ភ្នំពេញ៖ លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានចុះត្រួតពិនិត្យតាមការិយាល័យធ្វើការ របស់បណ្តាផែន និងការិយាល័យជំនាញ នៃស្នងការដ្ឋាននគរបាលរាជធានីភ្នំពេញ ដើម្បីធានាឲ្យបាននូវអនាម័យ និងបរិស្ថានស្អាត ដើម្បីបង្ការ និងទប់ស្កាត់ការឆ្លងរាលដាលវីរុសកូវីដ១៩ ។
ម្យ៉ាងវិញទៀត លោកស្នងការបានណែនាំដល់តាមបណ្តាផែនទាំងអស់ ត្រូវត្រៀមម៉ាស់ និងអាល់កុលដើម្បីផ្តល់ជូនដល់មន្ត្រីតាមការិយាល័យជំនាញ ។
នៅព្រឹកថ្ងៃចន្ទ ទី២៣ ខែមីនា ឆ្នាំ២០២០ ក្រុមការងារបច្ចេកទេសបានមកបាញ់ថ្នាំសម្លាប់មេរោគ នៅស្នងការដ្ឋាននគរបាលរាជធានីភ្នំពេញ ។
មន្ត្រីជំនាញ និង នគរបាលការិយាល័យសុខាភិបាល នៃស្នងការដ្ឋាននគរបាលរាជធានីភ្នំពេញ បានធ្វើការផ្សព្វផ្សាយ អប់រំចំណេះដឹងបង្ការ ទប់ស្កាត់ ជំងឺឆ្លងផ្លូវដង្ហើមកូវីដ១៩ និងបាញ់ថ្នាំកម្ចាត់មេរោគ នៅតាមបណ្តាការិយាល័យជំនាញ កន្លែងធ្វើការងារ របស់មន្ត្រីនគរបាល និងសាលប្រជុំនៅស្នងការដ្ឋាន នគរបាលរាជធានីភ្នំពេញ ដើម្បីចូលរួមអនុវត្តវិធានការបង្ការ ទប់ស្កាត់ ជំងឺឆ្លងផ្លូវដង្ហើមកូវីដ១៩ ដើម្បីចៀសផុតពីការឆ្លងជំងឺដ៏អាក្រក់នេះ។ ខណៈដែលបញ្ហាជំងឺឆ្លងផ្លូវដង្ហើមកូវីដ១៩ ត្រូវគេមើលឃើញថា កំពុងរាតត្បាតនៅតាមប្រទេសជាច្រើន នៅក្នុងពិភពលោក បណ្តាលឱ្យមនុស្សស្លាប់ជាបន្តបន្ទាប់ គួរឱ្យព្រួយបារម្ភ។ ដោយឡែកនៅកម្ពុជា ជំងឺឆ្លងផ្លូវ ដង្ហើមកូវីដ១៩ ក៏បាននិងកំពុងទទួលរងគ្រោះផងដែរ។
ជុំវិញនៃការអនុវត្តវិធានការបង្ការ ទប់ស្កាត់ ជំងឺឆ្លងផ្លូវដង្ហើមកូវីដ១៩ លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ បានគិតគូរខ្ពស់ទៅលើសុខុមាលភាពមន្ត្រីនគរបាលក្រោមឱវាទ ដែលកំពុងបំពេញភារកិច្ច រក្សាការពារសន្តិសុខ សណ្តាប់ធ្នាប់ សុវត្ថិភាពសង្គមនៅក្នុងរាជធានីភ្នំពេញ និងអនុវត្តតាមសេចក្តី ប្រកាសណែនាំពី លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ក៏បានណែនាំដល់មន្ត្រីនគរបាល នៃស្នងការដ្ឋាននគរបាលរាជធានីភ្នំពេញទាំងអស់ ត្រូវអនុវត្តវិធានការអនាម័យ មុនចូលកន្លែងធ្វើការត្រូវលាងដៃ និងអាល់កុល ឬសាប៊ូ ពាក់ម៉ាស់ ត្រូវសម្អាតអនាម័យជានិច្ចនៅ កន្លែងធ្វើការងារ និងត្រួតពិនិត្យសុខភាព និង វាស់កម្តៅក្នុងខ្លួនជាប្រចាំ ។ បានផ្អាកជាបណ្តោះអាសន្ន នៃកិច្ចប្រជុំ ការសំណេះសំណាល ឬសិក្ខាសាលាដែលមាន លក្ខណៈទ្រង់ទ្រាយធំ។ ក៏បានចាត់មន្ត្រីការិយាល័យសុខាភិបាល ចុះផ្សព្វផ្សាយអប់រំ អំពីវិធានការបង្ការទប់ស្កាត់ជំងឺឆ្លងផ្លូវដង្ហើមកូវីដ១៩ នៅតាមអង្គភាព នានាចំណុះ ស្នងការដ្ឋាននគរបាលរាជធានីភ្នំពេញ ជូនដល់មន្ត្រីនគរបាលទាំងអស់ ឱ្យបានយល់ដឹង ហើយនាំគ្នាចូលរួមអនុវត្តវិធានការ បង្ការជំងឺឆ្លងនេះ ឱ្យមានប្រសិទ្ធភាពបំផុត។
បើតាមនាយកដ្ឋានប្រយុទ្ធនឹងជំងឺឆ្លង CDC បានផ្សាយព័ត៌មានថា រហូតម៉ោង ១០ព្រឹក ថ្ងៃទី ២៣ មីនា ២០២០ យើងរកឃើញអ្នកជំងឺ COVID-19 សរុបទាំងអស់ចំនួន ៨៦ករណី។ រហូតពេលនេះយើងបានព្យាបាលជាពីរនាក់ហើយ គឺជនជាតិចិន១នាក់ និងជនជាតិអង់គ្លេស១នាក់ ។ យើងពុំទាន់រកឃើញភ័ស្តុតាងបញ្ជាក់ថា មានការឆ្លងក្នុងសហគមន៍នៅឡើយទេ តែលទ្ធភាពនឹងអាចកើតមានឡើង៕ដោយ៖កូឡាប
