ខេត្តស្វាយរៀង៖ មហាជនក៏ដូចមន្ត្រីរាជការ មានការហួសចិត្តដែលលោកផ្កាយបីម្នាក់ បានយកគ្រឿងចក្រទៅជីរណ្តៅដី ក្នុងព្រែកអូរស្មាច់ ដៃទន្លេវ៉ៃគោ យកអាចម៍ដីចាក់ហ៊ុមព័ទ្ធយកដីធ្វើជាកម្មសិទ្ធិ និងយកអាចម៍ដីទៅចាក់រំលោភយកចំណីព្រែក និងផ្លូវលំសាធារណៈ រួចបិទផ្លូវសាធារណៈ យកធ្វើជាកម្មសិទ្ធិ ដែលមានទំហំប្រមាណ៥ហិកតា ក្នុងនោះហ៊ុមព័ទ្ធធ្វើជាស្រះចំនួន៦ស្រះ និងចាក់ដីលើកជាភូមិគ្រឹះ និងផ្ទះទឹកជារមណីយដ្ឋាន ដែលលោកអភិបាលខេត្តស្ថាយរៀង បានឲ្យផ្អាកម្តងរួចមកហើយ ដើម្បីដោះស្រាយ និងឲ្យគណៈកម្មការមន្ទីរជំនាញ ចុះវាស់វែងផល់ប៉ះពាល់ដីព្រែក ដីចំណីព្រែក ដីអូរនិងផ្លូវលំសាធារណៈ ក៏ប៉ុន្តែខណៈអាជ្ញាធរ កំពុងមមាញឹកពិនិត្យទប់ស្កាត់ការឆ្លងរាលដាលវីរុសកូវីដ១៩ ក្រុមលោកផ្កាយបី បានបញ្ជាឲ្យគ្រឿងចក្រលួចធ្វើសកម្មភាព ជីករណ្តៅដីជ្រៅដល់ក្បាលប្រេត យកអាចម៍ដីចាក់លុបអូរ លប់ចំណីព្រែក និងចាក់លុបផ្លូវលំសាធារណៈបិទផ្លូវ យកធ្វើជាកម្មសិទ្ធិតែម្តង។
ករណីនេះ បានកើតឡើងពីថ្ងៃទី២០មីនា មកដល់ថ្ងៃទី២៣ ខែមីនា ឆ្នាំ២០២០ វេលាម៉ោង១១និង០០នាទីព្រឹក នៅចំណុចស្ពានអូរស្មាច់ព្រែកទន្លេវ៉ៃគោ ដល់ភូមិតាស្អាង ឃុំកំពង់ចម្លង ស្រុកស្វាយជ្រំ បណ្តោយប្រមាណ១គីឡូម៉ែត្រ លើផ្ទៃដីប្រមាណ៥ហិកតា។
ទាក់ទិនករណីខាងលើនេះដែរ លោកហែម ពិសិដ្ឋ អភិបាលរងខេត្តស្វាយរៀង បានមានប្រសាសន៍ លោកបានឲ្យលោកអភិបាលស្រុកស្វាយជ្រំ លោកមេឃុំកំពង់ចម្លង និងលោកប្រធានមន្ទីររ៉ែ និងឋាមពលខេត្ត ចុះទៅឲ្យផ្អាកសកម្មភាពជីក យកអាចម៍ដី និងចាក់យកចំណីអូរ និងចំណីព្រែកបន្តទៅទៀត រង់ចាំគណៈកម្មការចុះពិនិត្យវាស់វែង ពីផលប៉ះពាល់ដីព្រែកសាធារណៈ មានមន្ទីរធនធានទឹក មិននឹកស្មានថា គេឆ្លៀតឱកាស ពេលអាជ្ញាធរមមាញឹក ចុះពិនិត្យតាមច្រកទ្វាព្រំដែនអន្តរជាតិ ដើម្បីទប់ស្កាត់វីរុសកូវីដ១៩ បែរជាពួកគេហ៊ានធ្វើសកម្មភាពបន្តទៀត ដូច្នេះលោក នឹងចុះទៅពិនិត្យ និងឲ្យលោកមេឃុំ និងលោកអភិបាលស្រុក ចុះទៅហាមឃាត់ម្តងទៀត។
សូមបញ្ជាក់កាលពីថ្ងៃទី១២ មីនា ២០២០ លោកអភិបាលខេត្តស្វាយរៀង បានចេញបញ្ជាឲ្យឈ្មោះទេពចំរើន សាមឌី ឋានៈឧត្តមសេនីយ៍ឯក ដែលជាម្ចាស់ដី ដែលមានទីលំនៅរាជធានីភ្នំពេញ ផ្អាកសកម្មភាពយកគ្រឿងចក្រ ជីករណ្តៅយកអាចម៍ដី និងដឹកយកអាចម៍ដី ចាក់លុបចំណីព្រែកទន្លេវ៉ៃគោ ចំណុចអូស្មាច់បន្តទៀត ការផ្អាកបានតែមួយចម្អិនកំពឹស ឆ្លៀតឱកាសអាជ្ញាធររវល់ករណីទប់ស្កាត់វីរុសកូវីដ១៩ ពួកគេលួចធ្វើសកម្មភាពបន្ត ពិតជាផ្គើនមែន៕ ដោយ៖វ៉ៃកូ