ខេត្តស្វាយរៀងៈ បុរសជនសង្ស័យជនជាតិវៀតណាម ចំនួន២នាក់ ត្រូវបានកម្លាំងសមត្ថកិច្ច នៃកងរាជអាវុធហត្ថក្រុងបាវិត ធ្វើការឃាត់ខ្លួនបានជាបន្តបន្ទាប់ នៅវេលាម៉ោង៤រសៀល ថ្ងៃទី២៣ ខែមីនា ឆ្នាំ២០២០។
សមត្ថកិច្ចបានឱ្យដឹងថាៈ កម្លាំងមូលដ្ឋានអាវុធហត្ថក្រុងបាវិត ចំនួន៥នាក់ រថយន្ដ១គ្រឿង ដឹកនាំដោយលោកវរសេនីយ៍ទោ ខាំ ណាន មេបញ្ជាការមូលដ្ឋានអាវុធហត្ថក្រុងបាវិត ឃាត់ខ្លួនជនសង្ស័យចំនួន១នាក់ ឈ្មោះ ឡេ យ៉ាំងឡា (ហៅ វី) ភេទប្រុស អាយុ ២៨ឆ្នាំ ជនជាតិវៀតណាម មុខរបរ ជាងកាត់សក់ និងអ៊ុតសក់ ស្នាក់នៅបន្ទប់ជួល ស្ថិតក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង បន្ទាប់ពីសាកសួររូបគេ បានសារភាពថា បានទិញគ្រឿងញៀនពីឈ្មោះ ហៀង រហូតដល់វេលាម៉ោង១៤និង១០នាទី ទើបកម្លាំងមូលដ្ឋានកងរាជអាវុធហត្ថក្រុងបាវិត ឃាត់ខ្លួនជនសង្ស័យបានម្នាក់ទៀត ឈ្មោះ វៀង យ៉ាំងហ៊ាង ភេទប្រុស អាយុ ៣១ឆ្នាំ ជនជាតិវៀតណាម ស្នាក់នៅបន្ទប់ជួលផ្លូវវត្តតាឡុក ស្ថិតក្នុងភូមិបាវិតកណ្ដាល សង្កាត់បាវិត ក្រុងបាវិត ខេត្តស្វាយរៀង។
ប្រភពដដែលបានបន្តថា វត្ថុតាងចាប់យករួមមាន ម្សៅក្រាមពណ៌សថ្លាចំនួន ២កញ្ចប់ ប្រាក់ដុងចំនួន ៤.០០០.០០០ដុង ប្រាក់ដុល្លារចំនួន ១០ដុល្លារ ទូស័ព្ទម៉ាក iphone6 ចំនួន៣គ្រឿង បង្កាន់ដៃទទួលស្គាល់ជនបរទេសអន្ដោប្រវេសន៍ចំនួន១សន្លឹក។
បច្ចុប្បន្ន ជនសង្ស័យ កំពុងកសាងសំណុំរឿង បញ្ជូនទៅមន្ទីរយុត្តិធម៌អាវុធហត្ថខេត្តស្វាយរៀង ចាត់ការតាមនីតិវិធី ៕ដោយ៖ វ៉ៃកូ