វីដេអូឃ្លីបមួយ ត្រូវបានចែករំលែកយ៉ាងលឿន និងកំពុងក្លាយជាប្រធានបទបង្កការរិះគន់ ក្តៅក្រហាយយ៉ាងខ្លាំង ចំពោះទង្វើដ៏អាក្រក់គ្មានពីរលើលោក របស់បុរសវ័យក្មេងម្នាក់ ដែលបានយកដៃផ្តិតទឹកមាត់ និងពិសេសលូកចូលក្នុងខោត្រដុសប្រដាប់ភេទ រួចទៅប៉ះកន្លែងសំខាន់ផ្សេងៗនៅក្នុង និងខាងក្រៅជុំវិញជណ្តើរយន្ត ដើម្បីចម្លងវីរុស Covid-19 ដែលខ្លួនបានផ្ទុក។ ហេតុការណ៍នេះបានកើតឡើងនៅស្ថានីយរថភ្លើង BTS sky នៅក្នុងទីក្រុងបាងកក កាលពីថ្ងៃទី២០ ខែមីនា ឆ្នាំ២០២០ ។
លោក Amarit Wisetsing ប្រធានអធិការដ្ឋាននគរបាលប៉ុស្តិ៍ Pathumwan បានបង្ហើបប្រាប់ក្រុមព័ត៌មានអនឡាញ Amarin TV ថា ក្រោយពីទទួលបានរឿងរ៉ាវនេះ មន្ត្រីជំនាញបានព្យាយាមទាក់ទងបុរសនោះនៅម៉ោង ៥ ល្ងាច ។ ក្រោយមក បុរសនេះក៏ចូលមកប៉ុស្តិ៍ប៉ូលីស ស្ថិតក្នុងសម្លៀកបំពាក់អាវយឺតពណ៌ខៀវ និងស្លៀកខោខូវប៊យ ដើម្បីផ្តល់ភ័ស្តុតាងដល់មន្ត្រីប៉ូលីស ។
ប៉ូលីសបានឲ្យដឹងថា បុរសជនជាតិថៃនេះ ដែលមានអាយុ ៣២ ឆ្នាំ ត្រូវបានបញ្ជូនទៅមន្ទីរពេទ្យ ដើម្បីពិនិត្យរាងកាយ និងវាយតម្លៃរោគសញ្ញាផ្លូវចិត្តភ្លាមៗ បន្ទាប់ពីការសួរចម្លើយបានបញ្ចប់ ។
ប៉ូលីសបានបញ្ជាក់ថា ពេលនេះ សមត្ថកិច្ចពុំទាន់អាចកាត់ទោសគាត់ដោយវិធីណានោះបានទេ ដោយរង់ចាំលទ្ធផលតេស្តរាងកាយ ថាតើគាត់ពិតជាផ្ទុកវីរុសកូវីដ-១៩ ដែរ ឬអត់? ៕
ប្រែសម្រួល៖ លឹម ហុង (ប្រភព៖ amarintv)
