កោះកុង៖ ឧកញ៉ា ហ៊ុន ជា បានសរសេរសារនៅគណនីហ្វេសប៊ុកផ្លូវថា បុរសម្នាក់បានឲ្យឪឡឹកទៅលោកឧកញ៉ា ហើយទោះខ្ញុំជូនលុយគាត់យ៉ាងណាក៏គាត់មិនទទួល ប៉ុន្តែមួយសន្ទុះក្រោយមក គាត់ក៏បានបើករថយន្តដឹកឪឡឹកចេញទៅ ហើយក៏ជួបគ្រោះថ្នាក់ចរាចរណ៍បណ្តាលឲ្យស្លាប់ ចំណែកកូនស្រីរបស់គាត់របួសធ្ងន់ ។
ឧកញ៉ា ហ៊ុន ជា បញ្ជាក់បន្ថែមថា អ្នកបើកបររថយន្តបង្ក បើកដោយមានសារធាតុស្រវឹងក្នុងខ្លួន បានបើកទៅបុករថយន្ដដឹកឱឡឹករបស់គាត់ បណ្ដាលឲ្យគាត់ស្លាប់នៅនឹងកន្លែង ហើយចំណែកកូនស្រីរបស់គាត់, ខ្ញុំបានបញ្ជូនគាត់ទៅមន្ទីរពេទ្យខេត្តកោះកុង ហើយដោយរបួសធ្ងន់ពេក ក៏បានស្លាប់ ហើយបានដឹកសពយកទៅតម្កលទុកនៅវត្តត្រពាំងរូង។
បើតាមខ្លឹមសារក្នុងផេករបស់ឧកញ៉ា ហ៊ុន ជា កាលពីថ្ងៃទី២១ខែមីនា បានបញ្ជាក់ថា “ក្តុកក្តួលក្នុងចិត្តជីវិតពិតជាមិនទៀងទាត់ទេ។ តាមផ្លូវដើម្បីនាំយកមូលនិធិ ” ចែករំលែកក្ដីស្រឡាញ់ ” មកជូនបងប្អូននៅក្នុងខេត្តកោះកុង, ខ្ញុំបានជួបអ៊ុំប្រុសម្នាក់ ជាមួយកូនស្រី ដោយធ្វើដំណើរដឹកឪឡឹកយកទៅលក់, …….វាហាក់ថ្មីពេក និងឆាប់ពេកហើយ!!!!….។ គាត់បានឲ្យឪឡឹកមកខ្ញុំ ហើយទោះខ្ញុំជូនលុយគាត់យ៉ាងណា ក៏គាត់មិនទទួល ទាំងដែលគាត់អត់ស្គាល់ថាខ្ញុំជាពីណាគេទៀត។ តែដោយអកុសល, គាត់បានបើកចេញពីខ្ញុំបានតែមួយសន្ទុះសោះ ស្រាប់តែមានឡាន Vigo ពាក់ផ្លាកលេខ ភ្នំពេញ 2AB-8079 បើកបរដោយមានសារធាតុស្រវឹងក្នុងខ្លួន បានបើកទៅបុករថយន្ដដឹកឱឡឹករបស់គាត់ បណ្ដាលឲ្យគាត់ស្លាប់នៅនឹងកន្លែង ហើយចំណែកកូនស្រីរបស់គាត់, ខ្ញុំបានបញ្ជូនគាត់ទៅមន្ទីរពេទ្យខេត្តដែរ តែដោយរបួសក្មួយស្រីធ្ងន់ធ្ងរពេក ក៏បានស្លាប់នៅមន្ទីរពេទ្យទៀត។ ពិតជាគួរឲ្យសង្វេកណាស់”។
លោកឧកញ៉ា បានបញ្ជាកបន្ថែមទៀតថា ឥឡូវខ្ញុំបានឲ្យគេដឹកសាកសពគាត់ទាំងពីរនាក់ យកមកដាក់នៅវត្តត្រពាំងរូង ទុកធ្វើបុណ្យតាមប្រពៃណី។ សម្រាប់ថវិកាដឹកសាកសព និងបូជាតាមប្រពៃណី ខ្ញុំនឹងជួយដល់ពួកគាត់ទាំងអស់។ សូមវិញ្ញាណក្ខន្ធរបស់អ៊ុំប្រុស និងក្មួយស្រីបានទៅកាន់សុគតិភពចុះ។
បើតាមលោកឧកញ៉ា សូមបងប្អូនមានសមត្ថកិច្ចចាប់ជនបង្កនេះ មកទទួលខុសត្រូវចំពោះមុខច្បាប់ឲ្យបាន ហើយខ្ញុំនឹងតាមរឿងនេះ ព្រោះពួកគាត់ដូចជាមានជីវភាពលំបាកណាស់។ សូមបងប្អូនបើកបរដោយមានការទទួលខុសត្រូវ ព្រោះជីវិតមនុស្ស មិនអាចវិលល្ងាចវិញទេ។
បើតាមរបាយការណ៍នគរបាលមូលដ្ឋាន បានបញ្ជាក់ថា នៅថ្ងៃទី២១ ខែមីនា ឆ្នាំ២០២០ វេលាម៉ោង១៨និង១៥ នាទីយប់នៅចំណុចអូរត្រើងរនោង ស្ថិតក្នុងភូមិគគីរជ្រុំ ឃុំឫស្សីជ្រុំ ស្រុកថ្មបាំង ខេត្តកោះកុង មានករណីគ្រោះថ្នាក់ចរាចរណ៍ រវាងរថយន្ត និង រថយន្ត បណ្តាលឲ្យមនុស្សស្លាប់ចំនួន២នាក់ ទី១ ឈ្មោះ ភោគ គឹមស៊ ភេទប្រុស អាយុ៧៣ឆ្នាំ ទីលំនៅភូមិស្វាយជួ ឃុំទឹកវិល ស្រុកស្អាង ខេត្តកណ្តាល ២ ឈ្មោះ ភោគ ស្រីពៅ ភេទស្រី អាយុ១៧ឆ្នាំ ជាកូន រងរបួស ទៅដល់មន្ទីរខេត្តក៏បានស្លាប់។
រថយន្តតូរីស ពណ៌សម្បកឪឡឹក ស្លាកលេខ ឆ, 2318 ភព2។ រថយន្ត ម៉ាក វីហ្គោ ពណ៌ទឹកប្រាក់ ផ្លាកលេខ ភ្នំពេញ 2AB 8079 ម្ចាស់រត់គេចខ្លួន។ ករណីនេះ សមត្ថកិច្ចយើង បានទំនាក់ទំនងក្រុមគ្រួសារ ដើម្បីមកទទួលសាកសព យកទៅធ្វើបុណ្យ ចំពោះរថយន្តសមត្ថកិច្ចយើង យករមករក្សាទុកនៅ អធិការដ្ឋាន ដើម្បីដោះស្រាយទៅតាមផ្លូវច្បាប់៕ដោយ៖បញ្ញាស័ក្តិ
