ភ្នំពេញ៖ ឧកញ៉ាវេជ្ជបណ្ឌិត គួច ម៉េងលី បានថ្លែងថា បច្ចុប្បន្នទោះបីប្រជាពលរដ្ឋខ្មែរមានការយល់ដឹងច្រើនពីការប្រើប្រាស់លុយប្រកបដោយប្រសិទ្ធភាពហើយក៏ដោយ ក៏យើងនៅតែសង្កេតឃើញថា មានប្រជាពលរដ្ឋខ្មែរមួយចំនួន ជាពិសេសប្រជាពលរដ្ឋនៅតាមទីជនបទ នៅតែមានទម្លាប់កប់លុយចោលក្នុងផ្ទះជាដដែល។
ឧកញ៉ាវេជ្ជបណ្ឌិត បានសរសេរសារលើផេក MJQ University Press នៅថ្ងៃទី២៣ ខែមីនា ឆ្នាំ២០២០នេះថា តើកប់លុយចោលក្នុងផ្ទះយ៉ាងដូចម្ដេច? គឺពួកគាត់អត់ហ៊ានចាយលុយ អត់ហ៊ានយកលុយទៅធ្វើដើមទុនរកស៊ី ឬធ្វើជំនួញជួញដូរ។ មិនតែប៉ុណ្ណោះ ប្រជាពលរដ្ឋមួយចំនួនទៀត ពួកគាត់សុខចិត្តយកលុយទៅទិញមាស ឬគ្រឿងអលង្ការ ដើម្បីលម្អខ្លួនទៅវិញ។
លោក បានបន្តថា ការយកលុយទៅទិញមាស ឬគ្រឿងអលង្ការដើម្បីលម្អខ្លួន មិនត្រឹមតែធ្វើឱ្យសេដ្ឋកិច្ចជាតិមិនដើរ និងគ្មានផលចំណេញដល់ខ្លួនឯងនោះទេ តែថែមទាំងអាចបង្កឱ្យមានហានិភ័យផ្សេងៗជាច្រើនទៀត ដូចជាប្រឈមនឹងការលួច ប្លន់ ឆក់ និងឆាបឆេះជាដើម។
កាលពីប៉ុន្មានឆ្នាំមុន អ្នកមាននៅតាមទីជនបទមួយចំនួន ពួកគាត់មានលុយច្រើនណាស់ ហើយទុកលុយនៅក្នុងផ្ទះទាំងគីបៗ ដោយមិនហ៊ានចាយវាយផ្ដេសផ្ដាស ឬយកទៅវិនិយោគលើមុខជំនួញ ឬក៏យកទៅផ្ញើនៅធនាគារ ដើម្បីឱ្យមានសុវត្ថិភាពទេ។ លុះពេលមានអគ្គិភ័យឆាបឆេះផ្ទះ លុយកាក់និងគ្រឿងអលង្ការរបស់ពួកគាត់ ទាំងអម្បាលម៉ាន ក៏ឆេះអស់ទៅតាមហ្នឹងដែរ ហើយចុងក្រោយពួកគាត់ក៏ធ្លាក់ខ្លួនក្រលំបាកវេទនា។
ដូច្នេះដើម្បីចូលរួមលើកស្ទួយសេដ្ឋកិច្ចជាតិ ក៏ដូចជាធ្វើឱ្យលុយមានចរន្ត វិលចុះឡើងៗនៅក្នុងសង្គម បើយើងមិនចេះប្រើប្រាស់លុយទាំងនោះ ដើម្បីបង្កើនចំណូលទេ យ៉ាងហោចណាស់ យើងគួរតែយកលុយទាំងនោះ ទៅផ្ញើនៅធនាគារ ដើម្បីទទួលបានការប្រាក់បន្តិចបន្តួចដែរ ឬយើងអាចយកលុយទៅទិញអចលនទ្រព្យទុក ក៏ជាការប្រសើរម្យ៉ាងដែរ។
លោកបានថ្លែងថា យើងត្រូវដឹងថា បើប្រជាពលរដ្ឋយើងមិនប្រើប្រាស់លុយ ឱ្យមានចលនាយ៉ាងសកម្មទេ ពេលនោះសេដ្ឋកិច្ចនឹងធ្លាក់ចុះ ហើយបើសេដ្ឋកិច្ចយើងធ្លាក់ចុះ នោះបរទេសប្រាកដជាមិនហ៊ានចូលមកវិនិយោគទុន នៅក្នុងប្រទេសយើងនោះឡើយ ជាហេតុធ្វើឱ្យប្រជាពលរដ្ឋកម្ពុជាជាច្រើន គ្មានការងារធ្វើ។
តើអ្នកដឹងទេ ថាកាលពីឆ្នាំ២០០៧ សេដ្ឋកិច្ចអាមេរិក ធ្លាក់ចុះជាគំហុក ដោយសារកត្តាអ្វី? គឺដោយសារតែប្រជាពលរដ្ឋអាមេរិក ទុកលុយរៀងៗខ្លួន មិនហ៊ានចាយវាយលុយហ្នឹងឯង។ ដូច្នេះដើម្បីបង្ការកុំឱ្យកម្ពុជា ជួបបញ្ហាដូចសហរដ្ឋអាមេរិក ប្រជាពលរដ្ឋគ្រប់រូប ទាំងអ្នកនៅក្នុងរាជធានីភ្នំពេញ ទាំងអ្នកនៅតាមបណ្ដាខេត្តនានា ត្រូវតែចូលរួមប្រើប្រាស់លុយ ឱ្យមានចលនាយ៉ាងសកម្មទាំងអស់គ្នា ហើយចៀសវាងយកលុយ ទៅចាក់សោទុកចោលក្នុងទូដែក ឬហិបដែក ព្រោះវាគ្មានសុវត្ថិភាពប៉ុន្មានទេ៕ដោយ៖បញ្ញាស័ក្តិ