ស្ទឹងត្រែង:ពលរដ្ឋចំនួន៨នាក់ជាអ្នកស៊ីឈ្នួលកាប់ព្រៃឲ្យឧត្តមសេនីយ៍ទោយោធាម្នាក់ត្រូវតុលាការខេត្តស្ទឹងត្រែងចោទប្រកាន់ឃុំខ្លួនដាក់ពន្ធនាគារពាក់ព័ន្ធសំណុំរឿងកាប់ទន្ទ្រានព្រៃដើម្បីយកដីរដ្ឋដោយខុសច្បាប់។
ក្រោយពីឃុំខ្លួននៅថ្ងៃទី២៣ខែមីនាឆ្នាំ២០២០នេះក្រុមគ្រួសារសាច់ញាតិស្វែងរកកិច្ចអន្តរាគមន៍ពីអាជ្ញាធរស្នើសុំឲ្យតុលាការលើកលែងការចោទប្រកាន់ដោះលែងពលរដ្ឋ៧នាក់ជាប់ឃុំមកវិញ ដោយទុកតែមេការម្នាក់ប៉ុណ្ណោះ។
ជនជាប់ចោទ មានឈ្មោះទី១.ស៊ុន សុវ៉ាត ទី២.សៀ មើន ទី៣.នេត លុន ទី៤.លុន ឆាន់ ទី៥.ឡាច ឆេន ទី៦.ឡៅ ចន្ថាទី៧.កែវ ស៉ីភូរ។ ពួកគាត់រស់នៅ ភូមិអូរត្រែល ឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែង។
សូមបញ្ជាក់ថា សមត្ថកិច្ចចម្រុះមានជំនាញរដ្ឋបាលព្រៃឈើបរិស្ថាននគរបាល ឃាត់ខ្លួនពលរដ្ឋនិងមេការកាប់ព្រៃយកដីរដ្ឋត្រង់ចំណុចអូរចង្ហាស្ថិតក្នុងភូមិស្រឡៅឃុំអន្លង់ជ្រៃស្រុកថាឡាបរិវ៉ាត់ខេត្តស្ទឹងត្រែងក្បែរព្រំប្រទល់ជាប់ស្រុកឆែបខេត្តព្រះវិហារ។
ពលរដ្ឋប្រាំពីរនាក់បានទៅសុីឈ្នួលកាប់ព្រៃឲ្យឧត្តមសេនីយ៍យោធាម្នាក់ដើម្បីយកដីក្នុងតម្លៃ៤០មុឺនរៀលមួយហិកតាតាមរយៈមេការម្នាក់ឈ្មោះលាង គឹមសាន ហើយមន្ត្រីជំនាញរដ្ឋបាលព្រៃឈើមន្ដ្រីបរិស្ថាននគរបាលក៏បានចុះទៅឃាត់ខ្លួន បញ្ជូនទៅមន្ទីរបរិស្ថានខេត្តនៅថ្ងៃទី១៦ខែមីនាដើម្បីបន្តនីតិវិធីទៅតុលាការ។ បន្ទាប់មកនៅថ្ងៃទី១៨ខែមីនា តុលាការបានចេញដីការឃុំខ្លួនក្នុងសំណុំរឿងកាប់ទន្ទ្រានព្រៃឈើដោយខុសច្បាប់។
លោកលុន វុទ្ថា ត្រូវជាបងប្រុសជនជាប់ចោទក្នុងចំណោមប្រាំពីរនាក់បាននិយាយថាអ្នកភូមិប្រាំពីរនាក់សុទ្ធតែជាគ្រួសារក្រីក្រ។ គាត់ទៅស៉ីឈ្នួលកាប់ចម្ការឲ្យគេ មិនមែនទៅកាប់ព្រៃយកដីខ្លួនឯងទេ៕ ដោយ៖បញ្ញាស័ក្តិ
