តាកែវ៖ ដើម្បីឆ្លើយតបទៅនឹងការការពារពីការរីករាលដាល ក៏ដូចជាការត្រៀមលក្ខណៈទុកជាមុន ក្នុងការបង្ការ នឹងការពារនូវជំងឺផ្លូវដង្ហើមដ៏កាចសាហាវ គឺជំងឺកូវីដ១៩ លោក អ៊ូច ភា អភិបាលខេត្តតាកែវ នៅព្រឹកថ្ងៃចន្ទ ទី២៣ ខែមីនានេះ បានដឹកនាំមន្ត្រីជំនាញពាក់ព័ន្ធ ចុះទៅពិនិត្យមើលអគារអន្តេវាសិកដ្ឋាន ដែលជាអគារសម្រាប់ស្នាក់នៅរបស់គរុសិស្ស នៅមជ្ឈមណ្ឌលគរុកោសល្យភូមិភាគតាកែវ កម្ពស់៣ជាន់ មាន៦០បន្ទប់ ត្រៀមទុកជាមុន សម្រាប់ព្យាបាល និងដាក់ដាច់ដោយឡែកចំពោះអ្នកដែលសង្ស័យ ឬមានផ្ទុកជំងឺកូវីដ១៩នេះ ។
មានប្រសាសន៍នាឱកាសនោះ ឯកឧត្តម អ៊ូច ភា អភិបាលនៃគណៈអភិបាលខេត្តតាកែវ បានមានប្រសាសន៍ថា ដោយមាការណែនាំដ៏ខ្ពស់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា គឺឲ្យខេត្តនីមួយៗ ត្រៀមលក្ខណសម្បតិ្ត ក្នុងការរៀបចំ និងរកទីកន្លែង ដើម្បីត្រៀមបង្ការក្នុងករណី ដែលជំងឺកូវីដ១៩ផ្ទុះឡើង នៅខេត្តណា ខេត្តនោះ ត្រូវរកកន្លែងសម្រាប់ដាក់អ្នកជំងឺកូវីដនេះ ដាច់ដោយឡែក និងព្យាបាលពួកគាត់ ។
លោក អ៊ូច ភា បានគូសបញ្ជាក់ទៀតថា សម្រាប់ខេត្តតាកែវ យើងមានអគារអន្តេវាសិកដ្ឋាន ដែលជាអំណោយរបស់សម្តេចតេជោ ត្រៀមទុកសម្រាប់អ្នកសង្ស័យ កើតមានជំងឺកូវីដ១៩នេះ ហើយតាមការពិនិត្យជាក់ស្តែងថ្ងៃនេះ យើងបានពិនិត្យឃើញថា អគារស្នាក់នៅរបស់គរុសិស្សនេះ មានបន្ទប់នីមួយៗ ដែលមានបំពាក់រួចជាស្រេច នូវទឹក ភ្លើង បន្ទប់ទឹក កង្ហារជាដើម ប៉ុន្តែបន្ទប់នីមួយៗមិនទាន់ស្អាត ដូច្នោះហើយយើងនឹងសម្អាតអគារនេះឲ្យស្អាត នឹងមានអនាម័យ ពិសេសគឺបាញ់ថ្នាំសម្លាប់មេរោគឲ្យអស់សិន ហើយនឹងឲ្យមន្ទីរសុខាភិបាលខេត្ត បញ្ជូនគ្រែ ព្រមទាំងសម្ភារៈ និងបរិក្ខារពេទ្យមួយចំនួនថែមទៀតផង មកអគារនេះ ដើម្បីបានទាន់សភាពការណ៍ ពោលគឺធ្វើយ៉ាងណា យើងបានបង្ការ និងការទុកជាមុនជានិច្ច កុំឲ្យរីករាលដាលកាន់តែធំ។
លោកអភិបាលខេត្ត បន្ថែមទៀតថា ដោយឡែកចំពោះពលករ ដែលពួកគាត់វិលត្រឡប់មក ពីប្រទេសថៃវិញ លោកក៏បានជូនដំណឹងទៅកាន់អាជ្ញាធរមូលដ្ឋាន ឲ្យមានការស្រាវជ្រាវ និងចាត់វិធានការបន្ទាន់ ដោយឲ្យពួកគាត់នៅដាច់ដោយឡែក ពីក្រុមគ្រួសាររយៈពេល១៤ថ្ងៃ ដូចអ្វីដែលក្រសួងសុខាភិបាល បានប្រកាស ព្រោះយើងមិនបានដឹងថា ពួកគាត់មានផ្ទុក ឬមិនមានជំងឺកូវីដ១៩នេះទេ ប៉ុន្តែប្រសិនបើមានករណីសង្ស័យណាមួយ មន្ទីរសុខាភិបាលខេត្ត ក៏ដូចជាមន្ទីរពេទ្យបង្អែករបស់ខេត្ត នឹងទៅដល់ភ្លាមៗតែម្តង ៕ដោយ៖តាកែវ
