រឡប់មកកម្ពុជា ទើបដឹងថា អ្នកទាំងនេះបានឆ្លងជំងឺកូវីដ-១៩ នេះតែម្តង។ ទន្ទឹមនេះ បងប្អូនទាំង៧៩នាក់នេះ គឺបានពិនិត្យរួចអស់ហើយ ចំណែកប្រពន្ធ កូនដែលរស់នៅជាមួយ ក៏បានពិនិត្យមើលអស់ដែរ ហើយអ្នកដែលប្រាស្រ័យ ជាមួយពួកគាត់នោះនៅមិនបានធ្វើការពិនិត្យ តែក៏មិនយឺតដែរ។
លោក អូស្មាន ហាស្សាន់បានបន្ថែមទៀតថា តើតាមព័ត៌មានដែលលោកទទួលបាន គឺមានបងប្អូនខ្មែរយើងដែលធ្វើតេស្តទី១ រកឃើញមានផ្ទុកវីរុស COVID-19 នេះ គឺពួកគាត់មានសុខភាពល្អធម្មតា ដែលមានបងប្អូនខ្លះរកមិនឃើញផ្ទុកវីរុសនេះក៏មានដែរ ក៏ប៉ុន្តែបើតាមក្បូនវេជ្ជសាស្ត្រ គឺក្រុមគ្រូពេទ្យថែរក្សាជនសង្ស័យជាប់ព័ន្ធនឹងអ្នកមានជំងឺនេះ រហូតដល់១៤ថ្ងៃ ដើម្បីបញ្ជាក់ថាគ្មាន ឬមិនផ្ទុកវីរុស COVID-19 នេះ។
លោកទេសរដ្ឋមន្ដ្រី បានបញ្ជាក់ថា ការឆ្លងវីរុស COVID-19 មិនរើសអើងថា ជាតិសាសន៍ណានោះទេ ដូច្នេះហើយគ្មានអ្នកណាម្នាក់ចង់កើតនោះទេ។ ប្រសិនបើមានអ្នកកើតហើយ យើងត្រូវចូលរួមលើកទឹកចិត្ត អ្នកទាំងអស់នោះ កុំឲ្យអស់សង្ឃឹម និងដើម្បីឆាប់ជាសះស្បើយឡើងវិញ។ កន្លងទៅនេះ មានបងប្អូនយើងខ្លះ បានយកឱកាសវាយប្រហារគ្នា ប៉ុន្ដែពេលនេះ អ្វីដែលសំខាន់ គឺយើងរួមចំណែកការពារនូវជំងឺនេះ កុំឲ្យមានការរីករាលដាល ហើយធ្វើម៉េចដើម្បីឲ្យជនដែលកើតជំងឺនេះ គាត់នៅតែកក់ក្ដៅថា គាត់ពុំមានការរើសអើងពីអ្នកភូមិ ពុំមានការរើសអើងពីក្រុមគ្រួសារជិតខាង ហើយពុំមានការរើសអើង ពីបណ្ដាប្រជាជាតិ។ អ្វីដែលសំខាន់នៅពេលនេះ គឺរួមគ្នា ការពារ រក្សាអនាម័យ ដើម្បីចូលរួមទប់ស្កាត់ការរីករាលដាល នៃវីរុស COVID-19 ។
លោកទេសរដ្ឋមន្ដ្រី បានបញ្ជាក់ថា ចាប់ពីពេលនេះតទៅ ប្រជាពលរដ្ឋទាំងអស់ នៅក្នុងប្រទេសកម្ពុជា មិនថាតែសាសនាណានោះទេ នឹងមានការយោគយល់ បញ្ឈប់ការរើសអើង ដើម្បីរួមគ្នារក្សាសុខសន្ដិភាព ក្រោមម្លប់សន្ដិភាព៕ដោយ៖បញ្ញាស័ក្តិ