បុរសអាយុ ៣២ ឆ្នាំ ម្នាក់ឈ្មោះ Chen បានគិតថាជីវិតរបស់គាត់ក្នុងជាតិនេះគ្រប់គ្រាន់ហើយ និងសម្រេចចិត្ត «លាចាក» ទៅវិញ តាមរយៈការធ្វើអត្តឃាតលោតពីលើអគារជាន់ទី៤ ដែលប្រហែលចង់ឲ្យគេសរសើរស្លាប់ទៅអស្ចារ្យ! ។
ប៉ូលីសក្នុងទីប្រជុំ Nankang ក្រុង Beihai បានទទួលការខលហៅអំពីព័ត៌មានបុរសម្នាក់កំពុងរៀបចំធ្វើអត្តឃាត និងបានប្រញាប់ប្រញាល់មកកាន់កន្លែងអគារកើតហេតុ ស្ថិតនៅក្នុងតំបន់ស្វយ័តក្វាងស៊ី Guangxi Zhuang ភាគខាងត្បូងនៃប្រទេសចិន ដែលកំពុងស្ថិតក្នុងការសាងសង់នៅឡើយ ។
ខណៈក្រុមពន្លត់អគ្គីភ័យកំពុងរៀបចំឧបករណ៍ ដើម្បីជួយសង្គ្រោះបុរសរូបនេះដែលកំពុងឆ្លេរឆ្លាពីជាន់ទី៤ នៅពេលនោះ ប៉ូលីសម្នាក់ក៏បានដើរចូលពីខាងក្រោមយ៉ាងក្លាហានតែម្នាក់ឯង និងមិនបានប៉ុន្មានផង បុរសរូបនេះក៏បានលោតចុះមកប៉ះទង្គិចឈើគ្រោងសំណង់យ៉ាងទីណាត់ទីណែងតែម្តង ។ ភ្លាមៗនោះ មន្ត្រីប៉ូលីសឈ្មោះ Liang Xiao ក៏បានត្រៀមខ្លួនជាស្រេច ដើម្បី «ទ្រចាប់» គាត់ បើទោះជាដឹងថា គាត់ប្រាកដណាស់នឹងត្រូវរបួសយ៉ាងណាក៏ដោយចុះ ។
ពិតណាស់ ដោយសារការប៉ះទង្គិចខ្លាំង ជាលទ្ធផល បណ្តាលឲ្យទាំងប៉ូលីស និងបុរសនោះរងរបួសទាំងពីរ ។ យ៉ាងណាមិញ ចំពោះមូលហេតុដែលនាំឲ្យ Chen ធ្វើអត្តឃាតបែបនេះ គេនៅពុំទាន់ដឹងច្បាស់នោះទេ ៕ ចន្ទី