កំពង់ចាម ៖ ឆ្លើយតបទៅនឹងទៅនឹងសំណូមពរ របស់បងប្អូនប្រជាពលរដ្ឋ នៅក្នុងសហគមន៍ ជាពិសេស ការអនុវត្តនូវវិធានការបង្ការ ទប់ស្កាត់ការរីករាលដាល នៃជំងឺឆ្លងកូវីដ១៩ ក្រុមការងារជំនាញសុខាភិបាល ចុះបាញ់ថ្នាំសម្លាប់មេរោគ កូវីដ ១៩ នៅលើទីតាំង ៤កន្លែង ដែលជនជាតិម៉ាឡេស៊ី ៧នាក់ មានផ្ទុកវីរុសកូវីដ ១៩ ហើយស្នាក់នៅ និងចុះផ្សព្វផ្សាយសាសនា នៅក្នុងភូមិសាស្ត្រ នៃស្រុកកងមាស ។
តាមការឲ្យដឹងពី លោក ជា ក្រូច ប្រធានមន្ទីរព័ត៌មាន និងជាមន្ត្រីអ្នកនាំពាក្យរដ្ឋបាល ខេត្តកំពង់ចាម ឲ្យដឹងថា
ការអនុវត្តនូវវិធានការបង្ការ ទប់ស្កាត់ការរីករាលដាល នៃជំងឺឆ្លងកូវីដ១៩ របស់ លោក អ៊ុន ចាន់ដា អភិបាលខេត្ត និងជាប្រធានគណៈកម្មការ ប្រយុទ្ធប្រឆាំងនឹងជំងឺ កូវីដ ១៩ ខេត្តកំពង់ចាម កាលពីថ្ងៃទី២១ ខែមីនា ឆ្នាំ២០២០ បានបញ្ជាឲ្យ លោក ហាន កុសល អភិបាលរងខេត្ត ដឹកនាំការចុះបាញ់ថ្នាំសម្លាប់មេរោគ នៅក្នុងភូមិសាស្ត្រខាងលើនេះ គឺ ៖ ទី១.វិហារខ្មែរឥ ស្លាមភូមិពង្រ ឃុំ រកាគយ ។ ទី២.វិហារខ្មែរឥស្លាមភូមិ សាច់សូរ ឃុំពាមជីកង ។ ទី៣.វិហារខ្មែរឥស្លាមភូមិ សំបូរមាស ឃុំពាមជីកង និងទី៤.ផ្ទះ ១កន្លែង ដែលជនជាតិ ម៉ាឡេស៊ី ចំនួន ៧នាក់ បានស្នាក់នៅ អំឡុងពេល ផ្សព្វផ្សាយកិច្ចការសាសនានោះ ។
លោកបញ្ជាក់ដែរថា យុទ្ធនាការនេះ គឺជាវិធានការ បង្ការទប់ស្កាត់ មិនឲ្យរីករាលដាលជំងឺដ៏កាចសាហាវមួយនេះ ចូលទៅក្នុងសហគមន៍ ជាពិសេស វាជាផ្នែកមួយ បានចូលរួមចំណែកកាត់បន្ថយភាពភ័យខ្លាច ដល់ប្រជាពលរដ្ឋ ផងដែរ ។ ដោយឡែក បន្ទាប់ពីការបាញ់ថ្នាំសម្លាប់មេរោគហើយ ក្រុមការងារ ក៏បានបិទវិហារឥស្លាម បណ្ដោះអាសន្នសិន ។ ជាមួយនោះ ប្រជាពលរដ្ឋ ដែលប៉ះពាល់ដោយផ្ទាល់ជាមួយជនជាតិម៉ាឡេស៊ីទាំង ៧នាក់ ក្រុមការងារ ក៏បានធ្វើសំណូមពរ ឲ្យពួកគាត់រស់នៅក្នុងផ្ទះដាច់ដោយឡែក ចំនួន ១៤ថ្ងៃ ដើម្បីតាមដានសុខភាព ពីគ្រូពេទ្យជំនាញផងដែរ ។
គួរកត់សម្គាល់ ផងដែរថា នាពេលថ្មីៗកន្លងទៅនោះ ក្រសួងសុខាភិបាល បានប្រកាសលទ្ធផល វិជ្ជមានវីរុសកូវីដ ១៩ ទៅលើបុរសជនជាតិម៉ាឡេស៊ី ចំនួន ៧នាក់ ដែលបានមកផ្សព្វផ្សាយសាសនា នៅក្នុងទីតាំងទាំង ៤កន្លែង នៃស្រុកកងមាស ខេត្តកំពង់ចាម ។ បច្ចុប្បន្ន ពួកគាត់កំពុងសម្រាកព្យាបាល នៅបន្ទប់ដាច់ដោយឡែក នៃមន្ទីរពេទ្យ ខេត្តកំពង់ចាម ។ ជនជាតិម៉ាឡេស៊ីទាំង ៧នាក់ នេះ បានមកស្នាក់អាស្រ័យ ដើម្បីផ្សព្វផ្សាយសាសនា និងស្នាក់នៅស្រុកកងមាស ចាប់តាំងពីថ្ងៃទី១២ ខែមីនា មកម្ល៉េះ ។ លុះមកដល់ថ្ងៃទី១៩ ខែមីនា ឆ្នាំ២០២០ ក្រុមគ្រូពេទ្យជំនាញ ក៏បានរកឃើញពួកគាត់ មានផ្ទុកវីរុសកូវីដ ១៩ បន្ទាប់ពីធ្វើការពិនិត្យសំណាកនោះ ។ ដោយឡែក គិតមកត្រឹមថ្ងៃទី២១ មីនា នេះ ខេត្តកំពង់ចាម មានអ្នកផ្ទុកមេរោគកូវីដ ១៩ សរុបទាំងអស់ចំនួន ១០នាក់ ក្នុងនោះ ៖ ជនជាតិអង់គ្លេស ៣នាក់ ជនជាតិម៉ាឡេស៊ី ៧នាក់ ។ ក្រៅពីនោះ ៨៦នាក់ ទៀត គ្រូពេទ្យជំនាញ កំពុងដាក់នៅផ្ទះដាច់ដោយឡែក រយៈពេល ១៤ថ្ងៃ ដើម្បី តាមដានសុខភាព ខណៈដែល វីរុសដ៏កាច់សាហាវមួយនេះ ពុំទាន់មានការឆ្លង ទៅដល់ប្រជាពលរដ្ឋ នៅក្នុងសហគមន៍ នៅឡើយ ៕ដោយ៖កូឡាប