ភ្នំពេញ ៖ សម្តេចក្រឡាហោម ស ខេង បានថ្លែងថា រហូតមកដល់ពេលនេះ មានប្រជាពលរដ្ឋខ្មែរ ដែលមកពីធ្វើការនៅប្រទេសថៃ ហើយបានចូលមកស្រុកកំណើតវិញ ក្នុងរង្វង់ប្រមាណ១ ម៉ឺន៥ពាន់នាក់ហើយ ហើយពួកគាត់កំពុងតែបន្តធ្វើដំណើរមកទៀត ។ សម្តេចក៏បានអំពាវនាវឲ្យអាជ្ញាធរមូលដ្ឋាន ផ្សព្វផ្សាយព័ត៌មាន អប់រំ ប្រជាពលរដ្ឋនៅតាមភូមិ ឃុំ ស្រុក ដើម្បីទប់ស្កាត់រីករាលដាល ជំងឺកូវីដ១៩ ហើយប្រសិនបើនៅភូមិមួយណា មានករណីផ្ទុកមេរោគកូវីដ១៩ គឺបិទភូមិនោះតែម្តង ឬក៏បិទគ្រួសារនោះ ដើម្បីទប់ស្កាត់ការរីករាលដាល។
សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងប្រាប់អ្នកសារព័ត៌មាន នៅព្រឹកថ្ងៃទី២៤ ខែមីនា ឆ្នាំ២០២០ នៅព្រលានយន្តហោះអន្តរជាតិភ្នំពេញ។
ក្នុងពេលដែលបច្ចុប្បន្ននេះ មានបណ្តាញសង្គមមួយចំនួន បានផ្សព្វផ្សាយសារជាសំឡេង របស់សម្តេចក្រឡាហោម លើបណ្តាញសង្គមថាបិទផ្សារនោះ សម្តេច ស ខេង បានបដិសេធចំពោះសារសំឡេង ហើយសម្តេចថា ការបិទផ្សារ ដែលធ្វើឲ្យទំនិញឡើងថ្លៃ ជាការមិនពិត ។ សម្តេចថា រឿងទំនិញឡើងថ្លៃខ្ញុំបានណែនាំទេ ។ សំឡេងនោះមិនមែនសំឡេងខ្ញុំទេ។ ខ្ញុំមានតែសំឡេង ដែលណែនាំមន្ត្រីក្រសួង មិនណែនាំប្រជាពលរដ្ឋទេ ក្នុងន័យថា កាលណាយើងទៅផ្សារ ដោយអត់បានប្រុងប្រយ័ត្ន ព្រោះជំងឺទាំងឡាយដែលឆ្លងមក ព្រោះអ្នកទាំងនោះទៅផ្សារ ហើយលុយកាន់ចុះឡើងៗ ធ្វើឲ្យឆ្លងមេរោគ។ សារសំឡេងនោះ ក្នុងណែនាំដល់មន្ត្រីរាជការផ្ទៃក្នុង ក្រសួងមហាផ្ទៃទេ មិនមែននាំប្រជាពលរដ្ឋទូទាំងនោះទេ គឺអត់មានទេ។
សម្តេចស ខេង បានថ្លែងថា រហូតមកដល់ពេលយើង មិនបានជើងយន្តហោះនោះទេ ប៉ុន្តែនៅប្រទេសគេផ្សេង គេបានបិទហើយ ដូច្នេះដូចជា យើងបិទដែរ ព្រោះគ្មានជើងយន្តហោះនោះទេ។
សម្តេចក៏បានលើកឡើងថា ចំពោះការវិលត្រឡប់ របស់បងប្អូនពលករខ្មែរ មកពីប្រទេសថៃនេះ ក្នុងរង្វង់១ម៉ឺន៥ពាន់នាក់។ ពាក់ព័ន្ធនឹងការធ្វើការត្រួតពិនិត្យសុខភាព លើពលករខ្មែរដែលមកពីថៃនោះ សម្តេចក្រឡាហោម បានធ្វើសំណើរទៅសម្តេចតេជោ ហ៊ុន សែន នាយករដ្ឋមន្ត្រី ថា បើសិនជាមានបងប្អូនមកពីថៃ សុំឲ្យរដ្ឋបាលនៅតាមមូលដ្ឋាន ទៅជួបពលករទាំងនោះនៅផ្ទះ ដើម្បីជួយពន្យល់ពួកគាត់ ទៅពិនិត្យសុខភាព និងកុំទៅពាក់ព័ន្ធជាមួយអ្នកដទៃ ហើយប្រសិនបើមានបញ្ហាអ្វី (មានករណី ឆ្លងជំងឺកូវីដ១៩) យើងត្រូវការបិទការធ្វើដំណើរ នៅក្នុងភូមិ ឬកន្លះភូមិ ព្រោះថាភូមិនៅស្រុកយើង មិនដូចនៅប្រទេសគេទេ ជូនអីនៅរ៉ាយប៉ាយ នៅដាច់ពីគេ ដូច្នេះយើងបិទតែផ្ទះគាត់នោះទៅ មិនបាច់បិទភូមិនោះទេ ប៉ុន្តែបើផ្ទះនៅជាប់ៗគ្នា ដូចទីក្រុងភ្នំពេញ ដែលសុទ្ធតែផ្ទះល្វែង គឺយើងត្រូវបិទទាំងអស់ហើយ ។
ពាក់ព័ន្ធនឹងការបង្ខាំងមនុសនៅក្នុងផ្ទះដូចនៅអីតាលីនោះ សម្តេច ស ខេង បានលើកឡើងថា នៅកម្ពុជាមិនទាន់ឈានដល់ធ្វើការបង្ខាំងមនុស្ស មិនឲ្យចេញពីផ្ទះដូចប្រទេសអីតាលី ឬប្រទេសផ្សេងនោះទេ គឺគ្រាន់តែធ្វើការអំពាវនាវសិន ។ ប៉ុន្តែបើនៅប្រទេសផ្សេង បើមិនស្តាប់ គេនឹងមានការផាកពិន័យ ហើយអាចជាប់គុកទៀត ដូចជា ប្រទេសស្វីស បើអ្នកនោះ មានមេរោគដើរចម្លងគេ ត្រូវចាប់ដាក់គុក បើទោះបីអ្នកនោះ ជាសះស្បើយពីជំងីកូវីដ១៩នេះក៏ដោយ ។
សម្តេចបញ្ជាក់ថា ឥឡូវនេះយើងយកវិធានការ ប្រៀបដូចជាការឃោសនាបោះឆ្នោតអីចឹង គឺមានម៉ូតូនិងចាក់មេក្រូ ចាក់ផ្សាយប្រកាសព័ត៌មានតាមភូមិ ដើម្បីឲ្យប្រជាពលរដ្ឋស្តាប់ រហូតដល់ប្រជាពលរដ្ឋ បានយល់ ហើយពួកគាត់ធ្វើបានទេ ចំពោះសេចក្តីណែនាំនេះ ប៉ុន្តែបើពួកគាត់មិនទាន់យល់ ក៏យើងចាក់សារណែនាំនោះ បន្តទៀត ហើយបើពួកគាត់បានយល់ច្បាស់ហើយ ចាំយើងដូរកន្លែង ទៅទីតាំងផ្សេងមួយទៀត។
សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ អញ្ជើញជាអធិបតី ក្នុងពិធីជួបសំណេះសំណាល ជាមួយមន្ត្រីនគរបាលអន្តោប្រវេសន៍ នៅអាកាសយានដ្ឋានអន្តរជាតិភ្នំពេញ នាព្រឹកថ្ងៃអង្គារ ទី២៤ ខែមីនា ឆ្នាំ២០២០ ៕ ដោយ៖កូឡាប