ភ្នំពេញ៖ បន្ទាប់ពីរដ្ឋាភិបាលថៃ បានផ្អាកការងារ ធ្វើឲ្យពលករខ្មែរគ្មានការងារធ្វើ បាននាំគ្នាវិលត្រឡប់មកស្រុកកំណើតវិញ តាមច្រកព្រំដែនមួយចំនួន ហើយករណីនេះត្រូវបានថ្នាក់ដឹកនាំរាជរដ្ឋាភិបាលកម្ពុជា បានចេញអំពាវនាវ ស្នើសូមបងប្អូនដែលទើបធ្វើដំណើរត្រឡប់ពីបរទេសទាំងអស់ សូមមេត្តាដាក់ខ្លួនឯងឲ្យនៅដោយឡែកចំនួន១៤ថ្ងៃ និងតាមដានសុខភាព បើមានចេញរោគសញ្ញា សូមពិគ្រោះជំងឺជាមួយទូរស័ព្ទលេខ ១១៥ ។ បងប្អូនដែលទើបធ្វើដំណើរត្រឡប់ពីបរទេសទាំងអស់ សូមអានសេចក្តីណែនាំរបស់ក្រសួងសុខាភិបាល ។
នៅថ្ងៃទី២៣ ខែមីនា ឆ្នាំ២០២០នេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានចេញសារដោយសូមបងប្អូនកងទ័ពទាំងអស់ ក៏ដូចជា ប្រជាពលរដ្ឋរបស់យើង ថែរក្សាសុខភាព និងអនាម័យឱ្យបានល្អ ក្នុងគ្រាដែលយើងមានករណីឆ្លងមេរោគ COVID-19។ សូមបងប្អូន បន្តតាមដានព័ត៌មានអំពីការណែនាំ និងវិធានការការពារនានារបស់ ក្រសួងសុខាភិបាល។
ចំណែកលោកខៀវ កាញារីទ្ធ រដ្ឋមន្ត្រីក្រសួងព័ត៌មាន បានលើកឡើងថា នៅថ្ងៃទី២២ ខែមីនា ឆ្នាំ២០២០ មនុស្សម្នា សម្រុកជិះរថយន្ត ដើម្បីត្រឡប់ទៅស្រុក ក្រោយពីទីក្រុងបាងកក និងខេត្តជុំវិញ ប្រកាសបិទសកម្មភាពជួញដូរ ២៦ មុខ រយៈពេល ៣ អាទិត្យ ដើម្បីទប់ការរាលដាលនៃរោគ COVID-19។
ចំណែកបណ្តាញសង្គមហ្វេសប៊ុក បានលើកឡើងថា អស់ការងារ? វេបសាយស្រុកថៃ ផ្សាយថាទាំងពលករខ្មែរ ទាំងឡាវ និងភូមា រាប់ម៉ឺននាក់ បានសម្រុកត្រឡប់ទៅផ្ទះវិញ កាលពីថ្ងៃ២២ ខែមីនា ឆ្នាំ២០២០ បន្ទាប់ពីប្រទេសថៃ ប្រកាសបិទហាង ផ្សារទំនើប បិទបារ រង្គសាល និងកន្លែងធំៗ ដែលបណ្តាលឲ្យបាត់បង់ការងារទាំងអស់គ្នា។ ណាមួយ ថៃបិទព្រំដែន នៅថ្ងៃ២៣ ខែមីនានេះផង។
ពាក់ព័ន្ធនឹងករណីពលរដ្ឋខ្មែរ ដែលធ្វើការនៅប្រទេសថៃ នាំគ្នាសម្រុកវិលមកស្រុកកំណើតវិញនោះ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំដល់អាជ្ញាធរ នៅតាមមូលដ្ឋានឱ្យចុះចាត់វិធានការ ដោយដាក់ពលរដ្ឋខ្មែរ ទើបត្រឡប់មកពីប្រទេសថៃ ឱ្យនៅដាច់ដោយឡែករយៈពេល១៤ថ្ងៃ ដើម្បីបង្ការការចម្លងមេរោគកូវីដ១៩ នៅក្នុងសហគមន៍ខ្លួនឯង។
សារសំឡេងណែនាំទៅកាន់ថ្នាក់ដឹកនាំនៅតាមបណ្តាខេត្ត ជាពិសេសខេត្តជាប់ព្រំដែនថៃនៅយប់ថ្ងៃទី២២ខែមីនាឆ្នាំ២០២០នេះ សម្តេចក្រឡាហោម ស ខេង បានបញ្ជាក់ថា “ឥឡូវខ្ញុំស្នើអ៊ីចេះ ខេត្តសាមីនីមួយៗ ណែនាំទៅមូលដ្ឋានភូមិឃុំហ្នឹង ស្រុកហ្នឹង ឱ្យផ្តល់ព័ត៌មាន។ បានន័យថា ប្រជាជនទើបមកពីថៃ ផ្តល់ព័ត៌មានមក ដើម្បីឱ្យគ្រូពេទ្យពិនិត្យ ហើយបើសង្ស័យយ៉ាង ម៉េច ទុកឱ្យគាត់នៅដោយឡែកសិន កុំឱ្យប៉ះពាល់ជាមួយអ្នកដទៃ នៅក្នុងផ្ទះគាត់ណុង។ សូម្បីតែគ្រួសារក៏កុំឱ្យប៉ះដែរ។ ល្អមែនទែន គាត់មកអ៊ីចឹងមែន ឱ្យគាត់នៅក្នុងផ្ទះគាត់ណុង ១៤ថ្ងៃ ហើយបើមានអីសង្ស័យ យកកំហាក យកអីមកធ្វើតេស្តធ្វើអី។ ណែនាំពួកគាត់ នៅក្នុងផ្ទះមែន តែនៅដោយឡែកពីគេក្នុងរយៈ ពេល ១៤ថ្ងៃ ដើម្បីការពារជំងឺរាតត្បាតនេះ។ បើមានសញ្ញាអីយកមកពិនិត្យឱ្យបានច្បាស់លាស់។
ពាក់ព័ន្ធនឹងពលរដ្ឋខ្មែរទើបត្រឡប់មកពីប្រទេសថៃនេះដែរ លោកស្រី ឱ វណ្ណឌីន រដ្ឋលេខាធិការ និងជាអ្នកនាំ ពាក្យក្រសួងក្រសួងសុខាភិបាល បានចេញមកអំពាវនាវ ដល់អ្នកត្រឡប់មកពីប្រទេសថៃ ត្រូវដាក់ខ្លួនឯងឱ្យនៅដាច់ដោយឡែករយៈពេល ១៤ថ្ងៃ ដោយមិនត្រូវមានទំនាក់ទំនង ជាមួយក្រុមគ្រួសារនោះទេ។ បន្ថែមពីលើនោះ ត្រូវអនុវត្តន៍តាមវិធានអនាម័យទាំងឡាយ ដែលដាក់ចេញដោយក្រសួងសុខាភិបាល ដើម្បីបញ្ចៀសការចម្លងមេរោគកូវីដ១៩។
លោកស្រី ឱ វណ្ណឌីន ក៏បានអំពាវនាវដល់អាជ្ញាធរ នៅតាមមូលដ្ឋានចូលរួមទប់ស្កាត់ ការចម្លងមេរោគនេះ តាម រយៈស្រង់ស្ថិតិរបស់ប្រជាពលរដ្ឋ វិលត្រឡប់ពីប្រទេសថៃ ហើយណែនាំឱ្យពួកគាត់អនុវត្ត តាមវិធានរបស់ក្រសួងសុខាភិ បាល ដែលបានដាក់ចេញនោះ ។
លោកស្រីអ្នកនាំពាក្យ បានអំពាវនាវទៅកាន់អ្នកទើបត្រឡប់មកពីថៃ ត្រូវតាមដានសុខភាពរបស់ខ្លួន បើមានអ្វីខុសប្រក្រតី ឬមានរោគសញ្ញាណាមួយសង្ស័យពាក់ព័ន្ធជំងឺបង្កដោយមេរោគកូវីដ១៩ សូមប្រញាប់ទាក់ទងទៅកាន់ក្រុមគ្រូពេទ្យ ឬរាយការណ៍តាមលេខទូរស័ព្ទ ១១៥។ ប្រជាពលរដ្ឋខ្មែរ ត្រូវចូលរួមអនុវត្តន៍វិធាន និងដំបូន្មានរបស់ក្រសួងសុខាភិបាល ដើម្បីទប់ស្កាត់ ឬកាត់បន្ថយការឆ្លងរាលដាលមេរោគកូវីដ១៩ នៅក្នុងសហគមន៍ ឬនៅក្នុងភូមិឋានដែលខ្លួនរស់នៅ។
ស្នងការដ្ឋាននគរបាលខេត្តត្បូងឃ្មុំ បានចេញសេក្តីអំពាវនាវ និងស្នើសូមជម្រាបជូនដល់បងប្អូនប្រជាពលរដ្ឋទាំងអស់ ដែលទើបត្រឡប់មកពីក្រៅប្រទេស ឬតំបន់ដែលកើតជំងឺកូវីដ-១៩ ពេលបានមកដល់មូលដ្ឋានស្រុក-ក្រុងហើយ សូមកុំទាន់មានភាពស្និទ្ធស្នាល ជាមួយក្រុមគ្រួសារ បងប្អូន ឪពុកម្ដាយ ឬអ្នកជិតខាង សូមដាក់ខ្លួនឯង ឱ្យនៅដាច់ដោយឡែក ក្នុងរយៈពេល ១៤ថ្ងៃសិន។ នៅពេលដឹងខ្លួនថា មានអាការមិនស្រួល សូមទំនាក់ទំនង មកការិយាល័យសុខាភិបាលស្រុក ដើម្បីក្រុមគ្រូពេទ្យ និងមន្ត្រីជំនាញចុះទៅពិនិត្យដល់គេហដ្ឋានតែម្ដង។ សូមចូលរួមទប់ស្កាត់ទាំងអស់គ្នា ដើម្បីកុំឱ្យកូវីដ-១៩ កាន់តែរីករាលដាលខ្លាំងឡើង នៅក្នុងប្រទេសកម្ពុជារបស់យើង។ ការធ្វើបែបនេះ គឺដើម្បីប្រជាពលរដ្ឋខ្លួនឯង ក្រុមគ្រួសារ និងសង្គមជាតិយើងទាំងមូលផងដែរ។
មន្ទីរសុខាភិបាលខេត្តបាត់ដំបង សូមអំពាវនាវ ដល់បងប្អូនពលករទាំអស់ ដែលទើបត្រឡប់មកពីប្រទេសថៃ សូមលើកទឹកចិត្ត បងប្អូនទាំងអស់ អនុវត្តឲ្យបានខ្ជាប់ខ្ជួននូវវិធានការ របស់ក្រសួងសុខាភិបាល។ ដោយសារប្រទេសថៃ ក៏កំពុងមានការចម្លង រាលដាលនូវជំងឺរលាកសួតកូវីដ ១៩ ខ្លាំក្លាណាស់ដែរ ក្នុងពេលនេះ ដូច្នេះយើងក៏មិនបានដឹងដែរ នឹងមានការចម្លងមក បងប្អូនដែរឬទេ ដូច្នេះចាំបាច់បំផុត ដែលបងប្អូនត្រូវរស់នៅ ដោយឡែកពីប្រពន្ធ កូន និងឪពុកម្តាយជាទីស្រឡាញ់មួយរយៈសិន តែ១៤ថ្ងៃទេ សូមលើកទឹកចិត្ត បើសិនអ្នកមិនចង់ពោលពាក្យថា ស្តាយក្រោយ ដែលពេលនោះ ចង់និយាយ ក៏គ្មានឱកាសដែរ។ សូមកុំឲ្យជាប់ឈ្មោះថាជាអ្នកបានធ្វើបាបដល់ប្រពន្ធ កូន និងឪពុកម្តាយរបស់ខ្លួនឯងឲ្យសោះ ជាពិសេសគឺធ្វើបាប ដល់សហគមន៍របស់ខ្លួន ស្រុកកំណើតរបស់ខ្លួន។
សូមអនុវត្តនូវវិធានការបង្ការជំងឺ អនាម័យដៃ និងបរិស្ថាន ថែទាំសុខភាព ដើម្បីជីវិតយើងទាំងអស់គ្នា។ យើងទាំងអស់គ្នាពិតជាមិនចង់ឃើញ មិនចង់ឮ ការស្លាប់ដ៏រង្គាលដូចនៅ ប្រទេសអ៊ីតាលី មែនទេ?? យើងតែម្នាក់ តែបង្កសោនាដកម្ម ដល់ប្រជាពលរដ្ឋទូទាំងភូមិ ឃុំ ស្រុក តើអ្នកព្រមទេ?? ជឿជាក់យ៉ាងមាំថា អ្នកធ្លាប់បានរស់នៅជិតខាង ដែលមានការអនុវត្តច្បាប់តឹងរ៉ឹង ដូច្នេះអ្នកនឹងគោរពអនុវត្តវិធានការ របស់រាជរដ្ឋាភិបាលបានខ្ជាប់ខ្ជួនជាមិនខាន៕ដោយ៖កូឡាប