កណ្តាល៖ ទណ្ឌិតម្នាក់ ដែលជាប់នៅពន្ធនាគារខេត្តកណ្តាល មានអាការហត់ខ្លាំង ហើយត្រូវបានអនុរក្សពន្ធនាគារ បញ្ជូនមកមកសង្គ្រោះនៅមន្ទីរពេទ្យបង្អែកជ័យជំនះ បានមួយសន្ទុះក៏ដាច់ខ្យល់ស្លាប់តែម្តង។ ករណីក្រុមគ្រូពេទ្យ បានសន្និដ្ឋានថា ទណ្ឌិតរូបនោះ ស្លាប់ដោយសារជំងឺរាំរ៉ៃ និងគាំងបេះដូង បណ្តាលមកពីជំងឺអេដស៍ និងជំងឺរបេង។
នគរបាល ក្រុងតាខ្មៅ បានឲ្យដឹងថា នៅថ្ងៃទី២៣ ខែមីនា ឆ្នាំ២០២០ ការិយាល័យបច្ចេកទេស និងវិទ្យាសាស្ត្រ បានចុះពិនិត្យសាកសព ជនជាប់ពន្ធនាគារ ស្លាប់ ក្នុងមន្ទីរពេទ្យបង្អែកជ័យជំនះ ។
សពឈ្មោះ រឿន រតនា ហៅ ខ្មាន់ ភេទប្រុស អាយុ២៨ ឆ្នាំ មានទីលំនៅភូមិខ្ពបវែង សង្កាត់កំពង់សំណាញ់ ក្រុងតាខ្មៅ ខេត្តកណ្តាល ជាប់ឃុំពីបទ ជួញដូរ និងរក្សាទុកដោយខុសច្បាប់នូវសារធាតុញៀន ប្រព្រឹត្តនៅភូមិថ្មី១ សង្កាត់តាខ្មៅ ក្រុងតាខ្មៅ ខេត្តកណ្តាល កាលពីថ្ងៃទី១ខែតុលា ឆ្នាំ២០១៩ ជាប់ឃុំក្នុងពន្ធនាគារខេត្តកណ្តាល។
នគរបាលក្រុងតាខ្មៅ បានរៀបរាប់ពីសភាពរឿងហេតុនេះថា ការបំភ្លឺរបស់លោក សៅ ផារិន្ទ អនុប្រធានការិយាល័អប់រំកែប្រែ បានឱ្យដឹងថា នៅថ្ងៃទី២៣ ខែមីនា ឆ្នាំ២០២០ វេលាម៉ោង៥និង៣០នាទី ជនជាប់ឃុំ មានអាការហត់ខ្លាំងបានបញ្ជូនមកមន្ទីរពេទ្យបង្អែកជ័យជំនះ ដើម្បីព្យាបាល ពេលមកដល់មន្ទីរពេទ្យ នៅវេលា៨និង១៥នាទី ជនជាប់ក៏ឃុំបានស្លាប់។
ការពិនិត្យសាកសព សាកសពសភាពស្គមរីងរៃ ស្បែករមាស់បែកស្រកាជាំខ្មៅពេញខ្លួន។ សាកសពពុំមានស្លាកស្នាមអ្វីគួរឱ្យកត់សម្គាល់ទ្បើយ។ ការសន្និដ្ឋានរបស់លោកគ្រូពេទ្យ សពស្លាប់ ដោយគាំងបេះដូង (បណ្តាលមកពីជំងឺអេដស៍ និងជំងឺរបេង)។ ក្រោយពិនិត្យចប់ សពបានប្រគល់ជូនខាងអង្គភាព ពន្ធនាគារ ចាត់ចែងបន្តតាមនីតិវិធី ៕ដោយ៖កូឡាប