គិតត្រឹមថ្ងៃទី២១ ខែមីនា ឆ្នាំ២០២០ ម្សិលមិញនេះ តួលេខ Covid-19 បន្ថែម២ករណីទៀត (៥១+២) កើនឡើងសរុបចំនួន ៥៣ នាក់ ហើយ ។ ទន្ទឹមនេះ ក្រសួងសុខាភិបាលក៏បានណែនាំពលរដ្ឋខ្មែរមានការប្រុងប្រយ័ត្នខ្ពស់ ដោយអនុវត្តវិធានការការពារការឆ្លង និងទប់ស្កាត់ការរីករាលដាលនៃវីរុស Covid-19 ជាមួយការពាក់ម៉ាស់នៅទីសាធារណៈ លាងដៃនឹងឲ្យស្អាតជាពិសេសជាមួយទឹកអាល់កុលម ។
យ៉ាងណាមិញ ស្របពេលដែលសាលារៀន រោងភាពយន្ត ក្លឹបកម្សាន្ត និងហាងខារ៉ាអូខេ KTV ជាដើម ត្រូវបានបិទទូទាំងប្រទេសនោះ គេក៏សង្កេតឃើញថា កម្មពិធីផ្សេងៗ ជាពិសេសមង្គលការមួយចំនួននៅទីក្រុងភ្នំពេញ ត្រូវបានរំសាយ ឬ លុបចោលទៅវិញជាហូរហែ ដើម្បីចូលរួមទប់ស្កាត់ការរីករាលដាលនៃវីរុសកូវីដ-១៩ តាមការណែនាំរបស់រាជរដ្ឋាភិបាល ។
ទោះយ៉ាងណា ក៏នៅមានកម្មពិធីបុណ្យ ឬ ពិធីមង្គលការដទៃទៀត នៅតែបន្តធ្វើជាធម្មតា បើទោះជាមិនរំពឹងថាមានភ្ញៀវមកចូលរួមច្រើនយ៉ាងណាក៏ដោយ ។ ដោយឡែក សម្រាប់មង្គលការមួយគូនេះវិញ បានធ្វើឲ្យមានការភ្ញាក់ផ្អើល និងមើលទៅគួរឲ្យស្រណោះជាខ្លាំង ខណៈបានឃើញកូនកំលោះកូនក្រមុំ និងអ្នកកំដរទាំងសងខាង តម្រូវឲ្យពាក់ម៉ាស់គ្រប់ៗគ្នាតែម្តង ។ មែនហើយ គ្រប់គ្នាជាពិសេសគូស្វាមីភរិយា គឺពិតជាចង់ឃើញនូវរូបសម្រស់ពិសេសមុខមាត់របស់ខ្លួនខ្លាំងណាស់ ថាតើសម្រស់ស្អាតយ៉ាងណា ពេលតប់តែងជាកូនកំលោះក្រមុំ ព្រោះថាមួយជាតិមានឱកាសការម្តង។ តែជាអកុសល Covid-19 បានធ្វើឲ្យពួកគេមានការសោកស្តាយ និងចងចាំថ្ងៃនេះពុំអាចបំភ្លេចបាន ។
ទោះយ៉ាងណា មានសំណួរមួយបានចោទឡើងថា ហេតុអ្វីតម្រូវឲ្យពាក់ម៉ាស់តែកូនកំលោះកូនក្រមុំ និងអ្នកកំដរ ហាក់ដូចជាពួកគេជាអ្នកផ្ទុកជំងឺកូវីដ-19 អ៊ីចឹង ខណៈអ្នកផ្សេងជាពិសេសសាច់ញាតិ ឬ ភ្ញៀវចូលរួម ពុំត្រូវបានឃើញពាក់ម៉ាស់នោះទេ ឬ មួយពួកគាត់ស្ម័គ្រពាក់ដើម្បីឲ្យប្លែក? ៕ ដោយ៖ លឹម ហុង
