ភ្នំពេញ៖ ស្ថានឯកអគ្គរាជទូតកម្ពុជា ប្រចាំទីក្រុងបាងកក បានប្រកាសថា សារព័ត៌មាន Amarin News របស់ថៃ បានចុះផ្សាយ ព័ត៌មានពាក់ព័ន្ធនឹងការវិលត្រឡប់ របស់បងប្អូនពលរដ្ឋខ្មែរ ក្នុងអំឡុងបុណ្យចូលឆ្នាំខ្មែរ គឺខុសន័យទាំងស្រុង ហើយសារព័ត៌មាន Amarin News របស់ថៃ បានកែតម្រូវ និងសូមទោស។ ស្ថានទូតកម្ពុជា បានបញ្ជូនលិខិតតវ៉ា និងស្នើឲ្យមានការកែសម្រួលសារព័ត៌មាន ដែលបានចុះផ្សាយក្នុងផេកនេះ។
ស្ថានឯកអគ្គរាជទូតកម្ពុជា ប្រចាំទីក្រុងបាងកក (Royal Embassy of Cambodia in Bangkok) នៅយប់ថ្ងៃទី២១ ខែមីនា ឆ្នាំ២០២០ បានចេញប្រកាសព័ត៌មានមួយថា នៅថ្ងៃទី២១ ខែមីនា ឆ្នាំ២០២០ សារព័ត៌មាន Amarin News របស់ថៃ បានកែតម្រូវ និងសូមទោស ដែលបានដកស្រង់ពីអត្ថបទរបស់សារព័ត៌មាន Khmer Times (បានចុះផ្សាយពីការជូនដំណឹងរបស់ស្ថានទូត) និងបកប្រែយកទៅចុះបន្តខុសពីអត្ថន័យដើមទាំងស្រុង ចំពោះព័ត៌មានពាក់ព័ន្ធនឹងការវិលត្រឡប់ របស់បងប្អូនពលរដ្ឋខ្មែរ ក្នុងអំឡុងបុណ្យចូលឆ្នាំខ្មែរ បន្ទាប់ពីស្ថានទូតបានបញ្ជូនលិខិតតវ៉ា និងស្នើឲ្យមានការកែសម្រួលសារព័ត៌មាន ដែលបានចុះផ្សាយក្នុងផេកនេះ”។
ស្ថានឯកអគ្គរាជទូតកម្ពុជា ប្រចាំប្រទេសថៃ បានបញ្ជាក់ថា ក្នុងឱកាសនៃពិធីបុណ្យចូលឆ្នាំខ្មែរខាងមុខនេះ សូមបងប្អូនពលករ សិស្ស និស្សិត និងអាជីវករ ដែលកំពុងសិក្សា ធ្វើការ និងរស់នៅក្នុងប្រទេសថៃ មេត្តាចូលរួមសហការជាមួយប្រទេសម្ចាស់ផ្ទះ(ថៃ) បើមិនមានភាពចាំបាច់ សូមមេត្តាចៀសវាងការធ្វើដំណើរចេញពីប្រទេសថៃ ដើម្បីចូលរួមចំណែកក្នុងការបង្ការ និងទប់ស្កាត់ការរាតត្បាតនៃជំងឺទាំងនេះ។ ទន្ទឹមនេះដែរ បងប្អូនពលរដ្ឋខ្មែរ ដែលមានបំណងចូលមកប្រទេសថៃ សូមមេត្តាតាមដានព័ត៌មាន ស្តីពីវិធានការនានា របស់ប្រទេសទាំង២ ឲ្យបានច្បាស់លាស់ និងពិចារណាឲ្យហ្មតចត់ មុនសម្រេចធ្វើដំណើរ៕ដោយ៖កូឡាប