បាត់ដំបង៖ មានគណនីហ្វេសប៊ុកឈ្មោះ News Collection បានសរសេរអក្សរដែលមានខ្លឹមសារអំពីការចាកចេញរបស់ប្រជាពលរដ្ឋខ្មែរពីទឹកដីនៃព្រះរាជាណាចក្រថៃ ចូលមកក្នុងទឹកដីព្រះរាជាណាចក្រកម្ពុជា នៅច្រកអន្តរជាតិ(ដូង)ស្រុកកំរៀងខេត្តបាត់ដំបង ប៉ុន្តែម្ចាស់គណនីហ្វេសប៊ុកនេះ បានប្រើប្រាស់រូបភាពចាស់យូរហើយ មកដាក់បង្ហោះភ្ជាប់ជាមួយខ្លឹមសារខាងលើដែលជាហេតុនាំបង្កឲ្យមានការភាន់ច្រឡំ ពីមជ្ឈដ្ឋានប្រជាពលរដ្ឋ និងអ្នកនិយមប្រើប្រាស់បណ្តាញសង្គមហ្វេសប៊ុក។
ស្នងការដ្ឋាននគរបាលខេត្តបាត់ដំបង កាលពីថ្ងៃទី២២ខែមីនាឆ្នាំ២០២០ បានចេញសេចក្តីជូនដំណឹងថា ក្រុមការងារប្រតិកម្មរហ័សនៃស្នងការដ្ឋាននគរបាលខេត្តបាត់ដំបង សូមជម្រាបជូនសាធារណជន ពិសេសអ្នកនិយមប្រើប្រាស់បណ្តាញសង្គមហ្វេសប៊ុក ជ្រាបថានៅថ្ងៃទី២២ ខែ មីនា ឆ្នាំ២០២០នេះ បានកត់សម្គាល់ឃើញមានគណនីហ្វេសប៊ុកឈ្មោះ News Collection បានសរសេរអក្សរដែលមានខ្លឹមសារ អំពីការចាកចេញរបស់ប្រជាពលរដ្ឋខ្មែរ ពីទឹកដីនៃព្រះរាជាណាចក្រថៃ ចូលមកក្នុងទឹកដីព្រះរាជាណចក្រកម្ពុជានៅច្រកអន្តរជាតិ(ដូង) ស្រុកកំរៀង ខេត្តបាត់ដំបង ប៉ុន្តែម្ចាស់គណនីហ្វេសប៊ុកខាងលើ បានប្រើប្រាស់រូបភាព (ចាស់យូរហើយ)មកដាក់បង្ហោះភ្ជាប់ជាមួយខ្លឹមសារខាងលើ ដែលជាហេតុនាំបង្កឲ្យមានការភាន់ច្រឡំពីមជ្ឈដ្ឋានប្រជាពលរដ្ឋ ពិសេសអ្នកនិយមប្រើប្រាស់បណ្តាញសង្គមហ្វេសប៊ុក ហើយរូបភាពនេះ ក៏ធ្លាប់ត្រូវបានរដ្ឋបាលខេត្តបាត់ដំបង ប្រតិកម្មនិងបដិសេធ ចោលម្តងរួចមកហើយកាលពីថ្ងៃទី ៣០ ខែ តុលាឆ្នាំ២០១៩ តាមគេហទំព័ររដ្ឋបាលខេត្តបាត់ដំបង ។
ដើម្បីចៀសវាងនូវការភាន់ច្រឡំនេះ ស្នងការដ្ឋាននគរបាលខេត្តបាត់ដំបង ស្នើម្ចាស់គណនីហ្វេសប៊ុកឈ្មោះ News Collection ដកចេញនូវរូបភាពខាងលើពីក្នុងគណនីរបស់ខ្លួន។
សូមជម្រាបជូនថា នៅព្រឹកថ្ងៃទី២២ ខែ មីនាឆ្នាំ២០២០នេះ លោក ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគបាលខេត្តបាត់ដំបង បានអញ្ជើញចូលរួមជាមួយសមត្ថកិច្ចអាជ្ញាធរ ពាក់ព័ន្ធនៅចំណុចច្រកទ្វារអន្តរជាតិដូង ស្រុកកំរៀង ខេត្តបាត់ដំបង ដើម្បីពិនិត្យនិងសម្រមសម្រួលដោះស្រាយលើបញ្ហាជាក់ស្តែ ជាមួយការបិទច្រកទ្វារអន្តជាតិដូង។
សេចក្តីដូចបានជម្រាបជូនខាងល សូមសាធារណជន ពិសេសអ្នកនិយមប្រើប្រាស់បណ្តាញសង្គម មេត្តាជ្រាបជាព័ត៌មាន សូមអរគុណ។
ចំណែកលោកស្រីបាន ស្រីមុំ អ្នកតំណាងរាស្ត្រមណ្ឌលប៉ៃលិន ក៏បានសរសេរសារលើហ្វេសប៊ុកផ្លូវការ កាលពីយប់ថ្ងៃទី២២ ខែមីនា ឆ្នាំ២០២០នេះថា នាងខ្ញុំសូមជម្រាបជូនពុកម៉ែបងប្អូន ឲ្យបានជ្រាបថា នៅច្រកទ្វារព្រំដែនអន្តរជាតិព្រំ ខេត្តប៉ៃលិន បានបិទច្រកទ្វារតាំងពីថ្ងៃទី ២០ ខែមីនា ឆ្នាំ២០២០រួចហើយ ចំពោះថ្ងៃទី ២២ខែមីនា ឆ្នាំ ២០២០ តាំងព្រឹក ដល់យប់ម៉ោង ១១និង៣០ នាទីយប់ពុំមានពលករបានមកឆ្លងកាត់ចេញតាមច្រកទ្វារព្រំ មក កម្ពុជាឡើយ ពុំដូចពាក្សចចាមអារ៉ាមថា មានពលករមករង់ចាំច្រើនកកនៅច្រកទ្វារព្រំដែនឡើយ ។ ដោយឡែក មានបងប្អូនប្រជាពលរដ្ឋដែល មានមុខរបរលក់ដូរ នៅផ្សារថៃ ចេញចូលព្រឹក ល្ងាចបានឆ្លងតាមផ្លូវច្រកល្បៀង មានចំនួន ១៤ នាក់ ប៉ុណ្ណោះ។ ក្រុមការងារយើង រួមសហការជាប់ជាមួយខាងភាគីថៃដើម្បីរង់ចាំជួយសម្របសម្រួលដោះស្រាយបញ្ហានានា ជូនប្រជាពលរដ្ឋកម្ពុជា។
ចំណែកផេកហ្វេសប៊ុក ប្រឆាំងព័ត៌មានក្លែងក្លាយ – កម្ពុជា ក៏បានចេញសារមួយផងដែរថា ព័ត៌មានដែលបានបង្ហោះផ្សាយខាងក្រោមនេះ ជាព័ត៌មានក្លែងក្លាយ គ្មានហេតុការណ៍កើតឡើង ដូចផេកខាងក្រោម បានលើកឡើងនោះទេ។
ដោយឡែករដ្ឋបាលខេត្តបាត់ដំបង បានធ្វើការបដិសេធរូបភាព ដែលត្រូវបានគេយកមកផ្សព្វផ្សាយ ជាច្រើនដងមកហើយ ដោយរូបភាពទាំងនោះ គ្រាន់តែជារូបភាពចាស់ៗតែប៉ុណ្ណោះ សូមបងប្អូនប្រជាពលរដ្ឋកុំមានការយក់ច្រលំ ឯក្រុមយេនឌ័រស្នងការដ្ឋាន នគរបាលខេត្តបាត់ដំបង បានលើកឡើងថា ដោយសារតែខ្លាចមានការភាន់ច្រឡំ ចំពោះរូបភាពខ្លះដែលម្ចាស់គណនីហ្វេសប៊ុកឈ្មោះ News Collection យកមកបង្ហោះ (ភ្ជាប់) ជាមួយខ្លឹមសារនោះ ទើបតម្រូវឲ្យមានការបកស្រាយតែមិនបាន (បដិសេធ) ចំពោះខ្លឹមសារដែលគាត់ សរសេរនោះទេ (កុំមានការភាន់ច្រឡំ) ត្រួតលើការភាន់ច្រឡំ៕ ដោយ៖កូឡាប
