បាត់ដំបង៖ អាជ្ញាធរខេត្តបាត់ដំបង បានកំណត់យកទីតាំងសាលារៀន “វិទ្យាល័យព្រះមុនីវង្ស” ដើម្បីរៀបចំ និងត្រៀមបង្ការទុកជាមុន ដើម្បីទទួលបងប្អូនប្រជាពលរដ្ឋ ដែលស្ម័គ្រចិត្ត និងមកពិគ្រោះទទួលការពិនិត្យ និងការការពារ ដើម្បីប្រយុទ្ធប្រឆាំងពីការរាតត្បាត ឆ្លងជំងឺកូវីដ-១៩ ជាពិសេសបងប្អូនពលករខ្មែរ ដែលមកពីធ្វើការងារនៅប្រទេសថៃ និងប្រទេសផ្សេងៗទៀត។
ព្រឹកថ្ងៃទី ២៣ ខែមីនា ឆ្នាំ២០២០ លោកងួន រតនៈ អភិបាល នៃគណៈអភិបាលខេត្តបាត់ដំបង ព្រមទាំងថ្នាក់ដឹកនាំកងកម្លាំង មន្ទីរជំនាញពាក់ព័ន្ធ បានអញ្ជើញចុះពិនិត្យ និង កំណត់យកទីតាំងសាលារៀន “វិទ្យាល័យព្រះមុនីវង្ស” ដើម្បីរៀបចំ និងត្រៀមបង្ការទុកជាមុន ដើម្បីទទួលបងប្អូនប្រជាពលរដ្ឋ ដែលស្ម័គ្រចិត្ត និងមកពិគ្រោះទទួលការពិនិត្យនិងការការពារ ដើម្បីប្រយុទ្ធប្រឆាំងពីការរាតត្បាត ឆ្លងជំងឺកូវីដ-១៩ ។
លោកអភិបាលខេត្តបាត់ដំបង បានឲ្យដឹងថា ៖ការចុះត្រួតពិនិត្យនិងត្រៀមបម្រុងទុក ទីតាំង ដោយកំណត់យកទីតាំងវិទ្យាល័យព្រះមុនីវង្សនេះ គឺក្នុងគោលបំណង ដើម្បីមានវិធានការ ចាំបាច់ត្រៀមទុកជាមុន ដើម្បីកំណត់យកទីតាំងជាក់លាក់ ក្នុងករណីចាំបាច់ ដើម្បីបង្ការទប់ស្កាត់ ការរាតត្បាតពីជំងឺផ្លូវដង្ហើម (កូវីដ-១៩)។
ជាជំហានដំបូង ក្នុងការត្រៀមបម្រុងនេះ រដ្ឋបាលខេត្តបាត់ដំបង បានកំណត់យកផ្នែកអគារខាងលិច ជាប់របង និងរៀបចំចំនួន ៥បន្ទប់ ផ្នែកជាន់ផ្ទាល់ដី ដើម្បីត្រៀមបម្រុងទុក ក្នុងការទទួលពិគ្រោះ និងផ្តល់សេវា ត្រួតពិនិត្យចំពោះបងប្អូន ដែលស្ម័គ្រចិត្តមកធ្វើតេស្តពីជំងឺឆ្លង( កូវីដ-19) និងបងប្អូនដែលសង្ស័យថា មានពាក់ព័ន្ធមកពីតំបន់ដែលកំពុងតែកើត “ជំងឺឆ្លងកូវីដ-19″ដោយនៅទីនោះ មានការថែទាំ និងការផ្តល់សេវាពិគ្រោះ និងត្រួតពិនិត្យយ៉ាងម៉ត់ចត់ ពីក្រុមគ្រូពេទ្យជំនាញប្រចាំការនៅទីនះ៕ដោយ៖កូឡាប
