ភ្នំពេញ៖ ដោយសារបញ្ហាជំងឺកូវីដ-១៩ កំពុងរាតត្បាតស្ទើរពេញផ្ទៃស្រុកទៅហើយនោះ បានធ្វើឲ្យការប្រកួតកីឡាជាតិលើកទី៣ ត្រូវបានពន្យារពេលជាបណ្ដោះអាសន្ន រហូតទាល់តែដល់ជំងឺដ៏កាចសាហាវមួយរលាយបាត់។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិក មានប្រសាសន៍ថា ក្រោយទទួលបានចំណារដ៏ខ្ពង់ខ្ពស់ពីសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា នៅថ្ងៃសុក្រចុងសប្ដាហ៍មុននេះ ការប្រកួតកីឡាជាតិដ៏ធំនេះ ត្រូវបានពន្យារពេល។
ជាមួយនឹងការពន្យារពេលនេះដែរ លោក វ៉ាត់ ចំរើន បានថ្លែងអំណរគុណ និងគាំទ្រចំពោះការសម្រេចចិត្តរបស់រាជរដ្ឋាភិបាល ដែលបង្ហាញនូវការយកចិត្តទុកដាក់ខ្ពស់ ចំពោះសុខទុក្ខរបស់កីឡាករ-កីឡាការិនី ពិសេសផ្ដល់ឱកាសឲ្យគណៈកម្មការមានពេលវេលាគ្រប់គ្រាន់ ក្នុងការត្រៀមលក្ខណៈរៀបចំ នៅពេលស្ថានភាពរីករាលដាល នៃជំងឺឆ្លង Covid-19 មានសភាពប្រក្រតីឡើងវិញ។
លោកបន្ដថា ឥឡូវយើងមានផលប៉ះពាល់ច្រើន ពិសេសកីឡាករមិនបានហាត់ អាចប៉ះពាល់បច្ចេកទេសឬអាចគ្រោះថ្នាក់ពេលប្រកួតច្រើន។ ម្យ៉ាងការហាត់សមត្រៀមសម្ដែងអបអរពិធីបើក និងបិទក៏មិនបានហាត់ដែរ។ អីចឹងវាជាការល្អ ដែលយើងផ្អាកហើយរកពេលប្រមូលផ្ដុំ ឲ្យបានគ្រប់គ្រាន់ ដើម្បីត្រៀមរៀបចំឡើងវិញ។ អីចឹងយើងសូមថ្លែងអំណរគុណរាជរដ្ឋាភិបាល សម្រាប់ការឯកភាពលើកពេល ដ្បិតនេះជាកង្វល់អ្នកបច្ចេកទេស តែយើងនឹងតែបន្ដការខំប្រឹង ដើម្បីត្រៀមរៀបចំ ព្រោះយើងមិនបោះបង់ផែនការនេះឡើយ។
គួរបញ្ជាក់ថា ព្រឹត្តិការណ៍២ឆ្នាំម្ដងបានរៀបចំ២លើករួចមកហើយ ក្នុងគោលបំណងសម្រួចផែនការ ឆ្ពោះទៅស៊ីហ្គេម ឆ្នាំ២០២៣ ទាំងការបណ្ដុះបណ្ដាលធនធានកីឡាករ-កីឡាការិនី និងធនធានមន្ដ្រីបច្ចេកទេស សម្រាប់ការរៀបចំព្រឹត្តិការណ៍ទាំងមូលពិសេសពិធីបើកបិទព្រឹត្តិការណ៍ស៊ីហ្គេមតែម្ដង។ ចំពោះកីឡាជាតិលើកទី៣ ក្រោយរាជរដ្ឋាភិបាលសម្រេចពន្យារពេល កាលបរិច្ឆេទថ្មី ដើម្បីរៀបចំនៅមិនទាន់កំណត់នោះទេ ដោយរង់ចាំស្ថានភាពជំងឺឆ្លង Covid-19 មានភាពធូរស្រាល ឬប្រក្រតីឡើងវិញ៕ ដោយ ៖ បញ្ញាស័ក្តិ
