ភ្នំពេញ ៖ ដើម្បីការពារ ការរីករាលដាលវីរុសកូវីដ១៩ ខណៈដែលគិតត្រឹមថ្ងៃទី២៣ ខែមីនានេះ អ្នកកើតជំងឺកូវីដ១៩ កើនដល់៨៦នាក់ហើយនោះ រដ្ឋបាលរាជធានីភ្នំពេញ ស្នើបងប្អូនប្រជាពលរដ្ឋទាំងអស់ ដែលទើបត្រឡប់មកពីធ្វើការនៅប្រទេសថៃ និងបណ្ដាប្រទេសមួយចំនួនទៀត ត្រូវអនុវត្តន៍តាមការណែនាំចំនួន៤ចំណុច ជាពិសេសស្នាក់នៅដាច់ដោយឡែកចំនួន១៤ថ្ងៃ។
រដ្ឋបាលរាជធានីភ្នំពេញ នៅថ្ងៃទី២៣ ខែមីនា ឆ្នាំ២០២០នេះ បានចេញសេចក្ដីជូនដំណឹង ដល់ប្រជាពលរដ្ឋទាំងអស់ ដែលទើបត្រឡប់មកពី ធ្វើការនៅប្រទេសថៃ និងបណ្ដាប្រទេសផ្សេងៗមួយចំនួនទៀតថាមេរោគកូវីដ១៩ បាននិងកំពុងរាតត្បាតនៅទូទាំងពិភពលោក ដោយឡែកនៅកម្ពុជា ក្រសួងសុខាភិបាល បានរកឃើញអ្នកមានផ្ទុកមេរោគកូវីដ១៩ ចំនួន៨៦ករណី គិតត្រឹមថ្ងៃទី២៣មីនានេះ ហើយមេរោគនេះកំពុងតែបន្តរីករាលដាល់ជាបន្តបន្ទាប់។
រដ្ឋបាលរាជធានីភ្នំពេញ បានណែនាំ ដល់ពលរដ្ឋ ត្រូវទប់ស្កាត់ការរីករាលដាលនៃជំងឺ COVID-19 ហើយរដ្ឋបាលរាជធានីភ្នំពេញ ក៏បានប្រកាសលេខទូរស័ព្ទ ថ្នាក់ដឹកនាំ និងអាជ្ញាធរខណ្ឌទាំង១៤ ក្នុងរាជធានីភ្នំពេញ ដើម្បីឲ្យប្រជាពលរដ្ឋដែលទើបមកពីប្រទេសថៃ និងប្រទេសផ្សេងទៀត រាយការណ៍ពីកន្លែងស្នាក់នៅ ដើម្បីអាជ្ញាធរអាចក្ដោបក្ដាប់ព័ត៌មានបាន និងងាយស្រួលណែនាំបន្ដ៕ដោយ៖កូឡាប