ភ្នំពេញ៖ អ្នកនាំពាក្យ ក្រសួងសុខាភិបាល បានអះអាងថា ស្ត្រីវ័យចំណាស់ជនជាតិអង់គ្លេស ដែលជាមនុស្សពិការនោះ មានផ្ទុកជំងឺកូវីដ១៩ ហើយបានព្យាបាលជំងឺនៅមន្ទីរពេទ្យរ៉ូយ៉ាល់រតននោះ បានជាសះស្បើយហើយ និងត្រូវបានអនុញ្ញាតឲ្យចាកចេញពីមន្ទីរ ក្រោមកិច្ចសម្របសម្រួលពីស្ថានទូតអង់គ្លេសប្រចាំកម្ពុជា។
លោកស្រី ឱ វណ្ណឌីន អ្នកនាំពាក្យ និងជារដ្ឋលេខាធិការក្រសួងសុខាភិបាល បានថ្លែងសារប្រាប់អ្នកសារព័ត៌មានកាលពីថ្ងៃទី២៣ខែមីនានេះថា “ស្ត្រីវ័យចំណាស់ជនជាតិអង់គ្លេស គឺបានជាសះស្បើយហើយ ហើយគាត់ត្រូវបានអនុញ្ញាតឲ្យចាកចេញពីមន្ទីររួចហើយ រីឯការចាត់ចែងចង់បែបណាបែបណីនោះ គឺខាងស្ថានទូតអង់គ្លេសប្រចាំកម្ពុជា ជាអ្នកសម្របសម្រួល ចាត់ចែង “លោកស្រី អ្នកនាំពាក្យ បានលើកឡើងថា “ខាងស្ថានទូតអង់គ្លេស មិនអនុញ្ញាតឲ្យយើងទៅរវីរវល់យ៉ាងណាយ៉ាងណីទេ ពីព្រោះគេអត់ឲ្យយើងផ្សាយ គេអត់ឲ្យយើងថត គេមិនអនុញ្ញាតឲ្យយើងការងារអ្វីទាំងអស់ គឺទុកជូនខាងស្ថានទូតអង់គ្លេសជាអ្នកសម្របសម្រួល”។
លោកវេជ្ជបណ្ឌិត បានបន្ថែមទៀតថា មកដល់ពេលនេះ នៅកម្ពុជាយើងមិនទាន់មានអ្នកជំងឺកូវីដ១៩ មានសភាពធ្ងន់ធ្ងរហើយវិលទៅរកស្ថានភាពបាត់បង់ជីវិតនោះទេ គឺនិយាយជារួម មិនទាន់មានអ្នកស្លាប់ ដោយសារជំងឺកូវីដ១៩នោះទេ។
ស្ត្រីជនជាតិ អង់គ្លេស អាយុ៦៥ឆ្នាំដែលមានផ្ទុកជំងឺកូវីដ១៩ ត្រូវបានបញ្ជូនមកព្យាបាលនៅភ្នំពេញដោយមានការឯកភាព សាមីខ្លួន អង្គការសុខភាពពិភពលោក និងស្ថានទូតអង់គ្លេសប្រចាំកម្ពុជា។ អាជ្ញាធរខេត្តកំពង់ចាម បានបញ្ជូនអ្នកជំងឺដែលជាស្ត្រីជនជាតិអង់គ្លេស អាយុ៦៥ឆ្នាំដែលមានផ្ទុកជំងឺកូវីដ១៩ ទៅមន្ទីរពេទ្យនៅភ្នំពេញ តាមសំណូមពររបស់សាមីខ្លួនដែលជាអ្នកជំងឺ ក្រោមការសម្របសម្រួលរបស់អង្គការសុខភាពពិភពលោកនិងអង្គការCDC របស់សហរដ្ឋអាមេរិក ដោយមានការគាំទ្រពីស្ថានទូតអង់គ្លេសប្រចាំកម្ពុជាផងដែរ។
គួរបញ្ចាក់ផងដែរថា នៅលើនាវា Viking Cruise Journey សរុបទាំងអស់មានចំនួន ៦៤នាក់ (អ្នកដំណើរចំនួន ៣០ នាក់ និងអ្នកបម្រើការចំនួន ៣៤ នាក់) ក្នុងនោះ មានស្រីចំនួន ២៣នាក់ និងបុរស ៤១នាក់ ។ នៅលើនាវានោះ មានប្រាំពីរសញ្ជាតិ គឺអាមេរិក ១៤នាក់ (ស្រី៧ ប្រុស៧) ចក្រភពអង់គ្លេស ១១ នាក់ (ស្រី៧ ប្រុស៤) កាណាដាបួន នាក់ (ស្រី២ ប្រុស២) ហូឡង់ មួយនាក់ (ស្រី) ភូមា មួយនាក់ (ប្រុស) វៀតណាមប្រាំពីរនាក់ (ប្រុស) និងកម្ពុជា ២៤ នាក់ (ស្រី៦ ប្រុស១៨)៕ ដោយ ៖ កូឡាប