ភ្នំពេញ ៖ ក្រសួងសុខាភិបាល នៅថ្ងៃទី២១ ខែមីនា ឆ្នាំ២០២០នេះ បានប្រកាសឱ្យដឹងថា បានរកឃើញអ្នកឆ្លងជំងឺកូវីដ១៩ (COVID-19) ថ្មី លើជនជាតិបារាំងចំនួន២នាក់បន្ថែមទៀត នៅព្រះសីហនុ ដែលធ្វើឱ្យចំនួនអ្នកឆ្លងសរុបនៅក្នុងប្រទេសកម្ពុជា បានកើនដល់៥៣នាក់ហើយ។
បើតាមសេចក្តីប្រកាសព័ត៌មានរបស់ក្រសួងសុខាភិបាល បានបញ្ជាក់ថា ស្ត្រីជនជាតិអង់គ្លេសអាយុ៦៥ឆ្នាំ ដែលកំពុងព្យាបាលជំងឺនៅមន្ទីរពេទ្យរ៉ូយ៉ាល់រតនៈ ត្រូវបានធ្វើតេស្តអវិជ្ជមានចំនួន២ដង ហើយគ្រូពេទ្យ នឹងអនុញ្ញាឲ្យគាត់ចាកចេញពីមន្ទីរពេទ្យនៅថ្ងៃស្អែកនេះ។
នៅខេត្តព្រះសីហនុ ៖ ២ករណីជាជនជាតិបារាំង គឺបុរសម្នាក់អាយុ៦៧ឆ្នាំ និងបុរសម្នាក់ទៀតអាយុ៨០ឆ្នាំ ស្នាក់នៅសណ្ឋាគារក្នុងព្រះសីហនុ ទាំងអស់គ្នា ជាភ្ញៀវទេសចរមកដល់ខេត្តព្រះសីហនុ នៅថ្ងៃទី១៨ខែមីនាឆ្នាំ២០២០ ហើយគ្រោងវិលត្រឡប់ទៅវិញនៅថ្ងៃទី២១ខែមីនានេះ។ បុរសទាំង២នាក់នេះ ត្រូវបានដាក់ឲ្យព្យាបាលនៅមន្ទីរពេទ្យខេត្តព្រះសីហនុ៕ដោយ៖កូឡាប