ព្រះសីហនុ៖ បើតាមផេកប្រជាជន ខេត្តព្រះសីហនុ នៅថ្ងៃទី២២ខែមីនាឆ្នាំ២០២០នេះ បានឲ្យដឹងថា ក្នុងនាមជាប្រធានគណៈកម្មការ ប្រយុទ្ធនឹងជំងឺកូវីដ១៩ ខេត្តព្រះសីហនុ លោក គួច ចំរើន បានយកចិត្តទុកដាក់ខ្ពស់ និងបានចេញចំណាត់ការ ដើម្បីធានាបាននូវសុខសុវត្ថិភាព និងការទប់ស្កាត់ការឆ្លងរាលដាល ខណៈពេលក្រសួងសុខាភិបាល បានរកឃើញភ្ញៀវទេសចរជនជាតិបារាំងវ័យចំណាស់២នាក់ កើតជំងឺឆ្លងវីរុសកូរ៉ូណា (កូវីដ១៩)។
លោក គួច ចំរើន អភិបាលខេត្តព្រះសីហនុ បានថ្លែងថា ជាវិធានការក្រុមការងារអាជ្ញាធរ និងមន្ដ្រីសុខាភិបាលខេត្ត បានរៀបចំ ជនជាតិខ្មែរ និងបារាំង ៣៧នាក់ ដែលមានការពាក់ព័ន្ធ ទុកដាក់ដាច់ដោយឡែក ក្នុងសណ្ឋាគារមួយ រហូតដល់រយៈពេល១៤ថ្ងៃ ព្រមទាំងបានយកសំណាក របស់ពួកគេទៅធ្វើតេស្ត នៅវិទ្យាស្ថានប៉ាស្ព័រកម្ពុជា ហើយកំពុងរង់ចាំលទ្ធផល នៃមេរោគមួយនេះ។
សូមបញ្ជាក់ថា ក្រោយការស្រាវជ្រាវ និងសួរនាំរួចមក ជនជាតិបារាំង ចំនួន ៣៦នាក់ បានធ្វើដំណើរមកដល់ខេត្តសៀមរាប កាលពីថ្ងៃទី១១ ខែមីនា ឆ្នាំ២០២០។ បន្ទាប់មកពួកគេបានធ្វើដំណើរកម្សាន្ត តាមរថយន្ត ជាមួយមគ្គុទេសក៍ទេសចរណ៍ ២នាក់ និងអ្នកបើក រថយន្តម្នាក់ទៀត ជាជនជាតិខ្មែរ ឆ្ពោះមកខេត្តព្រះសីហនុ នៅថ្ងៃទី១៨ ខែមីនា ឆ្នាំ២០២០។
ក្រោយបុរសជនជាតិបារាំង២នាក់ ដែលរកឃើញផ្ទុកមេរោគ COVID-19 នោះ អាជ្ញាធរ និងមន្ត្រីចត្តាឡីស័ក បានចាប់ផ្តើមនាំមនុស្សទាំង ៣៧នាក់ ជនជាតិ បារាំង ៣៤នាក់ និងជនជាតិខ្មែរ ៣នាក់ យកទៅទុកដាច់ដោយឡែកក្នុងសណ្ឋាគារមួយ ដើម្បីតាមដានសុខភាព និងរង់ចាំលទ្ធផលនៃការធ្វើតេស្តរកវីរុស COVID-19 បន្តទៀត។
លោកអភិបាលខេត្ត ក៏សូមសម្ដែងនូវការគោរពជូនពរ និងលើកទឹកចិត្ត ចំពោះក្រុមគ្រូពេទ្យជួរមុខរបស់យើង សូមទទួលបានជោគជ័យ ក្នុងការបំពេញកាតព្វកិច្ច ក្នុងការព្យាបាលអ្នកជំងឺ ជនជាតិបារាំង វ័យចំណាស់ ២នាក់ ដែលឆ្លងវីរុសរលាក សួតថ្មី កំពុងដាក់ឲ្យសម្រាកព្យាបាល ក្នុងបន្ទប់ដាច់ដោយឡែក នៅមន្ទីរពេទ្យបង្អែកខេត្តព្រះសីហនុ។ យើងជឿជាក់ថា ក្រុមគ្រូពេទ្យរបស់យើង អាចគ្រប់គ្រងស្ថានការនេះបាន និងសូមប្រជាពលរដ្ឋទាំងអស់ រក្សាភាពស្ងប់ស្ងាត់ រក្សាអនាម័យឲ្យបានល្អ និងជាប្រចាំ។
សេចក្ដីជូនព័ត៌មានរបស់ក្រសួងសុខាភិបាល ស្តីពីការរកឃើញ ២ ករណីថ្មីទៀត ជាបុរសទេសចរជនជាតិបារាំង វិជ្ជមាន វីរុសកូវីដ១៩ ។
អាជ្ញាធរខេត្តព្រះសីហនុ បានស្នើសូមដល់មហាជន កុំបង្ហោះឬចែកចាយព័ត៌មានទាំងឡាយណា ដែលមិនពិតប្រាកដ បំផុសបំផុស បង្កចលាចល និងបង្កការព្រួយបារម្ភដល់ប្រជាពលរដ្ឋ ។ បុគ្គលទាំងឡាយបង្ហោះ ឬចែកចាយព័ត៌មានមិនពិត នឹងត្រូវទទួលខុសត្រូវចំពោះមុខច្បាប់ជាធរមាន ។
នៅព្រលប់ថ្ងៃទី២១ ខែមីនា ឆ្នាំ២០២០ ក្រោយពីទទួលបានទឹកថ្នាំបាញ់សម្លាប់មេរោគពី លោក គួច ចំរើន អភិបាល នៃគណ:អភិបាលខេត្តព្រះសីហនុ និងមតិណែនាំពីលោក អភិបាលខេត្ត រួចមកលោក រស់ សុខគីម ប្រធានគ្រប់គ្រងផ្សារលើ នៅក្រុងព្រះសីហនុ ខេត្តព្រះសីហនុ បានយកទៅបាញ់ថ្នាំសម្លាប់មេរោគតាមតូចក្នុងផ្សារ ដើម្បីបង្ការការពារ ទប់ស្កាត់ការឆ្លងរីករាលដាលនូវជំងឺកូវីដ១៩ ។
ចំណែកមន្ទីរពេទ្យបង្អែកខេត្តសៀមរាប ក៏បានឲ្យដឹងដែរថា ទោះកាលៈទេសៈណាក៏ដោយ ក៏មន្ទីរពេទ្យខេត្តសៀមរាប មិនបានបដិសេដ ក្នុងការទទួលពិនិត្យ ពិគ្រោះ ព្យាបាល គ្រប់អ្នកជំងឺគ្រប់ជាតិសាសន៍ យើងមិនបានរើសអើងដោយសារតែ COVID-19។ មន្ត្រីយើងបានបង្កើនការប្រុងប្រយ័ត្នទ្វេរដងក្នុងការផ្តល់សេវា៕ដោយ៖កូឡាប