ក្រសួងយុត្តិធម៌អាមេរិច កាលពីថ្ងៃអាទិត្យម្សិលមិញនេះ បានធ្វើការបង្ក្រាបទៅលើគេហទំព័របោកប្រាស់មួយ ដែលអះអាងថា មានលក់វ៉ាក់សាំងប្រឆាំងនឹងវីរុសកូរ៉ូណា របស់អង្គការសុខភាពពិភពលោក។
ក្រសួងបញ្ជាក់ថា វាគឺជាការចាត់វិធានការដំបូង ដើម្បីប្រឆាំងទៅនឹងការបោកប្រកាស ទាក់ទងទៅនឹងវីរុសកូរ៉ូណា ដែលបានសម្លាប់ជីវិតពលរដ្ឋអាមេរិចជាង ៤០០នាក់ និងបានគំរាមកំហែង រាប់លាននាក់ទៀត ទូទាំងប្រទេស។
វេបសាយដែលត្រូវក្រសួងយុត្តិធម៌បិទ បានអះអាងថានឹងផ្តល់ឲ្យនូវឧបករណ៍វ៉ាក់សាំង របស់អង្គការសុខភាពពិភពលោក និងគិតថ្លៃលើការដឹកជញ្ជូនចំនួន ៤,៩៥ដុល្លារ។
នៅក្នុងសេចក្តីប្រកាស ក្រសួងបញ្ជាក់ថា “ជាការពិត បច្ចុប្បន្នមិនមានវ៉ាក់សាំងប្រឆាំង COVID-19 ឡើយ ហើយអង្គការសុខភាពពិភពលោក មិនមានចែកចាយវ៉ាក់សាំងនោះឡើយ”។
បើតាមតួលេខរបស់ CSSE បានឲ្យដឹងថា រហូតមកដល់ពេលនេះ អ្នកឆ្លងវីរុសកូរ៉ូណា នៅអាមេរិចមានចំនួនជាង ៣៣.០០០នាក់ ខណៈអ្នកស្លាប់មានជាង ៤០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia/Rueters/CSSE
