ភ្នំពេញ៖ គណនីហ្វេសប៊ុកមួយ បានផ្សាយព័ត៌មានថា ថ្នាំព្យាបាលជំងឺ covid19 បានមកដល់ ប្រទេសកម្ពុជាយើង ហើយ កំពុងត្រៀមចែកចាយឲ្យបានគ្រប់មន្ទីរពេទ្យ ប៉ុន្តែស្នងការដ្ឋាននគរបាលរាជធានីភ្នំពេញ អះអាងថា ជាព័ត៌មានក្លែងក្លាយ។
កាលពីពេលថ្មីៗនេះ មានគណនីហ្វេសប៊ុក Cheng Sophy បានផ្សាយព័ត៌មានថា ថ្នាំព្យាបាលជំងឺcovid19 បានមកដល់ ប្រទេសកម្ពុជាយើង ហើយ កំពុងត្រៀមចែកចាយឲ្យបានគ្រប់មន្ទីរពេទ្យ និងលក់ទៅតាមទីផ្សារ ដែលនៅក្នុងប្រទេសកម្ពុជា យើង ឈប់ព្រួយបារម្ភទៀតទៅ ប្រជាពលរដ្ឋខ្មែរយើង។ បើតាមគណនីហ្វេសប៊ុកខាងលើ បានផ្សព្វផ្សាយថ្នាំនោះ មានឈ្មោះថា AVIGAN 200mg ។
ប៉ុន្តែទោះយ៉ាងណា បន្ទាប់ពីមានការផ្សព្វផ្សាយព័ត៌មានខាងលើនេះ ស្នងការដ្ឋាននគរបាលរាជធានីភ្នំពេញ កាលពីថ្ងៃទី២២ខែមីនាឆ្នាំ២០២០ បានចេញសេចក្តីជូនដំណឹងដល់សាធារណជនទាំងអស់ ជ្រាបថា សូមប្រុងប្រយ័ត្នចំពោះឱសថក្លាយក្លាយ។
ចំណែកនាយកដ្ឋានប្រឆាំងបទល្មើសបច្ចេកវិទ្យា Anti Cyber Crime Department ក៏បានប្រកាសព័ត៌មាន កាលពីថ្ងៃទី២២ ខែមីនា ឆ្នាំ២០២០ថា សូមជូនដំណឹងដល់សាធារណជនទាំងអស់ ឱ្យបានជ្រាបថា បច្ចុប្បន្ននេះ ដោយសារតែមានការឆ្លងរីករាលដាលនៃ ជំងឺឆ្លងផ្លូវដង្ហើមប្រភេទថ្មី ឬហៅថាជំងឺ Covid-19 ធ្វើឱ្យប្រជាជនមានការព្រួយបារម្ភយ៉ាងខ្លាំង ស្របពេលជាមួយគ្នានេះដែរ ក៏មានជនឆ្លៀតឱកាសមួយចំនួន បាននាំគ្នាផ្សព្វផ្សាយឱសថក្លែងក្លាយ នៅលើលើបណ្តាញទំនាក់ទំនងសង្គមផងដែរ ហេតុដូចនេះសាធារណជនទាំងអស់ សូមមេត្តាប្រុងប្រយ័ត្ន ចំពោះឱសថក្លែងក្លាយ ទាំងនោះមុននឹងទិញយកមកប្រើប្រាស់។ នាយកដ្ឋានប្រឆាំងបទល្មើសបច្ចេកវិទ្យា បានកំពុងស្រាវជ្រាវ Page មួយចំនួននោះ ហើយក៏មានតម្រុយខ្លះៗផងដែរ ដើម្បីនាំខ្លួនជនទាំងនោះ យកមកចាត់វិធានការតាមផ្លូវច្បាប់។
ពាក់ព័ន្ធនឹងព័ត៌មានខាងលើនេះ លោកវេជ្ជបណ្ឌិតលី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង បានថ្លែងប្រាប់សារព័ត៌មាននៅព្រឹកថ្ងៃទី២៣ខែមីនាឆ្នាំ២០២០នេះថា មិនទាន់មានថ្នាំសម្រាប់ព្យាបាលជំងឺកូវីដ១៩នេះនៅឡើយទេ នៅពេលអង្គការសុខភាពពិភពលោកកំពុងប្រើថ្នាំសាកល្បងព្យាបាល ជាបណ្តើរៗហើយ ហើយចំពោះអ្នកដែលផ្សព្វផ្សាយព័ត៌មានមិនពិតទាក់ទងនឹងថាមានថ្នាំព្យាបាលជំងឺ covid19 បានមកដល់ ប្រទេសកម្ពុជាយើងនោះ ក្រសួងនឹងមានវិធានការផ្លូវច្បាប់ចំពោះជននោះ ប្រសិនបើមិនលុបចេញពីផេកហ្វេសប៊ុក។
ស្នងការដ្ឋាននគរបាលខេត្តកោះកុង សូមជូនដំណឹងដល់ សាធារណៈទាំងអស់ជនមេត្តាជ្រាបថា បច្ចុប្បន្ននេះមានជនឆ្លៀតឱកាសមួយចំនួន បានផ្សព្វផ្សាយឱសថក្លែងក្លាយព្យាបាលជំងឺcovid-19 នៅលើបណ្តាញទំនាក់ទំនងសង្គមហេតុនេះ សាធារណជនទាំងអស់ ប្រុងប្រយ័ត្នចំពោះឱសថក្លែងក្លាយទាំងនោះ៕ ដោយ ៖ កូឡាប