ប្រិយមិត្តជាច្រើន ប្រហែលជាបានជ្រាបរួចហើយ ទាក់ទងនឹងរឿងរ៉ាវឌឺដងដ៏ក្តៅមួយរវាងលោក ផែង វណ្ណៈ ទៅកាន់តារាកំប្លែងនាយ ពាក់មី បន្ទាប់ពីនាយបានបង្ហោះសារ និងរូបភាពទៅស្រុកជីកក្តាម ខណៈកម្មវិធីខនសឺតត្រូវបានលប់ចោល ដើម្បីចូលរួមទប់ស្កាត់ការរីករាលដាលនៃជំងឺកូវីដ-១៩ ។
យ៉ាងណាមិញ ក្រោយលោក ផែង វណ្ណៈ បានធ្វើការរិះចំពោះសារហាក់សំដៅត្អូញត្អែរពីការធ្លាក់ចុះនៃប្រាក់ចំណូលខាងលើនេះ នាយ ពាក់មី ក៏បានចេញវីដេអូផ្ញើជូនលោក ផែង វណ្ណៈ ជាពិសេស ដោយនាយបានលើកឡើងថា គ្រាន់តែបង្ហោះរូបសប្បាយៗលក្ខណៈឯកជន ទៅលេងស្រុកជីកក្តាមឲ្យបងប្អូនមើលកម្សាន្ត ក្រោយសម្រាកពីការងារខោនសឺតចឹងសោះ បែរជាលោក ផែង វណ្ណៈ យករឿងតូចតាចកំប៉ិចកំប៉ុកមួយនេះមកផុសម្តងហើយម្តងទៀតធ្វើដូចជារឿងធំដុំអ៊ីចឹង ធ្វើឲ្យគេរិះគន់ស្អប់ខ្ពើមតារាជាខ្លាំង។
នាយ ពែកមី ក៏បានបញ្ជាក់ថា រូបលោកក៏ជាប្រជាពលរដ្ឋម្នាក់ដែរ មានសិទ្ធិធ្វើរឿងឯកជនដូចបងប្អូនដទៃទៀត ហើយក៏មិនធ្វើឲ្យប៉ះពាល់ដល់បងប្អូនណាដែរ ។ លោកបន្តថា ករណីកូវីដ-១៩ គេបង្ហោះផ្សព្វផ្សាយព្រោងព្រាតឲ្យមានការការពារ និងទប់ស្កាត់ ចេះគិតអីតែលោក ផែង វណ្ណៈ គេដទៃមិនចេះខ្លាចអី?….។
បើទោះជានាយ ពាក់មី ចេញវីដេអូខំនិយាយបកស្រាយយ៉ាងណា ក៏រឿងមួយនេះហាក់ពុំបញ្ចប់នោះទេ ដោយកាលពីពេលថ្មីៗនេះ លោក ផែង វណ្ណៈ នូវបានបន្តផ្ញើសារឧបត្ថម្ភឌឺដងដល់តារាកំពុងខ្វះខាតមួយចំនួន ប៉ុន្តែមិននិយាយចំទៅលើនាយ ពាក់មី នោះទេ ។ ក្នុងនោះ លោកបានឧបត្ថម្ភបែបចំអកឲ្យតារាខ្វះខាតមួយចំនួនតូចរួមមាន៖ អង្ករ ៤ កំប៉ុង មី ២ កញ្ចប់ ថវិកា ២ ដុល្លារ ។
តាមរយៈសារមួយនេះ លោកចង់ផ្តាំផ្ញើទៅតារាៗមួយចំនួន ដែលធ្លាប់បង្អួតផ្ទះ ឡានទំនើបៗ មុននឹងធ្វើអ្វីៗត្រូវចេះគិត ព្រោះថាពេលនេះមិនមែនជួបប្រទះបញ្ហាតែពួកតារាប៉ុន្មាននាក់ប៉ុណ្ណោះទេ គឺមានប្រជាជនខ្មែរក្រីក្រច្រើនណាស់ ក៏កំពុងជួបផលប៉ះពាល់សេដ្ឋកិច្ច ពោលគឺករណីផ្ទុះវីរុសកូវីដ-១៩ នេះ បានធ្វើឲ្យប៉ះពាល់ការធ្លាក់ចុះប្រាក់ចំណូលប្រជាជនទូទាំងពិភពលោកតែម្តង ៕ ដោយ៖ លឹម ហុង