ភ្នំពេញ៖ ខណៈជំងឺឆ្លងកូវីដ១៩ កំពុងវាយប្រហារ លោក ពេជ្រ ស្រស់ ប្រធានគណបក្សយុវជនកម្ពុជា និងជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ បានស្នើសុំសម្តេចតេជោ លើការពន្យារពេលសងបំណុលរបស់ពលរដ្ឋ ដែលជំពាក់ធនាគារឯកជន ក្នុងមុខរបរសេដ្ឋកិច្ចក្រៅប្រព័ន្ធ និងអាជីវកម្មខ្នាតតូច។
នៅថ្ងៃទី២៤ ខែមីនា ឆ្នាំ២០២០លោក ពេជ្រ ស្រស់ បានសម្រេចចិត្តផ្ញើលិខិតមួយ ផ្ញើតាមលោកបណ្ឌិត ឈឹម ផលវរុណ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកប្រធានលេខាធិការដ្ឋាននៃឧត្តមក្រុមប្រឹក្សាពិគ្រោះ និងផ្ដល់យោបល់ជូនទៅសម្តេចតេជោ ដើម្បីស្នើសុំកិច្ចអន្តរាគមន៍ពិសេសមួយពីសម្តេចតេជោស្នើលោកជួយចរចាជាមួយនឹង ធនាគារ ឯកជនឲ្យពន្យារពេលការប្រមូលបំណុលពីប្រជាពលរដ្ឋខ្មែរមួយរយៈសិន ក្នុងកាលៈទេសៈ មេរោគ COVID -19 កំពុងរាតត្បាតក្នុងប្រទេសកម្ពុជា។ អ្វីដែលខ្ញុំត្រូវធ្វើគឺធ្វើអស់ហើយនៅឡើយលទ្ធផលគឺទុកឲ្យរដ្ឋាភិបាលជាអ្នកកំណត់ទៅចុះ។
លោក បានស្នើសូមសម្ដេចតេជោមេត្តាអន្តរាគមន៍លើការពន្យារពេលក្នុងការបង់បំណុលរបស់ប្រជាពលរដ្ឋខ្មែរជាអ្នកប្រកបមុខរបរសេដ្ឋកិច្ចក្រៅប្រព័ន្ធ និងអាជីវករពាណិជ្ជករខ្នាតតូចដែលបានខ្ចីថវិកាធ្វើជាដើមទុនពីធនាគារឯកជនទាំងអស់ក្នុងប្រទេសកម្ពុជាមួយរយៈសិនដោយសារមេរោគកូវីដ១៩ បានឆ្លងមកដល់កម្ពុជាយ៉ាងឆាប់រហ័ស ធ្វើឲ្យប្រជាពលរដ្ឋខ្មែរជួបនូវវិបត្តិសេដ្ឋកិច្ចយ៉ាងគំហុក។
ក្នុងនាមជាប្រធានប្រតិភូគណបក្សយុវជនកម្ពុជាសូមស្នើដល់សម្ដេចតេជោមេត្តាពិចារណាពិភាក្សានិងចរចាជាមួយធនាគារឯកជនទាំងអស់ឲ្យពន្យារពេលក្នុងការបង់បំណុលរបស់ប្រជាពលរដ្ឋខ្មែរដែលបានខ្ចីនូវថវិកាធ្វើជាដើមទុនរកស៊ីហើយត្រូវបានមេរោគកូវីដ១៩ ឆ្លងមកប្រទេសកម្ពុជាធ្វើឱ្យប៉ះពាល់ដល់ការរកស៊ីរបស់ពួកគាត់ជាហេតុនាំឲ្យមុខរបរ និងអាជីវកម្មរបស់បងប្អូនប្រជាពលរដ្ឋខ្មែរយើងជួបវិបត្តិយ៉ាងធ្ងន់ធ្ងរ បាត់បង់ចំណូលប្រចាំថ្ងៃ ហើយធ្វើឲ្យពួកគាត់គ្មានលទ្ធភាពបង់បំណុលជូនធនាគារឯកជនដែលពួកគាត់បានខ្ចីនោះឡើយ។ ក្នុងន័យនេះខ្ញុំសូមសម្ដេចតេជោជួយផ្ដល់ជួយដល់ប្រជាពលរដ្ឋយើងមួយចំនួនដែលកំពុងតែជួបការលំបាកយ៉ាងខ្លាំងក្នុងការចេញស្វែងរកប្រាក់ចំណូលដើម្បីផ្គត់ផ្គង់គ្រួសារប្រចាំថ្ងៃក៏ដូចជាបង់បំណុលជូនធនាគារឯកជនអំឡុងពេលមេរោគកូវីដ១៩ឆ្លងយ៉ាងលឿននៅក្នុងប្រទេសកម្ពុជា៕ ដោយ៖កូឡាប