ភ្នំពេញ៖ អ្នកនាំពាក្យក្រសួងសុខាភិបាល បានស្នើសូមដល់ប្រជាពលរដ្ឋទូទាំងប្រទេស ចូលរួមកាត់ផ្តាច់ការចម្លងវីរុសកូវីដ១៩ ពីបុគ្គលម្នាក់ ទៅបុគ្គលម្នាក់ទៀត ឬទៅក្នុងសហគមន៍របស់ខ្លួន ហើយលោកស្រី បានលើកដៃសំពះដល់បងប្អូនជនរួមជាតិទាំងអស់ មេត្តាយល់លើចំណុចនេះ ជាចាំបាច់នៅក្នុងកាលៈទេសៈនេះ ហើយសូមកុំឲ្យមានការរើសអើង មិនមានអ្នកណាម្នាក់ចង់ឈឺ ឬចង់នាំជំងឺមកនោះឡើយ។
វេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលនៃព្រះរាជាណាចក្រកម្ពុជា បានមានប្រសាសន៍ថា សុំបងប្អូនប្រជាពលរដ្ឋទាំងអស់ ផ្តល់ទំនុកចិត្តលើក្រុមគ្រូពេទ្យនៅថ្នាក់ជាតិ និងក្រោមជាតិ ដែលកំពុងតែសកម្មក្នុងការស្វែងរកអ្នកប៉ះពាល់ផ្ទាល់ឬប្រយោល និងសូមឲ្យមានការចូលរួមសហការស្ម័គ្រចិត្ត បង្ហាញខ្លួន ប្រសិនបើបានដឹងថា លោកអ្នកធ្លាប់បានប៉ះពាល់ជាមួយអ្នកវិជ្ជមានវីរុសកូវីដ១៩ ដើម្បីពិនិត្យសុខភាពលោកអ្នក ប្រសិនបើអ្នកប៉ះពាល់ផ្ទាល់មិនមានបញ្ហាទេ អ្នកប៉ះពាល់ប្រយោលដែលរកឃើញនឹងចាត់ចែងឲ្យមានការតាមដានបន្តដោយខ្លួនឯងក្នុងរយ:ពេល ១៤ថ្ងៃ។ អ្វីដែលជាការរកឃើញមកដល់ពេលនេះគឺ មានអ្នកវិជ្ជមានវីរុសកូវីដ១៩ សរុបចំនួន ៥៣នាក់ (អ្នកជាសះស្បើយ ២នាក់ អ្នកឆ្លងផ្ទាល់បន្តមានតែ ៣ករណី (បុរសអាយុ៣៨ឆ្នាំនៅខេត្តសៀមរាប និង ស្ត្រីជាភរិយា ២នាក់) ប៉ុណ្ណោះ)។ មិនទាន់មានការចម្លង ឫរាតត្បាតក្នុងសហគមន៍នៅឡើយ។
លោកស្រីអ្នកនាំពាក្យ បានបន្ថែមទៀតថា នេះ ជាចំណុចដែលបងប្អូនប្រជាពលរដ្ឋ ត្រូវតែខិតខំចូលរួមការពារទប់ស្កាត់ កុំឲ្យមានការចម្លងទៅក្នុងសហគមន៍ ជាកិច្ចការដែលយើងទាំងអស់គ្នាត្រូវធ្វើជាចាំបាច់។ ” ដូច្នេះ ខ្ញុំសូមអំពាវនាវហើយអំពាវនាវទៀត ខ្ញុំសុំលើកដៃសំពះដល់បងប្អូនជនរួមជាតិយើងទាំងអស់ សូមលោកអ្នកមេត្តាយល់លើចំណុចនេះជាចាំបាច់នៅក្នុងកាលៈទេសៈនេះ ហើយសូមកុំឲ្យមានការរើសអើងឲ្យសោះ មិនមានអ្នកណាម្នាក់ចង់ឈឺ ឬចង់នាំជំងឺមកនោះឡើយ។ តែអ្វីដែលសំខាន់នោះ ត្រូវតែរួបរួមគ្នាកាត់ផ្តាច់ឲ្យបាននូវការចម្លងពីបុគ្គលដែលមានវីរុសកូវីដ១៩ ទៅបុគ្គលផ្សេងទៀត ជាពិសេសអ្នកដែលនៅជិតស្និទ្ធ ឬក្រុមគ្រួសារ មិត្តភក្តិគាត់ជាដើម។ ចូលរួមទាំងអស់គ្នា ការពារការចម្លងកូវីដ១៩ ទើបយើងអាចមានជ័យជនះ។ សូមជូនពរសុខភាពល្អ មិនមានការចម្លងវីរុសកូវីដ១៩នេះ ទាំងអស់គ្នា” លោកស្រីវេជ្ជបណ្ឌិត ឱ វណ្ណឌីន បានបញ្ជាក់បន្ថែមយ៉ាងដូច្នេះ៕ដោយ៖កូឡាប