ភ្នំពេញ៖ រដ្ឋមន្ត្រីក្រសួងការងារ បានបញ្ជាក់ថា វិទ្យាស្ថាននេះ ជាថ្នាក់បណ្តុះបណ្តាលសេវាថែទាំមនុស្សចាស់ដំបូងបំផុតនៅកម្ពុជា ក្នុងការបណ្តុះបណ្តាលសេវាថែទាំមនុស្សចាស់ដល់ពលករកម្ពុជា ដែលនឹងទៅបម្រើការងារលើសេវាថែទាំមនុស្សចាស់នៅប្រទេសជប៉ុន និងជាដៃគូដំបូងបំផុតក្នុងការសហការជាមួយនឹងក្រសួងការងារ និងបណ្តុះបណ្តាលវិជ្ជាជីវៈ។
នៅព្រឹកថ្ងៃព្រហស្បតិ៍ទី១៨ ខែមករា ឆ្នាំ២០១៨ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានទទួលជួបលោក Kondo Yoshio ប្រធានក្រុមហ៊ុន Procast (CAMBODIA) Co., Ltd. ដើម្បីពិភាក្សាពីការបង្កើតវិទ្យាស្ថានបណ្តុះបណ្តាលសេវាថែទាំមនុស្សចាស់ និងការបញ្ជូនកម្មសិក្សាការីទៅបម្រើការងារនៅប្រទេសជប៉ុន នាទីស្តីការក្រសួង។
ក្នុងជំនួបនោះ លោក Kondo Yoshio បានថ្លែងថា វិទ្យាស្ថានថែទាំមនុស្សចាស់នេះ នឹងបណ្តុះបណ្តាលដល់សិក្ខាកាមកម្ពុជា ដែលមានបំណងចង់ទៅធ្វើការនៅប្រទេសជប៉ុនឲ្យយល់ដឹងពីវិធីសាស្រ្តមើលថែទាំមនុស្សចាស់បានយ៉ាងល្អ ដែលក្នុងនោះមានការបណ្តុះបណ្តាលជាភាសាជប៉ុន ចិត្តវិទ្យាក្នុងការថែទាំមនុស្សចាស់ និងការសង្គ្រោះបឋមជាដើម ចំពោះគ្រូបណ្តុះបណ្តាល សុទ្ធតែជាគ្រូជនជាតិជប៉ុន។
ជាមួយគ្នានោះដែរ លោក Kondo yoshio ក៏បានជម្រាបជូនឯកឧត្តមរដ្ឋមន្ត្រីថា ក្រុមហ៊ុនរបស់លោកបានបញ្ជូនពលករកម្ពុជាទៅបម្រើការងារនៅជប៉ុនបាន២០០នាក់រួចមកហើយ ហើយក្រុមហ៊ុនគ្រោងនឹងបង្កើនឲ្យដល់៣០០នាក់ នៅឆ្នាំ២០១៨នេះ។ លោកលើកឡើងទៀតថា ដោយសារតែមានកិច្ចសហការល្អជាមួយក្រសួងការងារ និងបណ្តុះបណ្តាលវិជ្ជាជីវៈ ទើបក្រុមហ៊ុនបញ្ជូនកម្មសិក្សាការីក្នុងចំនួននេះ ប្រព្រឹត្តទៅដោយជោគជ័យ។
ជាការឆ្លើយតបលោករដ្ឋមន្ត្រីបានសាទរ ចំពោះវិទ្យាស្ថានថែទាំមនុស្សចាស់នេះ ហើយលោករដ្ឋមន្ត្រីថា វិទ្យាស្ថាននេះជាថ្នាក់បណ្តុះបណ្តាលសេវាថែទាំមនុស្សចាស់ដំបូងបំផុតនៅកម្ពុជា ក្នុងការបណ្តុះបណ្តាលសេវាថែទាំមនុស្សចាស់ដល់ពលករកម្ពុជា ដែលនឹងទៅបម្រើការងារលើសេវាថែទាំមនុស្សចាស់នៅប្រទេសជប៉ុន និងជាដៃគូដំបូងបំផុតក្នុងការសហការជាមួយនឹងក្រសួងការងារ និងបណ្តុះបណ្តាលវិជ្ជាជីវៈ។ ជាមួយគ្នានោះលោករដ្ឋមន្ត្រីបានប្រៀបធៀបសមត្ថភាពរបស់សិក្ខាកាម ដែលទទួលបានការបណ្តុះបណ្តាលនៅក្នុងវិទ្យាស្ថាននេះថា មានសមត្ថភាពប្រហាក់ប្រហែលនឹង គិលានុប្បដ្ឋាកយិកាដែរ។ ចំពោះក្រុមហ៊ុន ដែលមានគម្រោងបង្កើនចំនួនកម្មសិក្សាការីទៅបម្រើការងារនៅជប៉ុនឲ្យបាន៣០០នាក់នោះ លោករដ្ឋមន្ត្រីសាទរ ចំពោះការប្តេជ្ញារបស់ក្រុមហ៊ុន ហើយលោករដ្ឋមន្ត្រីស្នើដល់ក្រុមហ៊ុនបង្កើន ចំនួនការបញ្ជូនពលករកម្ពុជាទៅបម្រើការងារនៅប្រទេសជប៉ុនឲ្យបានច្រើនជាងនេះបន្ថែមទៀត។
លោកមានប្រសាសន៍បន្តថា តាមរយៈការចុះហត្ថលេខាលើអនុស្សរណៈនៃការយោគយល់គ្នាស្តីពី ការបញ្ជូនកម្មសិក្សាការីបច្ចេកទេសទៅធ្វើកម្មសិក្សា និងធ្វើការនៅខេត្តអិហ៊ិម៉ិ នៃប្រទេសជប៉ុន កាលពីពេលថ្មីៗនេះ នឹងជួយឲ្យក្រុមហ៊ុន Procast (CAMBODIA) Co., Ltd។ នេះអាចបង្កើនចំនួនកម្មសិក្សាការីទៅបម្រើការងារនៅប្រទេសជប៉ុនបានកាន់តែច្រើនបន្ថែមទៀត ព្រោះក្រុមហ៊ុនមានបទពិសោធន៍គ្រប់គ្រាន់ ដើម្បីអនុវត្តនៃនីតិវិធីនៃការបញ្ជូនកម្មសិក្សាការីនេះរួចមកហើយ៕ ដោយ៖បញ្ញាស័ក្តិ
