គណៈកម្មការធិការអូឡាំពិច (COC) និងគណៈកម្មាធិការប៉ារ៉ាឡាំពិចកាណាដា (CPC) បានប្រកាសកាលពីថ្ងៃអាទិត្យម្សិលមិញថា កាណាដានឹងមិនចូលរួមក្នុង ព្រឹត្តិការអូឡាំពិច និងប៉ារ៉ាឡាំពិចឡើយ នៅរដូវក្តៅ ឆ្នាំ ២០២០ខាងមុខ ដោយសារមានការព្រួយបារម្ភ ពីការផ្ទុះវីរុសកូរ៉ូណា។
ការប្រឆាំងនឹងការរៀបចំព្រឹត្តិការអូឡាំពិច នៅទីក្រុងតូក្យូ មានការកើនឡើងយ៉ាងខ្លាំងក្នុងរយៈពេល ៤៨ម៉ោងចុងក្រោយនេះ ដោយមានភាគីពាក់ព័ន្ធជាច្រើន ដូចជាអាមេរិច អង់គ្លេស និងគណៈកម្មាធិការអូឡាំពិចរបស់ប្រទេសជាច្រើនទៀត បានស្នើឲ្យមានការពន្យារពេលរៀបចំព្រឹត្តិការណ៍នោះ។
នៅក្នុងសេចក្តីប្រកាស “COC និង CPC បានស្នើជាបន្ទាន់ឲ្យគណៈកម្មាធិការអូឡាំពិចអន្តរជាតិ (IOC) និង គណៈកម្មាធិការប៉ារ៉ាឡពិចអន្តរិចជាតិ (IPC) និងអង្គការសុខភាពពិភពលោក ពន្យារពេលព្រឹត្តិការណ៍រយៈពេល ១ឆ្នាំ ហើយពួកយើងនឹងផ្តល់ការគាំទ្រពេញទំហឹង ក្នុងការជួយដោះស្រាយបញ្ហាស្មុគស្មាញទាំងអស់ ដែលកើតមានឡើង ក្នុងការរៀបចំពេលវេលាឡើងវិញ។
គណៈកម្មាធិការអន្តរជាតិ បាននិយាយថា ខ្លួននឹងធ្វើការពិភាក្សាគ្នា ដែលរួមមានពីជម្រើស ដើម្បីកំណត់ថ្ងៃរៀបចំព្រឹត្តិការណ៍អូឡាំពិចឡើងវិញ ឬក៏ត្រូពន្យារពេលមួយឆ្នាំ ឬយូរជាងនឹង ដោយសារការផ្ទុះវីរុសកូរ៉ូណាទូទាំងសកលលោក។
សូមបញ្ជាក់ថា វិរុសកូរ៉ូណា ឬ COVID-19 បានគំរាមកំហែងជីវិតមនុស្សរាប់លាននាក់ ទូទាំងពិភពលោក ចាប់តាំងពីវាផ្ទុះចេញពីប្រទេសចិន កាលពីខែធ្នូ ឆ្នាំមុនមក។ រហូតមកដល់ពេលនេះ មនុស្សច្រើនជាង ១៤.០០០នាក់ ទូទាំងពិភពលោក បានស្លាប់ និងឆ្លងជាង ៣៣០.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia