ភ្នំពេញ៖ ពិតជាចងចាំនូវការរួមចំណែកដ៏ធំធេងរបស់អ្នក “ស្រឡាញ់គ្នាក្នុងគ្រាក្រ ស្គាល់មិត្តល្អក្នុងគ្រាលំបាក” ។
ក្រុមគ្រូពេទ្យ៧នាក់ របស់ចិន បានមកដល់អាកាសយានដ្ឋានអន្តរជាតិភ្នំពេញ ប្រទេសកម្ពុជា ហើយ ដើម្បីជួយបង្ហាត់បង្រៀន អំពីការព្យាបាលជំងឺកូវីដ១៩ ព្រមទាំងផ្តល់នូវបរិក្ខារពេទ្យ សម្រាប់ប្រើប្រាស់ពាក់ព័ន្ធនឹងជំងឺកូវីដ១៩ នៅព្រឹកថ្ងៃចន្ទ ទី២៣ ខែមីនា ឆ្នាំ២០២០។
លោក Wang Wentian ឯកអគ្គរដ្ឋទូតចិនប្រចាំកម្ពុជា, លោករដ្ឋមន្ត្រី ម៉ម ប៊ុនហេង រដ្ឋមន្ត្រីក្រសួងសុខាភិបាល មានមន្ត្រីពាក់ព័ន្ធ រួមទាំងអ្នកសារព័ត៌មាននានាជាច្រើន បានមកទទួលស្វាគមន៍ វត្តមានរបស់ក្រុមគ្រូពេទ្យស្ម័គ្រចិត្តជនជាតិចិនចំនួន៧នាក់ បានមកដល់ប្រទេសកម្ពុជា។
បើតាមការប្រកាសរបស់ស្ថានទូតចិនប្រចាំកម្ពុជា Chinese Embassy in Cambodia បានឲ្យដឹងថា នាថ្ងៃទី២៣ ខែមីនា ម៉ាសចំនួន១០ម៉ឺន ដែលជាជំនួយរបស់សមាគមអភិវឌ្ឍន៍សេដ្ឋកិច្ចអាស៊ី ដែលមានទីតាំងក្នុងប្រទេសចិន បានមកដល់រាជធានីភ្នំពេញ ហើយត្រូវបានទទួលដោយក្រសួងសុខាភិបាល នៃប្រទេសកម្ពុជា។ ក្រុមហ៊ុនអាកាសចរណ៍ឡាញម៉ី អ៊ែឡាញ បានផ្តល់សេវាកម្ម ក្នុងការដឹកជញ្ជូនសម្ភារៈទាំងនេះ មកកាន់ប្រទេសកម្ពុជា ដោយឥតគិតថ្លៃ។
បើតាមផេកហ្វេសប៊ុកព្រះករុណា ព្រះបាទសម្ដេចព្រះបរមនាថ នរោត្ដម សីហមុនី បានលើកឡើងថា តាមក្រុមគ្រូពេទ្យស្ម័គ្រចិត្តនៃសាធារណរដ្ឋប្រជាមានិតចិន និងយន្តហោះពិសេស ដែលដឹកសម្ភារៈពេទ្យ បានចេញដំណើរ ពីសាធារណរដ្ឋប្រជាមានិតចិន មកកាន់ព្រះរាជាណាចក្រកម្ពុជាហើយ។ ជយោចំណងមិត្តភាព កម្ពុជា ចិន។
បើតាមផេកហ្វេសប៊ុក របស់Samdech Hun Sen, Cambodian Prime Minister បានឲ្យដឹងថា ”
ក្រុមគ្រូពេទ្យជំនាញ៧នាក់របស់ចិន បានមកដល់កម្ពុជាហើយ ដើម្បីជួយបង្ហាត់បង្រៀនអំពីការព្យាបាលជំងឺកូវីដ១៩”។ នៅព្រឹកថ្ងៃចន្ទ ទី២៣ ខែមីនា ឆ្នាំ២០២០នេះ ក្រុមគ្រូពេទ្យ៧នាក់របស់ចិនបានមកដល់ប្រទេសកម្ពុជា
ហើយ បន្ទាប់ពីជោគជ័យក្នុងការព្យាបាលអ្នកជំងឺកូវីដ១៩ ប្រទេសទេសចិន ដែលពេលនេះរដ្ឋាភិបាលចិន បានសម្រេចបញ្ជូនគ្រូពេទ្យនោះ មកកាន់ប្រទេសកម្ពុជា ដើម្បីជួយបង្ហាត់បង្រៀនអំពីការព្យាបាលជំងឺកូវីដ១៩ ព្រមទាំងផ្តល់នូវបរិក្ខាពេទ្យសម្រាប់ប្រើប្រាស់ពាក់ព័ន្ធនឹងជំងឺកូវីត១៩។
ក្នុងពេលថ្មីៗនេះ ស្ថានភាពជំងឺវីរុសCOVID-19 ក្នុងប្រទេសកម្ពុជា មានការវិវឌ្ឍន៍ឥតឈប់ឈរ ដែលបានធ្វើឲ្យប្រជាពលរដ្ឋចិន មានអារម្មណ៍ដូចប្រជាពលរដ្ឋកម្ពុជា។ ដើម្បីជួយកម្ពុជា ក្នុងកិច្ចប្រឆាំងនឹងជំងឺវីរុស រដ្ឋាភិបាលចិន បានសម្រេចចាត់បញ្ជូនក្រុមគ្រូពេទ្យ នៃតំបន់ស្វយ័តGuangxi ប្រទេសចិន ចំនួន៧រូប មកកាន់ប្រទេសកម្ពុជា។ សមាជិកនៃក្រុមគ្រូពេទ្យជំនាញ នឹងអញ្ជើញពិភាក្សាអំពីបទពិសោធន៍ នៃកិច្ចប្រយុទ្ធប្រឆាំងនឹងជំងឺវីរុស ជាមួយនឹងភាគីកម្ពុជា ជួយសម្របសម្រួលកិច្ចប្រយុទ្ធប្រឆាំងនឹងជំងឺវីរុស ដល់ភាគីកម្ពុជា ហើយនឹងផ្តល់យោបល់ណែនាំ ជូនដល់អ្នកជំងឺក្នុងពេលព្យាបាល។ ពួកគាត់ជាក្រុមអ្នកជំនាញប្រយុទ្ធប្រឆាំងនឹងជំងឺវីរុស ដែលត្រូវបានចាត់បញ្ជូន មកកាន់តំបន់អាស៊ានដំបូងគេបង្អស់ ដោយរដ្ឋាភិបាលចិន។ ទន្ទឹមនឹងនេះ ដើម្បីជួយដោះស្រាយបញ្ហាកង្វះសម្ភារៈទប់ស្តាត់នឹងជំងឺវីរុស ក្នុងប្រទេសកម្ពុជា រដ្ឋាភិបាលចិន ក៏បានជំនួយជាម៉ាសវេជ្ជសាស្ត្រ, ម៉ាសN95, សម្លៀកបំពាក់ការពារវីរុស, វ៉ែនតាការពារ និងសម្ភារៈផ្សេងទៀតយ៉ាងច្រើន ជូនដល់ភាគីកម្ពុជា។
គិតរហូតមកដល់យប់ថ្ងៃទី២២ ខែមីនានេះ កម្ពុជាបានរកឃើញអ្នកឆ្លងជំងឺកូវីដ១៩ ចំនួន៨៤ករណីហើយ ក្នុងនោះមានប្រុស៦៣នាក់ និងនារីចំនួន២១នាក់ ខណៈដែលក្រសួងសុខាភិបាល កំពុងបន្តស្វែងរក និងធ្វើតេស្តលើអ្នកពាក់ព័ន្ធផ្សេងទៀត។ រាជរដ្ឋាភិបាល បានបង្កើតគណៈកម្មាធិការជាតិប្រយុទ្ធប្រឆាំងនឹងជំងឺកូវីដ ខណៈក្រសួងស្ថាប័នមួយចំនួន ចាប់ផ្តើមដាក់វិធានការទប់ស្កាត់ចំពោះការឆ្លងរីករាលដាលកូវីដផងដែរ៕ដោយ៖កូឡាប