ភ្នំពេញ៖ ក្រសួងសុខាភិបាល ចេញប្រកាសសរុបករណីវិជ្ជមានវីរុសកូវីដ១៩ នៅទីទាំងប្រទេស គិតត្រឹមម៉ោង២០នៅថ្ងៃទី២២ខែមីនាឆ្នាំ២០២០នេះ រកឃើញអ្នកឆ្លងករណីកូវីដ-១៩ ចំនួន៣១នាក់ទៀតនៅខេត្តព្រះសីហនុ ដែលនាំឱ្យអ្នកឆ្លងវីរុសនេះនៅកម្ពុជាកើនដល់៨៤ករណី។
លោកស្រីឱ វណ្ណឌីន អ្នកនាំពា្យ និងជារដ្ឋលេខាធិការក្រសួងសុខាភិបាល បានថ្លែងថា ករណីថ្មីទាំង៣១នោះ គឺរកឃើញលើអ្នកដែលទាក់ទងជាមួយបុរសជនជាតិបារាំងពីរនាក់ ដែលរកឃើញផ្ទុកកូវីដ-១៩។ ក្នុងចំណោមអ្នកទាំង៣១នាក់នោះ មានទេសចរជនជាតិបារាំង២៩នាក់ និងមគ្គុទេសទេសចររបស់ពួកគាត់ ជាជនជាតិខ្មែរ២នាក់ មានអាយុ៣៩ឆ្នាំនិងអាយុ៣៣ឆ្នាំ។ ពួកគាត់គឺជាភ្ញៀវទេសចរមកដល់ខេត្តព្រះសីហនុ នៅថ្ងៃទី១៨ខែមីនា ឆ្នាំ២០២០ ហើយគ្រោងវិលត្រឡប់ទៅវិញនៅថ្ងៃទី២១ ខែមីនា ឆ្នាំ២០២០។ ក្រសួងបញ្ជាក់ថា ពួកគាត់ទាំងនោះត្រូវបានដាក់ព្យាបាលដាច់ដោយឡែកនៅបន្ទប់សណ្ឋាគារមួយ ដោយមានការបិទជាបណ្តោះអាសន្ន មិនឲ្យមានការចេញចូលដោយគ្មានភារកិច្ចឡើយ៕ដោយ៖កូឡាប
