ភ្នំពេញ៖ លោកហេង សួរ អ្នកនាំពាក្យក្រសួងការងារបណ្តុះបណ្តាលនិងវិជ្ជាជីវៈ បានថ្លែងសារលើហ្វេសប៊ុក នៅថ្ងៃទី២៤ ខែមីនា ឆ្នាំ២០២០នេះថា សូមបងប្អូនដែលទើបត្រឡប់មកពីបរទេស បន្តរស់នៅ ហូបចុក និងប្រើប្រាស់សម្ភារៈដោយឡែកពីអ្នកផ្ទះរបស់អ្នក និងពាក់ម៉ាស ឲ្យបានគ្រប់14ថ្ងៃ ទើបមិននាំទុក្ខដល់គ្រួសារ ។
លោកអ្នកនាំពាក្យ បានបញ្ជាក់បន្ថែមទៀតថា “ខ្ញុំក៏សូមលើកទឹកចិត្ត និងរំលឹកបងប្អូនប្រជាពលរដ្ឋ ជាពិសេសបងប្អូនកម្មករនិយោជិត ដែលមានសាច់ញាតិ ឬមិត្តភក្តិទើបមកពីបរទេស សូមមេត្តាកុំឱបថើប ឬចាប់ដៃគ្នាពេលជួបគ្នា”។
លោកបានបន្ថែមថា ពេលត្រឡប់ពីធ្វើការទៅដល់ផ្ទះ សូមកុំហូបបាយ ឬប្រើរបស់របររួមគ្នាជាមួយសាច់ញាតិ ដែលទើបមកពីបរទេស។ សូមកុំបោកខោអាវរួមគ្នា, កុំដេកមុងជាមួយគ្នា ហើយត្រូវពាក់ម៉ាស ពេលនិយាយជាមួយសាច់ញាតិនោះ និងត្រូវឈរ ឬអង្គុយឃ្លាតគ្នាឲ្យបានលើសពី ១មែត្រ ពីគ្នា។ ផ្ទះយើងមានសុវត្ថិភាព គ្រប់រោងចក្រ និងកន្លែងការងារ យើងនឹងកាន់តែមានសុវត្ថិភាព!។
រោងចក្រមានសុវត្ថិភាពហើយ បើផ្ទះ ឬកន្លែងស្នាក់នៅយើងគ្មានសុវត្ថិភាពនោះ នឹងធ្វើឲ្យខ្លួនយើងអត់សុវត្ថិភាពដែរ។ សូមចូលរួមឃ្លាំមើល និងឧស្សាហ៍ដាស់តឿន អ្នកធ្វើការរោងចក្រ ជាមួយគ្នា ឲ្យយកចិត្តទុកដាក់ការពារខ្លួនពេលនៅផ្ទះផង៕ ដោយ៖កូឡាប
