សៀមរាប៖ នគរបាលប្រឆាំងបទល្មើសសេដ្ឋកិច្ច នៃស្នងការដ្ឋានខេត្តសៀមរាប បានបង្ក្រាបរថយន្តបាឡែន ១គ្រឿង ដឹកឈើប្រណីតល្មើសច្បាប់ជាង១ម៉ែត្រគូប។ នគរបាល បានបញ្ជាក់ថា រថយន្តនោះ កំពុងដឹកយកមកលក់ក្នុងទីរួមខេត្តសៀមរាប។ ម្ចាស់រថយន្តដឹកឈើ និងបក្ខពួក បាននាំគ្នារត់បាត់អស់ ដោយបន្សល់ទុករថយន្តបទល្មើសនៅនឹងកន្លែង។
ការបង្ក្រាបនេះ ធ្វើឡើងនៅវេលាម៉ោង១៥និង០០នាទី ថ្ងៃទី២២ ខែមីនា ឆ្នាំ២០២០នេះ ជិតវត្តប្រាសាទត្រាំនាគ ក្នុងភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប។
លោកវរសេនីយ៍ទោ ម៉េង សំណាង នាយរងការិយាល័យ ប្រឆាំងបទល្មើសសេដ្ឋកិច្ច នៃស្នងការដ្ឋានខេត្តសៀមរាប បានឲ្យដឹងថា ប្រតិបត្តិការនេះ ដឹកនាំដោយលោកផ្ទាល់ ក្រោមការបញ្ជា ពីលោកប្រធានការិយាល័យ ប្រឆាំងបទល្មើសសេដ្ឋកិច្ចខេត្តសៀមរាប និងលោកឧត្តមសេនីយ៍ត្រី ម៉ក់ ធារ៉ា ស្នងការរងទទួលការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋានខេត្តសៀមរាប សហការជាមួយកម្លាំងរដ្ឋបាលព្រៃឈើខេត្តសៀមរាប។
លោកបន្តថា យោងតាមបទបញ្ជាផ្ទាល់ ពីសំណាក់ លោក ទៀ សីហា អភិបាលខេត្តសៀមរាប បានឲ្យសមត្ថកិច្ចចម្រុះ នៃខេត្តសៀមរាប បន្តបង្ក្រាបបទល្មើសផ្សេងៗ ក្នុងខេត្ត ឲ្យមានការថយចុះ បើទោះបីជានៅលើសាកលលោក និងនៅប្រទេសកម្ពុជា ទទួលរងនូវមេរោគកូវីដ១៩ នេះក្តី។
លោកបន្តថា រថយន្តដឹកឈើនេះ ត្រូវបានកម្លាំងរបស់លោក អូសយកមកស្នងការដ្ឋានខេត្តសៀមរាប រង់ចាំកម្លាំងរដ្ឋបាលព្រៃឈើ មកទទួលយកទៅរក្សាទុក ដើម្បីស្វែកម្ចាស់ឈើ ចាត់ការតាមផ្លូវច្បាប់។ លោកបញ្ជាក់ថា រថយន្តបាឡែននេះ ពាក់ផ្លាកលេខ ភ្នំពេញ 2S-2432 ឈើប្រភេទលេខ១ មានចំនួន២២ដុំស្មើនឹង១ម៉ែត្រគូប២ផ្លាន។ លោកបញ្ជាក់ទៀតថា កម្លាំងនគរបាលប្រឆាំងបទល្មើសសេដ្ឋកិច្ចនៃស្នងការដ្ឋានខេត្តសៀមរាប នឹងបន្តបង្ក្រាបបទល្មើសផ្សេងៗ ក្នុងខេត្តសៀមរាប ឲ្យមានការថយចុះ និងទៅបទបញ្ជារបស់ថ្នាក់លើផងដែរ ៕ដោយ៖កូឡាប