សៀមរាប៖ កម្លាំងនគរបាលផែនការងារសន្តិសុខ នៃស្នងការដ្ឋាននគរបាលខេត្តសៀមរាប នាំខ្លួនយុវជនម្នាក់បន្ថែមទៀត ក្រោយពីបង្ហោះសារនូវសារសំឡេងនូវព័ត៌មានមិនពិត អំពីមេរោគកូវីដ១៩។
នៅព្រឹកថ្ងៃទី២២ ខែមីនា ឆ្នាំ២០២០ លោកឧត្តមសេនីយ៍ត្រី ហួត សុធី ស្នងការរងទទួលការងារសន្តិសុខ នៃស្នងការដ្ឋាននគរបាលខេត្តសៀមរាប បានឲ្យដឹងថា ដោយមានការឯកភាព ពីលោកស្នងការនគរបាលខេត្តសៀមរាប និងសម្របសម្រួលនីតិវិធី ពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប លោកឧត្តមសេនីយ៍ត្រី ហួត សុធី បានដឹកនាំកម្លាំងការិយាល័យប្រឆាំងបទល្មើសបច្ចេកវិទ្យា សហការជាមួយកម្លាំង នៃអធិការដ្ឋាននគរបាលស្រុកជីក្រែង បានចុះទៅនាំខ្លួនម្ចាស់គណនីហ្វេសប៊ុកឈ្មោះ NgorKav Tong ដែលមានអ្នកប្រើប្រាស់ឈ្មោះ ង៉ោ កាវតុង ភេទប្រុស អាយុ២៣ឆ្នាំ មុខរបរជាងជួសជុលទូរស័ព្ទ ទីលំនៅបច្ចុប្បន្នភូមិកំពង់ក្តី០២ ឃុំកំពង់ក្តី ស្រុកជីក្រែង ខេត្តសៀមរាប ពាក់ព័ន្ធនឹងការបង្ហោះសារសំឡេង នូវព័ត៌មានមិនពិត ដែលបានធ្វើឲ្យបានការភ្ញាក់ផ្អើយដល់ ប្រជាពលរដ្ឋនៅផ្សារកំពង់ក្តី កាលពីថ្ងៃទី១៨ ខែមីនា ឆ្នាំ២០២០កន្លងទៅ ។
ក្រោយការសាកសួររបស់សមត្ថកិច្ច សាមីខ្លួនបានសារភាព និងទទួលស្គាល់នូវទោសកំហុស ហើយសមត្ថកិច្ចក៏បានអប់រំ និងធ្វើកិច្ចសន្យា ព្រមទាំងមានការធានា ពីសំណាក់អាណាព្យាបាល មុនអនុញ្ញាតឲ្យត្រឡប់ទៅគេហដ្ឋានវិញ ៕ដោយ៖កូឡាប